ವೈಫಲ್ಯಗಳನ್ನು ಏಣಿಯಾಗಿಸಿದ ಅಬ್ರಹಾಂ ಲಿಂಕನ್‌ ಕಥೆ

ಇದು ಚುನಾವಣಾ ಸಮಯ. ರಾಜಕಾರಣಿಗಳೆಲ್ಲ ಗೆಲುವಿಗಾಗಿ ಪ್ರಯತ್ನಿಸುತ್ತಿದ್ದಾರೆ. ಅಮೆರಿಕದ ಅಧ್ಯಕ್ಷರಾಗಿದ್ದ ಅಬ್ರಹಾಂ ಲಿಂಕನ್‌ ಸಹ ಇದೇ ರೀತಿ ಚುನಾವಣೆಗೆ ಸ್ಫರ್ಧಿಸಿದ್ದರು. ಅವರ ಜೀವನದಲ್ಲಿ ಹತ್ತು ಹಲವು ಸೋಲುಗಳು ಎದುರಾಗಿದ್ದವು.

ಅವರು ತನ್ನ 21ನೇ ವಯಸ್ಸಿನಲ್ಲಿ ವ್ಯಾಪಾರಕ್ಕೆ ಕೈ ಹಾಕಿದರು. ದೊಡ್ಡ ಪ್ರಮಾಣದ ನಷ್ಟವಾಗಿ ಕೈಸುಟ್ಟುಕೊಂಡರು. 22ನೇ ವಯಸ್ಸಿನಲ್ಲಿ ಶಾಸನ ಸಭೆಗೆ ಸ್ಪರ್ಧಿಸಿದರು. ಅಲ್ಲೂ ಸೋಲು ಇವರ ಪಾಲಾಯಿತು.

ರಾಜಕೀಯ ಬೇಡವೆಂದು 24ನೇ ವಯಸ್ಸಿನಲ್ಲಿ ಮತ್ತೆ ವ್ಯಾಪಾರಕ್ಕೆ ಕೈ ಹಾಕಿದರು. ಅಲ್ಲೂ ಮತ್ತೆ ನಷ್ಟ ಅನುಭವಿಸಿದರು. ವ್ಯಾಪಾರ, ರಾಜಕೀಯದ ಸೋಲಿನಿಂದ ಕಂಗೆಟ್ಟ ಲಿಂಕನ್‌ಗೆ 26ನೇ ವಯಸ್ಸಿನಲ್ಲಿ ಮತ್ತೊಂದು ಆಘಾತ ಎದುರಾಯಿತು. ಆ ಸಮಯದಲ್ಲಿ ತನ್ನ ಪ್ರೇಯಸಿಯ ಸಾವಿನಿಂದ ಕಂಗೆಟ್ಟರು. 27ನೇ ವಯಸ್ಸಿನಲ್ಲಿ ಲಿಂಕನ್‌ಗೆ ನರವ್ಯಾಧಿಯೊಂದು ಅಡರಿಕೊಂಡಿತು. ಹೀಗಾಗಿ ಆರೋಗ್ಯ ತೊಂದರೆಯೂ ಇವರ ಜೊತೆಯಾಯಿತು. ಕಂಗೆಡಲಿಲ್ಲ ಲಿಂಕನ್‌. 34ನೇ ವಯಸ್ಸಿನಲ್ಲಿ ಮತ್ತೆ ಚುನಾವಣೆಗೆ ನಿಂತರು. ಆಗಲೂ ಸೋತು ಹೋದರು. 47ನೇ ವಯಸ್ಸಿನಲ್ಲಿ ಉಪಾಧ್ಯಕ್ಷ ಚುನಾವಣೆಗೆ ನಿಂತಾಗಲೂ ಸೋಲು ಜೊತೆಯಾಯಿತು.

49ನೇ ವಯಸ್ಸಿನಲ್ಲಿ ಸೆನೆಟ್‌ ಚುನಾವಣೆಗೆ ಸ್ಪರ್ಧಿಸಿ ಸೋಲು ಅನುಭವಿಸಿದರು. ಸಾಮಾನ್ಯರಾದರೆ ಇನ್ನು ಇದರ ಸಹವಾಸವೇ ಬೇಡವೆಂದು ದೂರ ಸರಿದುಬಿಡುತ್ತಿದ್ದರು. ಆದರೆ, ಲಿಂಕನ್‌ ಪ್ರಯತ್ನ ಬಿಡಲಿಲ್ಲ. ಇವೆಲ್ಲಕ್ಕಿಂತ ಉನ್ನತ್ತ ಹುದ್ದೆ ತನಗಾಗಿ ಕಾಯುತ್ತಿದೆ ಎಂದುಕೊಂಡರು. ತನ್ನ 52ನೇ ವಯಸ್ಸಿನಲ್ಲಿ ಅಮೆರಿಕದ ಅಧ್ಯಕ್ಷ ಚುನಾವಣೆಗೆ ಸ್ಪರ್ಧಿಸಿದರು. ಈ ಹಿಂದಿನಂತೆ ಅಲ್ಲಿ ಸೋಲಾಗಲಿಲ್ಲ. ಅಮೆರಿಕದ ಅಧ್ಯಕ್ಷರಾಗಿ ಆಯ್ಕೆಯಾದರು.


