- ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ: ಜೂನ್‌ 4, 2019
- ಲಿಖಿತ ಪರೀಕ್ಷೆಯ ಪ್ರವೇಶ ಪತ್ರ ಲಭ್ಯ: ಜೂನ್‌ 14ರ ನಂತರ
- ಲಿಖಿತ ಪರೀಕ್ಷೆ: ಜೂನ್‌-ಜುಲೈ, 2019
- ವಿವರಗಳಿಗೆ: http://joinindiancoastguard.gov.in
ಭಾರತೀಯ ಕರಾವಳಿ ಪಡೆಯಲ್ಲಿ ಆಫೀಸರ್‌ ಆಗುವ ಸುವರ್ಣಾವಕಾಶ. 2020ರ ಬ್ಯಾಚ್‌ಗೆ ಅಸಿಸ್ಟೆಂಟ್‌ ಕಮಾಂಡೆಂಟ್‌ ನೇಮಕಕ್ಕೆ ಅರ್ಹ ಪುರುಷ ಮತ್ತು ಮಹಿಳಾ ಅಭ್ಯರ್ಥಿಗಳಿಂದ ಆನ್‌ಲೈನ್‌ ಮೂಲಕ ಅರ್ಜಿ ಆಹ್ವಾನಿಸಲಾಗಿದೆ. ಅರ್ಜಿ ಸಲ್ಲಿಸಲು ಜೂನ್‌ 4 ಕೊನೆಯ ದಿನವಾಗಿದೆ. ಜನರಲ್‌ ಡ್ಯೂಟಿ, ಜನರಲ್‌ ಡ್ಯೂಟಿ (ಎಸ್‌ಎಸ್‌ಎ), ಕಮರ್ಷಿಯಲ್‌ ಪೈಲಟ್‌ ಎಂಟ್ರಿ (ಸಿಪಿಎಲ್‌), ಟೆಕ್ನಿಕಲ್‌ (ಎಂಜಿನಿಯರಿಂಗ್‌ ಮತ್ತು ಎಲೆಕ್ಟ್ರಿಕಲ್‌) ಮತ್ತು ಲಾ(ಕಾನೂನು) ಬ್ರಾಂಚ್‌ಗಳಿಗೆ ನೇಮಕ ಮಾಡಿಕೊಳ್ಳಲಾಗುತ್ತದೆ.
ಹುದ್ದೆಗಳ ವಿವರ
ಜನರಲ್‌ ಡ್ಯೂಟಿ: ಇದರಲ್ಲಿ ಜನರಲ್‌ ಡ್ಯೂಟಿ ಮತ್ತು ಜನರಲ್‌ ಡ್ಯೂಟಿ (ಎಸ್‌ಎಸ್‌ಎ) ಎರಡು ವಿಭಾಗಗಳಿಗೆ ನೇಮಕ ನಡೆಯಲಿದೆ. ಈ ವಿಭಾಗದಲ್ಲಿ ಆಫೀಸರ್‌ ಹುದ್ದೆಗೆ ಅರ್ಜಿ ಸಲ್ಲಿಸಬೇಕಾದರೆ ಅಭ್ಯರ್ಥಿಗಳು ಬಿಇ/ಬಿಟೆಕ್‌ ವಿದ್ಯಾರ್ಹತೆ (ಶೇಕಡಾ 60 ಅಂಕಗಳೊಂದಿಗೆ ತೇರ್ಗಡೆ) ಹೊಂದಿರಬೇಕು ಅಥವಾ ಅಂತಿಮ ಪದವಿಯಲ್ಲಿ ಓದುತ್ತಿರುವವರೂ ಅರ್ಜಿ ಸಲ್ಲಿಸಲು ಅರ್ಹರು. ಆದರೆ, ಪಿಯುಸಿಯಲ್ಲಿ ವಿಜ್ಞಾನ ವಿಷಯವನ್ನು ಆಯ್ದುಕೊಂಡು ಶೇಕಡಾ 60 ಅಂಕಗಳೊಂದಿಗೆ ತೇರ್ಗಡೆಯಾಗಿದ್ದರೆ ಮಾತ್ರ ಅರ್ಜಿ ಸಲ್ಲಿಸಲು ಅವಕಾಶ.
