ಪಿಯುಸಿ ಆರ್ಟ್ಸ್: ಮುಂದೆ ಏನು ಓದಬಹುದು?

ದ್ವಿತೀಯ ಪಿಯಸಿ ಮುಗಿಸಿದ ಬಳಿಕ ಮುಂದಿನ ಕೋರ್ಸ್‌ ಆಯ್ಕೆ ಮಾಡಿಕೊಳ್ಳುವಾಗ ಹೆಚ್ಚಿನ ಎಚ್ಚರಿಕೆ ವಹಿಸಬೇಕು. ಯಾಕೆಂದರೆ, ನೀವು ಆಯ್ಕೆ ಮಾಡಿಕೊಂಡ ಕೋರ್ಸ್‌ ನಿಮ್ಮ ಭವಿಷ್ಯವಾಗುತ್ತದೆ. ಜೀವನಪೂರ್ತಿ ಆ ಕೋರ್ಸ್‌ಗೆ ಸಂಬಂಧಪಟ್ಟ ಫೀಲ್ಡ್‌ನಲ್ಲಿ ಇರಬೇಕಾಗಬಹುದು. ಪಿಯುಸಿಯಲ್ಲಿ ಕಲಾ ವಿಷಯಗಳನ್ನು ಓದಿರುವವರ ಮುಂದಿರುವ ಕೆಲವು ಆಯ್ಕೆಗಳು ಇಲ್ಲಿವೆ.

ಸಮೂಹ ಸಂವಹನ ಮತ್ತು ಪತ್ರಿಕೋದ್ಯಮ: ಜರ್ನಲಿಸಂ ಅಥವಾ ಮಾಸ್‌ ಕಮ್ಯುನಿಕೇಷನ್‌ ಪದವಿ ಕೋರ್ಸ್‌ಗೆ ಸೇರಬಹುದು. ಅತ್ಯುತ್ತಮ ಸಂವಹನ ಕೌಶಲ ಇರುವವರು ಟೀವಿ ಇತ್ಯಾದಿ ಮಾಧ್ಯಮಗಳಲ್ಲಿ ಮಿಂಚಬಹುದು. ಬರವಣಿಗೆ ಕೌಶಲ ಇರುವವರು ಪತ್ರಿಕೋದ್ಯಮ ಆಯ್ಕೆ ಮಾಡಿಕೊಳ್ಳಬಹುದು. ಈ ಕೋರ್ಸ್‌ ಕಲಿತವರು ಪಬ್ಲಿಕ್‌ ರಿಲೇಷನ್ಸ್‌, ಜಾಹೀರಾತು, ಮಾರ್ಕೆಟಿಂಗ್‌ ಇತ್ಯಾದಿ ಕರಿಯರ್‌ಗಳನ್ನೂ ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.

ವೆಬ್‌/ಗ್ರಾಫಿಕ್‌ ಡಿಸೈನ್‌: ಇಂಟರ್‌ನೆಟ್‌ ಜಗತ್ತಿನಲ್ಲಿ ವೆಬ್‌ ಡಿಸೈನರ್‌ಗಳಿಗೆ ಸಾಕಷ್ಟು ಬೇಡಿಕೆಯಿದೆ. ಗ್ರಾಫಿಕ್‌ ವಿನ್ಯಾಸಗಾರರಿಗೂ ಬೇಡಿಕೆ ಉತ್ತಮವಿದೆ. ಹೀಗಾಗಿ, ಪಿಯುಸಿ ಬಳಿಕ ಇಂತಹ ವಿಷಯಗಳಿಗೆ ಸಂಬಂಧಪಟ್ಟ ಅಲ್ಪಾವಧಿ ಅಥವಾ ದೀರ್ಘಾವಧಿ ಕೋರ್ಸ್‌ಗಳಿಗೆ ಸೇರಬಹುದು.

ಫ್ಯಾಷನ್‌ ಡಿಸೈನ್‌: ಪಿಯುಸಿ ಬಳಿಕ ಬೇಡಿಕೆಯ ಕೋರ್ಸ್‌ಗಳಲ್ಲಿ ಫ್ಯಾಷನ್‌ ಡಿಸೈನ್‌ ಸಹ ಒಂದಾಗಿದೆ. ಫ್ಯಾಷನ್‌ ಮತ್ತು ಡಿಸೈನ್‌ ಇವೆರಡು ವಿಷಯಗಳಲ್ಲಿ ಆಸಕ್ತಿ ಉಳ್ಳವರು ಇದಕ್ಕೆ ಸಂಬಂಧಪಟ್ಟ ಕೋರ್ಸ್‌ ಮಾಡಬಹುದು. ಕೇವಲ ವಿನ್ಯಾಸದ ಆಸಕ್ತಿ ಮಾತ್ರ ಉಳ್ಳುವರು ಕ್ಯಾಡ್‌ ಇತ್ಯಾದಿ ಸಾಫ್ಟ್‌ವೇರ್‌ ಸಂಬಂಧಿತ ಕೋರ್ಸ್‌ಗಳನ್ನು ಮಾಡಬಹುದಾಗಿದೆ.