ಕರಿಯರ್‌ನಲ್ಲಿ ಸೋಲುಗಳು

ಕೆಲವೊಮ್ಮೆ ಸದಾ ವೈಫಲ್ಯಗಳೇ ಎದುರಾಗಬಹುದು. ಅದರರ್ಥ ನೀವು ಯಶಸ್ಸು ಪಡೆಯುವುದಿಲ್ಲವೆಂದಲ್ಲ. ವೈಫಲ್ಯಗಳೇ ಯಶಸ್ಸಿನ ಮೆಟ್ಟಿಲು. ಬಹುತೇಕ ಜನರು ಯಶಸ್ಸಿನ ಬಾಗಿಲಿನವರೆಗೆ ಬಂದು ತಮ್ಮ ಪ್ರಯತ್ನ ಬಿಡುತ್ತಾರೆ. ಯಶಸ್ಸಿಗೆ ಕೊಂಚ ದೂರದಲ್ಲಿರುವಾಗ ವೈಫಲ್ಯಕ್ಕೆ ಹೆದರಿ ಪಲಾಯನಮಾಡಬೇಡಿ.

ಯಶಸ್ಸಿನ ಪ್ರತಿಯೊಂದು ಕಥೆಯೂ ಸೋಲಿನ ಕಥೆಯೂ ಆಗಿರಬಹುದು. ಅದೇ ರೀತಿ, ಸೋಲಿನ ಪ್ರತಿಯೊಂದು ಕಥೆಯೂ ದೊಡ್ಡ ಪ್ರಮಾಣದ ಯಶಸ್ಸಿಗೆ ಮೆಟ್ಟಿಲಾಗಬಹುದು. ನೀವು ಸೋಲಿನ ಪ್ರಮಾಣವನ್ನು ದ್ವಿಗುಣಗೊಳಿಸಿದಷ್ಟು ಯಶಸ್ಸಿಗೆ ಹತ್ತಿರವಾಗುತ್ತೀರಿ. ಹಾಗಂತ, ಪ್ರಯತ್ನ ಪಡದೆ ಸೋಲಿನತ್ತ ಸಾಗಬೇಡಿ. ಅದಕ್ಕೆ ಬೇಕಾದ ಅವಿರತ ಪ್ರಯತ್ನ ನಿಮ್ಮಲ್ಲಿ ಇರಲಿ.

ಸೋಲಿಗೆ ಅಬ್ರಹಾಂ ಲಿಂಕನ್‌ ವಿಚಲಿತರಾಗಲಿಲ್ಲ. ಇದರಿಂದಾಗಿ ಮಹತ್ತರ ಯಶಸ್ಸು ಇವರ ಪಾಲಾಯಿತು. ಈಗಲೂ ಅಬ್ರಹಾಂ ಲಿಂಕನ್‌ ಜಗತ್ತಿನ ಜನಪ್ರಿಯತೆ ಉಳಿಸಿಕೊಂಡಿದ್ದಾರೆ. ಈಗಿನ ಸ್ಪರ್ಧಾತ್ಮಕ ಜಗತ್ತಿನಲ್ಲಿ ನೀವೂ ಯಾವುದೇ ಸೋಲಿಗೆ ಅಂಜದೆ ಯಶಸ್ಸಿನತ್ತ ಸಾಗಬೇಕು.


ಪ್ರಯತ್ನ ನಿರಂತರವಾಗಿರಲಿ

* ಸೋಲಿಗೆ ಹೆದರಿ ಪ್ರಯತ್ನ ಮಾಡದೆ ಇರಬೇಡಿ. ಗೆಲುವು-ಸೋಲು ಮುಖ್ಯವಲ್ಲ. ನಿಮ್ಮ ಭಾಗವಹಿಸುವಿಕೆ, ಸತತ ಪರಿಶ್ರಮ ಅತ್ಯಂತ ಅಗತ್ಯ.

* ಕೆಲವೊಂದು ಸೋಲುಗಳು ಅಮೂಲ್ಯ ಪಾಠ ಕಲಿಸುತ್ತವೆ. ಭವಿಷ್ಯದಲ್ಲಿ ಸದಾ ಯಶಸ್ಸು ಉಳಿಸಿಕೊಳ್ಳಲು ಇಂತಹ ಸೋಲುಗಳು ನೆರವಾಗುತ್ತವೆ.

* ಓದು, ಉದ್ಯೋಗ, ವ್ಯವಹಾರ, ಜೀವನ.... ಹೀಗೆ ಎಲ್ಲಾ ಕಡೆಯೂ ನಿಮ್ಮ ಪರಿಶ್ರಮ, ಗುರಿ ಸದಾ ಜೀವಂತವಾಗಿರಲಿ. ಖಂಡಿತವಾಗಿಯೂ ಒಂದು ದಿನ ಯಶಸ್ಸು ನಿಮ್ಮ ಕಡೆಗೆ ಬಂದೇ ಬರುತ್ತದೆ.