ಸ್ವಂತ ಉದ್ಯೋಗ ಮಾಡಲು ಬಯಸುವವರಿಗೆ ಟಿಪ್ಸ್

ಆಫೀಸ್‌ಗಳಲ್ಲಿ ಕೆಲಸ ಮಾಡುವ ಬದಲು ನೀವೇ ಸ್ವಂತ ಉದ್ಯೋಗ ಮಾಡುವ ಕನಸುಗಳು ನಿಮಗಿದ್ಯಾ? ಹಾಗಿದ್ರೆ ನೀವು ಸೆಲ್ಫ್ ಎಂಪ್ಲಾಯ್‌ಮೆಂಟ್‌ ಮಾಡಬಹುದು. ಇದನ್ನು ಮಾಡಲು ಬಯಸುವವರಿಗೆ ಒಂದಿಷ್ಟು ಐಡಿಯಾಗಳು ಇಲ್ಲಿವೆ ನೋಡಿ..

* ನಿಮಗೆ ಪಾಠ ಮಾಡಲು ಆಸಕ್ತಿಯಿದ್ಯಾ, ಹಾಗಿದ್ರೆ ಟ್ಯೂಟರ್‌ ಆಗಿ ಸ್ವ ಉದ್ಯೋಗ ಆರಂಭಿಸಬಹುದು. ಇದಕ್ಕೆ ಪೂರಕವಾಗಿ ಒಂದು ವೆಬ್‌ಸೈಟ್‌ ರಚಿಸಿಕೊಂಡು, ಮನೆಯ ಒಂದು ಕೋಣೆಯನ್ನೇ ಕ್ಲಾಸ್‌ರೂಂ ವಾತಾವರಣದಂತೆ ಮಾಡಿಕೊಳ್ಳಬಹುದು. ಇತ್ತೀಚೆಗೆ ಆನ್‌ಲೈನ್‌ ಟ್ಯೂಟರ್‌ಗಳಿಗೆ ಬೇಡಿಕೆ ಹೆಚ್ಚಿದ್ದು, ಇಂಟರ್‌ನೆಟ್‌ನಲ್ಲೇ ಟ್ಯೂಷನ್‌ ನೀಡಬಹುದು. ಇದರಿಂದ ಉತ್ತಮ ಆದಾಯವನ್ನೂ ಗಳಿಸಬಹುದು.

* ಫೋಟೋಗ್ರಫಿ ಅಥವಾ ಛಾಯಾಗ್ರಹಣವನ್ನು ಕೇವಲ ಹಾಬಿಯಾಗಿ ಮಾಡಿಕೊಂಡಿದ್ದೀರಾ? ನಿಮಗೆ ಈ ಫೀಲ್ಡ್‌ನಲ್ಲಿ ಮುಂದುವರಿಯುವ ಆಸಕ್ತಿ ಇದ್ದರೆ ಸ್ವಂತ ಸ್ಟುಡಿಯೋ ತೆರೆಯಬಹುದು. ಫ್ರೀಲ್ಯಾನಸ್ಸ್‌ ಫೋಟೊಗ್ರಾಫರ್‌ ಅಹ ಆಗಬಹುದು. ಅಲ್ಲದೆ, ಮದುವೆ ಸೀಸನ್‌ಗಳಲ್ಲಿ ಛಾಯಾಗ್ರಹಕರಿಗೆ ಒಳ್ಳೆಯ ಬೇಡಿಕೆ ಹೆಚ್ಚಿದ್ದು, ಉತ್ತಮ ಆದಾಯ ಸಂಪಾದಿಸಬಹುದು.

* ನಿಮ್ಮಲ್ಲಿ ಸ್ವಂತ ವಾಹನವಿದ್ದರೆ ಅದನ್ನು ಬಾಡಿಗೆಗೆ ಓಡಿಸಿ ದುಡ್ಡು ಮಾಡಬಹುದು. ಉಬರ್‌, ಓಲಾದಂತಹ ಟ್ಯಾಕ್ಸಿ ಸೇವಾ ಸಂಸ್ಥೆಗಳ ಜತೆ ಟೈ ಅಪ್ ಮಾಡಿಕೊಳ್ಳಬಹುದು.

* ಇನ್ನು, ಈಗಿನ ಕಾಲದಲ್ಲಿ ನಗರ, ಪಟ್ಟಣಗಳಲ್ಲಿರುವ ಬಹುತೇಕ ಪತಿ - ಪತ್ನಿಯರಿಗೆ ತಮ್ಮ ಮಕ್ಕಳನ್ನು ನೋಡಿಕೊಳ್ಳಲು ಸಮಯ ಇರುವುದಿಲ್ಲ. ಹೀಗಾಗಿ ಚೈಲ್ಡ್‌ ಕೇರ್‌ ಕೇಂದ್ರಗಳಿಗೆ ಬೇಡಿಕೆ ಹೆಚ್ಚಿದೆ. ನಿಮ್ಮಲ್ಲಿ ಸ್ವಲ್ಪ ವಿಶಾಲವೆನಿಸುವ ಮನೆಯಿದ್ದರೆ ಅದನ್ನೇ ಚೈಲ್ಡ್‌ ಕೇರ್‌ ಕೇಂದ್ರವಾಗಿ ಪರಿವರ್ತಿಸಬಹುದು.

* ಈಗ ಹೆಚ್ಚಿನ ಕಾರ್ಯಕ್ರಮಗಳಿಗೆ ಅಡುಗೆಯವರನ್ನು ನೇಮಿಸಿಕೊಂಡು ಮನೆಯಲ್ಲಿ ಆಹಾರ ತಯಾರಿಸುವ ಪರಿಪಾಠ ಕಡಿಮೆಯಾಗಿರುವುದರಿಂದ ಕೆಟರಿಂಗ್‌ಗಳಿಗೆ ಉತ್ತಮ ಬೇಡಿಕೆಯಿದೆ. ಮದುವೆ, ನಾಮಕರಣ, ಪಾರ್ಟಿ ಮುಂತಾದ ಹಲವು ಸಮಾರಂಭಗಳಿಗೆ ಕೆಟರಿಂಗ್‌ನವರೇ ಬೇಕು. ಹೀಗಾಗಿ ಸ್ವಂತ ಉದ್ಯೋಗ ಮಾಡಬಯಸುವವರಿಗೆ ಕೆಟರಿಂಗ್‌ ಸೂಕ್ತ ಆಯ್ಕೆಯಾಗಿದೆ.

* ನಿಮಗೆ ಮ್ಯೂಸಿಕ್‌, ಡ್ಯಾನ್ಸ್‌, ಯೋಗ ಇತ್ಯಾದಿಗಳಲ್ಲಿ ಆಸಕ್ತಿ ಇರಬಹುದು. ಈ ಕ್ಷೇತ್ರಗಳಲ್ಲಿ ಒಳ್ಳೆಯ ಹಿಡಿತವಿದ್ದರೆ ಇವುಗಳನ್ನು ಕಲಿಸುವ ಪುಟ್ಟ ಶಾಲೆಯನ್ನು ನೀವು ಆರಂಭಿಸಬಹುದು. ಮನೆಯ ಟೆರೇಸ್‌ನಲ್ಲಿ, ಮನೆಯ ಮುಂದಿರುವ ಖಾಲಿ ಜಾಗದಲ್ಲಿ ಕಲಿಸಬಹುದಾಗಿದೆ.