ಫ್ಲಿಪ್‌ಕಾರ್ಟ್‌, ಅಮೆಜಾನ್ ಉದ್ಯೋಗ ಭಾರತೀಯರಿಗೆ ಅಚ್ಚುಮೆಚ್ಚು

ಲಿಂಕ್ಡ್‌ಇನ್‌ ಕಂಪನಿಯ ವಾರ್ಷಿಕ ಅತ್ಯುತ್ತಮ ಉದ್ಯೋಗ ಸ್ಥಳ ಸಮೀಕ್ಷೆ ಪ್ರಕಟಗೊಂಡಿದ್ದು, ಭಾರತದ ಉದ್ಯೋಗಿಗಳಿಗೆ ಕೆಲಸ ಮಾಡಲು ಅಚ್ಚುಮೆಚ್ಚಿನ ಕಂಪನಿಯಾಗಿ ವಾಲ್‌ಮಾರ್ಟ್‌ ಮಾಲಿಕತ್ವದ ಫ್ಲಿಪ್‌ಕಾರ್ಟ್‌ ಹೊರಹೊಮ್ಮಿದೆ. ನಂತರದ ಎರಡನೇ ಮತ್ತು ಮೂರನೇ ಸ್ಥಾನಗಳನ್ನು ಕ್ರಮವಾಗಿ ಅಮೆಜಾನ್‌ ಮತ್ತು ಓಯೊ ಕಂಪನಿಗಳು ಪಡೆದಿವೆ.

ಲಿಂಕ್ಡ್‌ಇನ್‌ ಪಟ್ಟಿಯಲ್ಲಿ ಇ-ಕಾಮರ್ಸ್‌ ಕಂಪನಿಗಳು, ಫುಡ್‌ ಡೆಲಿವರಿ ಕಂಪನಿಗಳು, ಐಟಿ ಬಿಸ್ನೆಸ್‌ ಕಂಪನಿಗಳು ಅಗ್ರ ಸ್ಥಾನಗಳನ್ನು ಪಡೆದಿವೆ. ಸತತ ಮೂರನೇ ವರ್ಷವೂ ಅಗ್ರ 10ರ ಪಟ್ಟಿಯಲ್ಲಿ ಅಮೇಜಾನ್‌, ಪೇಟಿಎಂ, ಓಯೊ ಮತ್ತು ಆಲ್ಪಾಬೆಟ್‌ ಕಂಪನಿಗಳು ಸ್ಥಾನಪಡೆದಿವೆ. ಟಿಸಿಎಸ್‌ ಕಂಪನಿಯು ಅಗ್ರ 7ನೇ ಸ್ಥಾನದಲ್ಲಿದೆ. ಸ್ವಿಗಿ ಮತ್ತು ಝೊಮೆಟೊ ಕಂಪನಿಗಳು ಕ್ರಮವಾಗಿ 6ನೇ ಮತ್ತು 8ನೇ ಸ್ಥಾನ ಪಡೆದಿವೆ. ಉಬೆರ್‌ ಕಂಪನಿಯು 5ನೇ ಸ್ಥಾನದಲ್ಲಿದೆ. ಒನ್‌97 ಕಮ್ಯುನಿಕೇಷನ್ಸ್‌ ಕಂಪನಿಯು 4ನೇ ಸ್ಥಾನ ಪಡೆದಿದ್ದರೆ, ತೈಲ ಮತ್ತು ಎನರ್ಜಿ ಕಂಪನಿ ರಿಲಯೆನ್ಸ್‌ ಇಂಡಸ್ಟ್ರೀಸ್‌ ಅಗ್ರ 10ನೇ ಸ್ಥಾನದಲ್ಲಿದೆ.

ಈ ವರ್ಷ ಲಿಂಕ್ಡ್‌ಇನ್‌ ಪಟ್ಟಿಯಲ್ಲಿ ಅರ್ಧದಷ್ಟು ಕಂಪನಿಗಳು ಹೊಸ ಸೇರ್ಪಡೆಯಾಗಿದೆ. ಅಂದರೆ, ಹೊಸ ಕಂಪನಿಗಳು ಈ ಪಟ್ಟಿಗೆ ಸೇರಿವೆ ಎಂದು ಲಿಂಕ್ಡ್‌ಇನ್‌ ಇಂಡಿಯಾದ ಮ್ಯಾನೇಜಿಂಗ್‌ ಎಡಿಟರ್‌ ಅದಿತ್‌ ಚಾರ್ಲಿ ಮಾಹಿತಿ ನೀಡಿದ್ದಾರೆ.