ಹಾಸ್ಪಿಟಲ್‌ ಮ್ಯಾನೇಜ್‌ಮೆಂಟ್‌: ಕೆಲವು ಕಾಲೇಜುಗಳು ಬಯಾಲಜಿ ವಿದ್ಯಾರ್ಥಿಗಳಿಗೆ ಮಾತ್ರ ಅವಕಾಶ ನೀಡಬಹುದು. ಆದರೆ, ಬಹುತೇಕ ಕಾಲೇಜುಗಳು ಪಿಯುಸಿಯಲ್ಲಿ ಯಾವುದೇ ವಿಷಯ ಓದಿದವರನ್ನೂ ನೇಮಿಸಿಕೊಳ್ಳುತ್ತವೆ. ಹಾಸ್ಪಿಟಲ್‌ ಮ್ಯಾನೇಜ್‌ಮೆಂಟ್‌ನಲ್ಲಿ ಹಲವು ಕ್ಷೇತ್ರಗಳಿವೆ. ಹಾಸ್ಪಿಟಲ್‌ ಅಡ್ಮಿನಿಸ್ಪ್ರೇಷನ್‌, ಪಬ್ಲಿಕ್‌ ಹೆಲ್ತ್‌ ಕಾಏರ್‌, ಹೆಲ್ತ್‌ ಕೇರ್‌ ಸವೀರ್‍ಸಸ್‌ ಪದವಿ, ಹಾಸ್ಪಿಟಲ್‌ ಮ್ಯಾನೇಜ್‌ಮೆಂಟ್‌ ಇತ್ಯಾದಿ ಕೋರ್ಸ್‌ಗಳಿಗೆ ಸೇರಬಹುದು.

ರಕ್ಷಣಾ ಸೇವೆಗಳು: ಪಿಯುಸಿ ಆರ್ಟ್ಸ್ ಓದಿರುವವರು ರಕ್ಷಣಾ ಇಲಾಖೆಯಲ್ಲಿ ಕಾರ್ಯನಿರ್ವಹಿಸುವಂತಹ ಕೋರ್ಸ್‌ಗಳನ್ನು ಮಾಡಬಹುದು. ಪದವಿಯಲ್ಲಿ ಬಿಇ/ಬಿಟೆಕ್‌ ಇತ್ಯಾದಿ, ಸ್ನಾತಕೋತ್ತರದಲ್ಲಿ ಎಂಬಿಎ, ಎಂಸಿಎ ಇತ್ಯಾದಿ ಕೋರ್ಸ್‌ ಕಲಿತೂ ರಕ್ಷಣಾ ಪಡೆಯಲ್ಲಿ ಅವಕಾಶ ಪಡೆಯಲು ಪ್ರಯತ್ನಿಸಬಹುದು. ಇಲ್ಲವಾದರೆ ರಕ್ಷಣಾ ಪಡೆಯು ನಡೆಸುವ ಎನ್‌ಡಿಎ ಪರೀಕ್ಷೆಗಳನ್ನೂ ಬರೆಯಬಹುದು. ಸಿಡಿಎಸ್‌ಇ ಹಾದಿ ಮೂಲಕವೂ ಭಾರತೀಯ ಸೇನೆಗೆ ಸೇರಬಹುದು.

ಕಾನೂನು ಪದವಿ: ಕಾನೂನು ವಿಷಯವನ್ನು ಅಧ್ಯಯನ ಮಾಡಲು ಬಯಸುವರು ಪಿಯುಸಿ ಬಳಿಕ ಎಲ್‌ಎಲ್‌ಬಿ ಅಥವಾ ಪದವಿ ಬಳಿಕದ ಎಲ್‌ಎಲ್‌ಬಿ ಕೋರ್ಸ್‌ ಮಾಡಬಹುದು. ಲಾಯರ್‌, ಜಡ್ಜ್‌, ಕಾನೂನು ತಜ್ಞರು ಇತ್ಯಾದಿ ಹಲವು ಕರಿಯರ್‌ಗಳನ್ನು ಪಡೆಯಲು ಕಾನೂನು ಪದವಿಯು ನೆರವಾಗುತ್ತದೆ.

