ಉದ್ಯೋಗಕ್ಕಾಗಿ ಸಂದರ್ಶನಕ್ಕೆ ಸಿದ್ಧಗೊಳ್ಳುತ್ತಿದ್ದೀರಾ? ಇಲ್ಲಿದೆ ಪೂರ್ವ ತಯಾರಿ

ಉದ್ಯೋಗಕ್ಕಾಗಿ ನಡೆಸುವ ಸಂದರ್ಶನ ಎಂದರೆ ಕೆಲವರಿಗೆ ಭಯ. ಅಲ್ಲಿ ಏನೇನು ಪ್ರಶ್ನೆ ಕೇಳುತ್ತಾರೋ... ಏನೋ.... ಎಂದು ಯೋಚಿಸಿಯೇ ಹೆದರುವವರಿದ್ದಾರೆ. ಸಂದರ್ಶನಕ್ಕೆ ಕರೆ ಬಂದರೆ ನೀವು ಗಾಬರಿಯಾಗಬೇಡಿ. ರಿಲ್ಯಾಕ್ಸ್‌ ಆಗಿ ಇರಿ. ಇಂಟರ್‌ವ್ಯೂನಲ್ಲಿ ಕೇಳಲಾಗುವ ಪ್ರಶ್ನೆಗಳನ್ನು ವರ್ಗೀಕರಿಸಿಕೊಂಡು, ಹೇಗೆ ಉತ್ತರಿಸಬಹುದೆಂದು ಯೋಚಿಸಿ. ಮನೆಯಲ್ಲಿಯೇ ಸಂದರ್ಶನ ಎದುರಿಸುವ ಕುರಿತು ರಿಹರ್ಸಲ್‌ ಮಾಡಿ, ನಿಮ್ಮ ಆತ್ಮವಿಶ್ವಾಸ ಹೆಚ್ಚಿಸಿಕೊಳ್ಳಿ. ಧೈರ್ಯದಿಂದ ಸಂದರ್ಶನ ಎದುರಿಸಿ.

ಸಾಮಾನ್ಯವಾಗಿ ಸಂದರ್ಶನದಲ್ಲಿ ಕೇಳಲಾಗುವ ಪ್ರಶ್ನೆಗಳನ್ನು ನಾಲ್ಕು ರೀತಿಯಲ್ಲಿ ವಿಂಗಡಿಸಲಾಗುತ್ತದೆ;

1. ನಿಮ್ಮ ಬಗ್ಗೆ ಕೇಳಲಾಗುವ ಪ್ರಶ್ನೆಗಳು.
2. ನಿಮಗಿರುವ ಕೆಲಸದ ಅನುಭವ ಹಾಗೂ ಜ್ಞಾನವನ್ನು ಕುರಿತ ಪ್ರಶ್ನೆಗಳು.
3. ಈ ಕೆಲಸ ನಿಮಗೇಕೆ ಬೇಕು? ಎನ್ನುವಂತಹ ಪ್ರಶ್ನೆಗಳು.
4. ಅರ್ಹತೆಯನ್ನು ಆಧರಿಸಿದ ಪ್ರಶ್ನೆಗಳು.

ಸಂದರ್ಶನದಲ್ಲಿ ಏನು ಕೇಳುತ್ತಾರೆ; ಯಾಕೆ ಕೇಳುತ್ತಾರೆ ಎಂಬುಧಿ ದನ್ನು ತಿಳಿದುಕೊಂಡಿದ್ದರೆ ಸಂದರ್ಶನವನ್ನು ಎದುರಿಸುವುದು ಸುಲಭ. ನಿಮ್ಮ ಅಂದರೆ ವೈಯಕ್ತಿಕ ಪ್ರಶ್ನೆಗಳನ್ನು ಕೇಳಿದರೆ, 'ನಿಮ್ಮನ್ನು ನೀವು ಹೇಗೆ ಮಾರ್ಕೆಟ್‌ ಮಾಡಿಕೊಳ್ಳಬೇಕು' ಎಂಬುದು ನಿಮಗೆ ಚೆನ್ನಾಗಿ ಗೊತ್ತಿರಬೇಕು. ಏಕೆಂದರೆ ನಿಮ್ಮ ಬಗ್ಗೆ ಹೆಚ್ಚು ತಿಳಿದುಕೊಳ್ಳಲು ಈ ರೀತಿಯ ಪ್ರಶ್ನೆಗಳನ್ನು ಕೇಳಿರುತ್ತಾರೆ. ಮಾರ್ಕೆಟ್‌ ಮಾಡಿಕೊಳ್ಳುವುದು ಕೂಡ ಒಂದು ಕಲೆ ಮಾತ್ರವಲ್ಲ, ಇದು ಅನುಭವದಷ್ಟೇ ಮುಖ್ಯವಾಗಿರುತ್ತದೆ ಎಂಬುದನ್ನು ನೆನಪಿಡಿ. ಕಷ್ಟದ ಪ್ರಶ್ನೆಗಳಿಗೂ ಇಷ್ಟಪಟ್ಟು ಉತ್ತರಿಸುವುದನ್ನು ಕಲಿತುಕೊಳ್ಳಿ.