ಕಳೆದ ವರ್ಷದ ರಾರ‍ಯಂಕಿಂಗ್‌ಗೆ ಹೋಲಿಸಿದರೆ ಆತಿಥ್ಯ ವಲಯದ ಕಂಪನಿಯಾದ ಓಯೊ 10ನೇ ಸ್ಥಾನದಿಂದ ಅಗ್ರ 3ನೇ ಸ್ಥಾನಕ್ಕೆ ತಲುಪಿದೆ. 'ಎಲ್‌ಆ್ಯಂಡ್‌ಟಿ ಮತ್ತು ರಿಲಯೆನ್ಸ್‌ ಇಂಡಸ್ಟ್ರೀಸ್‌ನಂತಹ ಭಾರತದ ಬೃಹತ್‌ ಬ್ಲೂಚಿಪ್‌ ಕಂಪನಿಗಳು ಉದ್ಯೋಗಿಗಳ ಆಕರ್ಷಣೆಯನ್ನು ಹೆಚ್ಚಿಸಿವೆ' ಎಂದು ಚಾರ್ಲಿ ಅಭಿಪ್ರಾಯಪಟ್ಟಿದ್ದಾರೆ.

ಲಿಂಕ್ಡ್‌ಇನ್‌ ಕಂಪನಿಯು ಉದ್ಯೋಗ ಬೇಡಿಕೆ, ಉದ್ಯೋಗಿಗಳ ರಿಟೆನ್ಷನ್‌ ದರ ಸೇರಿದಂತೆ ಹಲವು ಡೇಟಾಗಳ ಆಧಾರದಲ್ಲಿ ಈ ಸಮೀಕ್ಷೆ ಕೈಗೊಂಡಿದೆ. ಭಾರತದಲ್ಲಿ ಲಿಂಕ್ಡ್‌ಇನ್‌ ಸುಮಾರು 5.4 ಕೋಟಿ ಬಳಕೆದಾರರನ್ನು ಹೊಂದಿದೆ.

ಅಗ್ರ 25 ಸ್ಥಾನ ಪಡೆದ ಕಂಪನಿಗಳು
1. ಫ್ಲಿಪ್‌ಕಾರ್ಟ್‌, 2.ಅಮೆಜಾನ್‌ , 3.ಓಯೊ, 4. ಒನ್‌97 ಕಮ್ಯುನಿಕೇಷನ್ಸ್‌, 5. ಉಬೆರ್‌, 6. ಸ್ವಿಗಿ, 7. ಟಿಸಿಎಸ್‌, 8. ಝೊಮಟೊ, 9. ಆಲ್ಪಾಬೆಟ್‌ , 10. ರಿಲಯೆನ್ಸ್‌ ಇಂಡಸ್ಟ್ರೀಸ್‌ 11. ಇವೈ, 12. ಅಡೋಬ್‌, 13. ಬೊಸ್ಟನ್‌ ಕನ್ಸಲ್ಟಿಂಗ್‌ ಗ್ರೂಪ್‌, 14. ಯೆಸ್‌ ಬ್ಯಾಂಕ್‌, 15. ಐಬಿಎಂ, 16. ಡೈಮ್ಲಾರ್‌ ಏಜಿ, 17. ಫ್ರೆಷ್‌ ವರ್ಕ್ಸ್‌, 18. ಅಸೆಂಚರ್‌, 19. ಓಲಾ, 20. ಐಸಿಐಸಿಐ ಬ್ಯಾಂಕ್‌, 21. ಪಿಡಬ್ಲ್ಯುಸಿ ಇಂಡಿಯಾ, 22. ಕೆಪಿಎಂಜಿ ಇಂಡಿಯಾ 23. ಲಾರ್ಸೆನ್‌ ಆಂಡ್‌ ಟೊಬ್ರೊ, 24. ಅರೆಕಲ್‌, 25. ಕ್ವಾಲ್‌ಕಂ.