ಕಮರ್ಷಿಯಲ್‌ ಪೈಲಟ್‌ ಎಂಟ್ರಿ: ಶಾರ್ಟ್‌ ಸವೀರ್‍ಸ್‌ ಕಮೀಷನ್‌ನಡಿಯಲ್ಲಿ ಪೈಲಟ್‌ಗಳ ನೇಮಕಾತಿಯೂ ನಡೆಯಲಿದೆ. ಇವುಗಳಿಗೆ ಪುರುಷರು ಮಾತ್ರವಲ್ಲದೆ ಮಹಿಳೆಯರೂ ಅರ್ಜಿ ಸಲ್ಲಿಸಬಹುದಾಗಿದೆ. ದ್ವಿತೀಯ ಪಿಯುಸಿ ತೇರ್ಗಡೆಯಾಗಿರುವ ಅಭ್ಯರ್ಥಿಗಳಿಗೆ ಅವಕಾಶ. ಜೊತೆಗೆ ಅಭ್ಯರ್ಥಿಗಳು ಕಮರ್ಷಿಯಲ್‌ ಪೈಲಟ್‌ ಪೈಸೆನ್ಸ್‌ ಕೂಡ ಹೊಂದಿರಬೇಕು.
ಟೆಕ್ನಿಕಲ್‌ ಮತ್ತು ಲಾ: ಟೆಕ್ನಿಕಲ್‌ ವಿಭಾಗಕ್ಕೆ ಅರ್ಜಿ ಸಲ್ಲಿಸುವವರು ಸಂಬಂಧಪಟ್ಟ ಎಂಜಿನಿಯರಿಂಗ್‌ ಪದವಿ ಮತ್ತು ಕಾನೂನು ಬ್ರಾಂಚ್‌ಗೆ ಕಾನೂನು ಪದವಿ ವಿದ್ಯಾರ್ಹತೆ ನಿಗದಿಪಡಿಸಲಾಗಿದೆ.
ವಯೋಮಿತಿ: ಜನರಲ್‌ ಡ್ಯೂಟಿ ಮತ್ತು ಟೆಕ್ನಿಕಲ್‌ ವಿಭಾಗದ ಹುದ್ದೆಗಳಿಗೆ ಅರ್ಜಿ ಸಲ್ಲಿಸುವ ಅಭ್ಯರ್ಥಿಗಳು 1995ರ ಜುಲೈ 1 ಮತ್ತು 1999ರ ಜೂನ್‌ 30ರ ನಡುವೆ ಜನಿಸಿರಬೇಕು. ಅಂತೆಯೇ ಜನರಲ್‌ ಡ್ಯೂಟಿ (ಪೈಲಟ್‌) ಹಾಗೂ ಕಮರ್ಷಿಯಲ್‌ ಪೈಲಟ್‌ ಹುದ್ದೆಗಳಿಗೆ ಅರ್ಜಿ ಸಲ್ಲಿಸುವ ಅಭ್ಯರ್ಥಿಗಳು 1995ರ ಜುಲೈ 1 ಮತ್ತು 2001ನೇ ಇಸವಿಯ ಜೂನ್‌ 30ರ ನಡುವೆ ಜನಿಸಿರಬೇಕು. ಕಾನೂನು ವಿಭಾಗಕ್ಕೆ ಅರ್ಜಿ ಸಲ್ಲಿಸುವ ಅಭ್ಯರ್ಥಿಗಳು 1990ರ ಜುಲೈ1 ಮತ್ತು 1999ರ ಜೂನ್‌ 30ರ ನಡುವೆ ಜನಿಸಿರಬೇಕು.
ನೇಮಕ ವಿಧಾನ: ಲಿಖಿತ ಪರೀಕ್ಷೆ, ವೈದ್ಯಕೀಯ ಪರೀಕ್ಷೆ , ಕೌಶಲ ಪರೀಕ್ಷೆ ಮತ್ತು ಸಂದರ್ಶನದ ಮೂಲಕ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಲಾಗುತ್ತದೆ. ಮುಂಬೈ, ಚೆನ್ನೈ, ಕೋಲ್ಕೊತಾ ಮತ್ತು ನೋಯ್ಡಾದಲ್ಲಿ ಲಿಖಿತ ಪರೀಕ್ಷಾ ಕೇಂದ್ರಗಳಿರಲಿವೆ. ಎಲ್ಲಾ ಹಂತದ ಪರೀಕ್ಷೆಗಳು ಮುಗಿದು ಅಂತಿಮವಾಗಿ ಆಯ್ಕೆಯಾದ ಅಭ್ಯರ್ಥಿಗಳಿಗೆ 2019ರ ನವೆಂಬರ್‌ನಿಂದ ಕೇರಳದ ಎಝಿಮಾಲದ ಇಂಡಿಯನ್‌ ನೇವಲ್‌ ಅಕಾಡೆಮಿಯಲ್ಲಿ ತರಬೇತಿ ಆರಂಭಗೊಳ್ಳಲಿದೆ.