ಕಠಿಣವಾದ ಕೆಲವು ಪ್ರಶ್ನೆಗಳು

ಈ (ಅರ್ಜಿ ಹಾಕಿರುವ) ಉದ್ಯೋಗ ನಿಮಗೇಕೆ ಬೇಕು?
ಇದು ಟ್ರಿಕಿ ಪ್ರಶ್ನೆ. ಮೊದಲ ಉದ್ಯೋಗ ಇದಾಗಿದ್ದರೆ ಹೆಚ್ಚು ಸಮಸ್ಯೆಯಿಲ್ಲ. ಆದರೆ ನಿಮಗಿದು ಎರಡನೆಯ ಕೆಲಸವಾಗಿದ್ದರೆ, ನೀವು ಇದಕ್ಕೆ ಪ್ರಾಮಾಣಿಕವಾಗಿ (ಹಾಗೆಂದು ಅತಿಯಾದ ಪ್ರಾಮಾಣಿಕತೆಯೂ ಬೇಡ) ಉತ್ತರಿಸಬೇಕಿದೆ. ಸಂದರ್ಶಕರು ನಿಮ್ಮಿಂದ ಸಕಾರಾತ್ಮಕವಾದ ಉತ್ತರವನ್ನು ಅಪೇಕ್ಷಿಸುತ್ತಾರೆ.

ಹಿಂದಿನ ಉದ್ಯೋಗ ಏಕೆ ಇಷ್ಟವಾಗಲಿಲ್ಲ?
ಈ ಪ್ರಶ್ನೆಗೂ ನಕಾರಾತ್ಮಕವಾಗಿ ಉತ್ತರಿಸಬೇಡಿ. 'ಈಗಿರುವ ಉದ್ಯೋಗವನ್ನು ಎಂಜಾಯ್‌ ಮಾಡುತ್ತಿದ್ದೇನೆ. ಇದರಿಂದ ಸಾಕಷ್ಟು ಕಲಿತಿದ್ದೇನೆ ಮತ್ತು ಒಬ್ಬ ವ್ಯಕ್ತಿಯಾಗಿಯೂ ಬೆಳೆದಿದ್ದೇನೆ. ಆದರೆ ಅಲ್ಲಿ ಬಡ್ತಿ ಮೊದಲಾದ ಅವಕಾಶಗಳಿಲ್ಲವಂತೆ. ಹೀಗಾಗಿ ಇಲ್ಲಿ (ಸ ಂದರ್ಶನಕ್ಕೆ ಬಂದಿರುವ ಹುದ್ದೆಯಲ್ಲಿ) ನನ್ನ ಕರಿಯರ್‌ನ ಮುಂದಿನ ಬೆಳವಣಿಗೆಯನ್ನು ನಿರೀಕ್ಷಿಸಿ, ಈ ಕೆಲಸ ನಿರ್ವಹಿಸಲು ತಯಾರಾಗಿದ್ದೇನೆ' ಎಂದು ಉತ್ತಿರಬಹುದು.

ಟೀಕೆಗಳಿಗೆ ಹೇಗೆ ಪ್ರತಿಕ್ರಿಯಿಸುವಿರಿ?
'ಜನರು ನನ್ನನ್ನು ಟೀಕಿಸುವುದು ನನಗೆ ಇಷ್ಟವಾಗುವುದಿಲ್ಲ' ಎಂದು ಉತ್ತರಿಸಬೇಡಿ. ನಾನು ಕಲಿಯುವುದಕ್ಕೆ ಮತ್ತು ನನ್ನ ಹುದ್ದೆಯಲ್ಲಿ ಇನ್ನಷ್ಟು ಉತ್ತಮವಾಗಿ ಕೆಲಸ ಮಾಡುವುದಕ್ಕೆ ನೆರವಾಗುವ, ರಚನಾತ್ಮಕ ಟೀಕೆಯನ್ನು ನಾನು ಯಾವಾಗಲೂ ಸ್ವಾಗತಿಸುತ್ತೇನೆ. ಯಾರೂ ಪರಿಪೂರ್ಣರಲ್ಲ. ಆದರೆ ಒಂದು ವೇಳೆ ನಾನೇನಾದರೂ ತಪ್ಪು ಮಾಡಿದಲ್ಲಿ , ಇದು ಮೊದಲ ಸಲ ಹಾಗೂ ಕೊನೆಯದು ಕೂಡ ಎಂದು ಭಾವಿಸುತ್ತೇನೆ' ಎಂದು ಉತ್ತರಿಸಬಹುದು.