ಇವೆಂಟ್‌ ಮ್ಯಾನೇಜ್‌ಮೆಂಟ್‌: ನಾಯಕತ್ವ, ಕಾರ್ಯಕ್ರಮ ಆಯೋಜನೆಯಂತಹ ಕೌಶಲ ಹೊಂದಿರುವವರು ಇವೆಂಟ್‌ ಮ್ಯಾನೇಜ್‌ಮೆಂಟ್‌ಗೆ ಸಂಬಂಧಪಟ್ಟ ಕೋರ್ಸ್‌ಗಳನ್ನು ಮಾಡಬಹುದಾಗಿದೆ. ಈಗ ಇವೆಂಟ್‌ ಮ್ಯಾನೇಜ್‌ಮೆಂಟ್‌ ಕ್ಷೇತ್ರದಲ್ಲಿ ಸಾಕಷ್ಟು ಉದ್ಯೋಗಗಳಿದ್ದು, ಉತ್ತಮ ವೇತನವೂ ದೊರಕುತ್ತದೆ. ಭವಿಷ್ಯದಲ್ಲಿ ನೀವೇ ಸ್ವಂತ ಇವೆಂಟ್‌ ಮ್ಯಾನೇಜ್‌ಮೆಂಟ್‌ ಕಂಪನಿಯನ್ನೂ ಸ್ಥಾಪಿಸಿ ಕೈ ತುಂಬಾ ಹಣ ಸಂಪಾದಿಸಬಹುದಾಗಿದೆ.

ಚಿತ್ರಕಲೆ: ಕಲೆಯಲ್ಲಿ ಆಸಕ್ತಿ ಉಳ್ಳುವರು ಚಿತ್ರಕಲೆ ಸಂಬಂಧಪಟ್ಟ ಕೋರ್ಸ್‌ಗಳಿಗೆ ಸೇರಬಹುದು. ಪೇಂಟಿಂಗ್‌ ಇತ್ಯಾದಿಗಳಲ್ಲಿ ನೀವು ಪರಿಣತಿ ಪಡೆದವರು ಇಂದು ಕೈ ತುಂಬಾ ಹಣ ಗಳಿಸುತ್ತಾರೆ. ಪ್ರತಿಭಾನ್ವಿತರು ಮಾತ್ರ ಈ ಕ್ಷೇತ್ರದಲ್ಲಿ ಅತ್ಯುತ್ತಮ ಕರಿಯರ್‌ ರೂಪಿಸಿಕೊಳ್ಳಬಹುದು.

ಬಿಎ: ಕಲಾ ಪದವಿ ಪಡೆದ ಬಳಿಕವೂ ಸಾಕಷ್ಟು ಉತ್ತಮ ಅವಕಾಶಗಳನ್ನು ಪಡೆಯಬಹುದು. ಬಳಿಕ ಸ್ನಾತಕೋತ್ತರ ಪದವಿಯನ್ನೂ ಮಾಡಬಹುದು. ಪದವಿ ಶಿಕ್ಷಣ ಪಡೆದರೆ ಬಹುತೇಕ ಕೇಂದ್ರ ಮತ್ತು ರಾಜ್ಯ ಸರಕಾರದ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಅರ್ಜಿ ಸಲ್ಲಿಸುವ ಅರ್ಹತೆಯೂ ದೊರಕುತ್ತದೆ.

ಹೋಟೆಲ್‌ ಮ್ಯಾನೇಜ್‌ಮೆಂಟ್‌: ಈಗ ಹೋಟೆಲ್‌ ಮ್ಯಾನೇಜ್‌ಮೆಂಟ್‌ ಬೇಡಿಕೆಯ ಕೋರ್ಸ್‌ ಆಗಿದ್ದು, ಕೋರ್ಸ್‌ ಕಲಿತ ಬಳಿಕ ದೇಶ-ವಿದೇಶಗಳಲ್ಲಿ ಉತ್ತಮ ಅವಕಾಶ ಪಡೆಯಬಹುದಾಗಿದೆ.

ಇನ್ನುಳಿದಂತೆ ಬಿಇಡಿ, ಬಿಪಿಎಡ್‌, ಬಿಎಸ್‌ಡಬ್ಲ್ಯು, ಏವಿಯೇಷನ್‌ ಕೋರ್ಸ್‌, ರಿಟೇಲ್‌ ಮ್ಯಾನೇಜ್‌ಮೆಂಟ್‌, ಪ್ರವಾಸೋದ್ಯಮ ಕೋರ್ಸ್‌ ಸೇರಿದಂತೆ ಹತ್ತು ಹಲವು ಕೋರ್ಸ್‌ಗಳನ್ನು ಮಾಡಬಹುದಾಗಿದೆ.