ನಿಮ್ಮ ಹಿಂದಿನ ಕೆಲಸದಲ್ಲಿ ನಿಮಗೆ ಅತ್ಯಂತ ಹೆಮ್ಮೆ ಎನ್ನಿಸಿದ ಪ್ರಸಂಗ ಯಾವುದು?
ಇದು ನಿಮ್ಮನ್ನು ತಬ್ಬಿಬ್ಬುಗೊಳಿಸುವಂತಹ ಪ್ರಶ್ನೆ. ಹಿಂದಿನ/ ಪ್ರಸ್ತುತ ಉದ್ಯೋಗದಲ್ಲಿ ನೀವು ಮಾಡಿದ ಸಾಧನೆಗಳ ಕೆಲವು ಉದಾಹರಣೆಗಳೊಂದಿಗೆ ತಯಾರಾಗಿ ಸಂದರ್ಶನಕ್ಕೆ ಹೋಗುವುದು ಒಳ್ಳೆಯದು. ಅಲ್ಲಿ ನಿಮ್ಮ ಹೊಸ ಐಡಿಯಾ/ ಆವಿಷ್ಕಾರದ ಪರಿಣಾಮವಾಗಿ ಸಂಸ್ಥೆಗೆ ಯಾವ ರೀತಿ ಪ್ರಯೋಜನವಾಯಿತು, ಸಂಸ್ಥೆಯಿಂದ ನಿಮಗೆ ಸಿಕ್ಕ ಬಹುಮಾನ/ ಪ್ರಶಂಸಾಪತ್ರ ಇತ್ಯಾದಿ ಬಗ್ಗೆ ತಿಳಿಸಿರಿ.

ನಿಮ್ಮ ದೌರ್ಬಲ್ಯಗಳೇನು?
ಸಂದರ್ಶನಗಳಲ್ಲಿ ಸಾಮಾನ್ಯವಾಗಿ, ನಿಮ್ಮ ಬಲ (ಸ್ಟ್ರೆಂತ್‌) ಮತ್ತು ನಿಮ್ಮ ದೌರ್ಬಲ್ಯಗಳೇನು (ವೀಕ್‌ನೆಸ್‌) ಎಂದು ಕೇಳಲಾಗುತ್ತದೆ. 'ನಾನು ಮುಂಗೋಪಿ, ಕಚೇರಿಗೆ ತಡವಾಗಿ ಬರುವವನು...' ಇತ್ಯಾದಿ ಋುಣಾತ್ಮಕವಾದ ಉತ್ತರಗಳನ್ನು ಕೊಡಲೇಬಾರದು. 'ನಾನು ಎಲ್ಲದರಲ್ಲಿಯೂ ಪರಿಪೂರ್ಣ (ಪರಫೆಕ್ಷನಿಸ್ಟ್‌)' ಎಂದು ಹೇಳುವುದು ಕೂಡ ಸಾಮಾನ್ಯವಾದ ಉತ್ತರವೆನಿಸಿಬಿಡುತ್ತದೆ. 'ನಾನೂ ಸಹ ಕೆಲವೊಮ್ಮೆ ತಪ್ಪು ಮಾಡುತ್ತೇನೆ. ಆದರಿಂದ ಕಲಿತುಕೊಳ್ಳುತ್ತೇನೆ ಹಾಗೂ ಮತ್ತೊಮ್ಮೆ ಅಂತಹ ತಪ್ಪನ್ನು ಮಾಡುವುದಿಲ್ಲ ಎಂದು ಖಚಿತಪಡಿಸಿಕೊಳ್ಳುತ್ತೇನೆ' ಎನ್ನಿ.

ಸ್ಟ್ರೆಸ್‌ಗೆ ಹೇಗೆ ಸ್ಪಂದಿಸುವಿರಿ?ಒತ್ತಡದ ಸಂದರ್ಭಗಳಲ್ಲಿ ನೀವು ಹೇಗೆ ನಡೆದುಕೊಳ್ಳುವಿರಿ ಎನ್ನುವುದನ್ನು ತಿಳಿದುಕೊಳ್ಳಲು ಉದ್ಯೋಗದಾತರು ಇಂತಹ ಪ್ರಶ್ನೆಯನ್ನು ಕೇಳುತ್ತಾರೆ. ಕಾರ್ಯಭಾರವಿರುವ ಸ್ಥಳದಲ್ಲಿ ಹೇಗೆ ನಡೆದುಕೊಳ್ಳುವಿರಿ, ಎಷ್ಟು ವಿಶ್ವಾಸಾರ್ಹರಾಗಿರುತ್ತೀರಿ, ಪರಿಸ್ಥಿತಿ ಕೈಮೀರಿದಾಗ (ಉದಾಹರಣೆಗೆ ಗಡುವು ಮೀರಿದಾಗ) ಅದನ್ನು ಶಾಂತವಾಗಿ ಹೇಗೆ ನಿಭಾಯಿಸುವಿರಿ ಎಂಬುದನ್ನು ತಿಳಿಯಬಯಸಿರುತ್ತಾರೆ. ಆದ್ದರಿಂದ ಹಿಂದೆ ಅಂತಹ ಅನುಭವವಾಗಿದ್ದರೆ ಅದರ ಉದಾಹರಣೆಯನ್ನು ಕೊಡಿರಿ.