ಕ್ಯಾಪ್ಟಿವ್‌ ಘಟಕಗಳಿಂದ 1.5 ಲಕ್ಷ ಉದ್ಯೋಗ

ಮುಂದಿನ ಎರಡು ವರ್ಷಗಳಲ್ಲಿ ಜಾಗತಿಕ ಐಟಿ ಸಂಸ್ಥೆಗಳ ಕ್ಯಾಪ್ಟಿವ್‌ ಯೂನಿಟ್‌ಗಳು (ವ್ಯವಹಾರ ಘಟಕಗಳು) 1.5 ಲಕ್ಷ ಜನರಿಗೆ ಉದ್ಯೋಗ ನೀಡಲಿವೆ ಎಂದು ಸಾಫ್ಟ್‌ವೇರ್‌ ಮತ್ತು ಸೇವಾ ಕಂಪನಿಗಳ ಒಕ್ಕೂಟ ನಾಸ್ಕಾಂ ತಿಳಿಸಿದೆ. ಭಾರತದ ಡಿಜಿಟಲ್‌ ಲ್ಯಾಂಡ್‌ಸ್ಕೇಪ್‌ನಲ್ಲಿ ವಿದೇಶಿ ಕಂಪನಿಗಳು ಘಟಕಗಳನ್ನು ಸ್ಥಾಪಿಸಲು ಮತ್ತು ವಿಸ್ತರಿಸಲು ಆದ್ಯತೆ ನೀಡುತ್ತಿದ್ದು, ಹೆಚ್ಚಿನ ಉದ್ಯೋಗ ಸೃಷ್ಟಿಯ ನಿರೀಕ್ಷೆಯಿದೆ ಎಂದು ನಾಸ್ಕಾಂ ಹೇಳಿದೆ.

ಭಾರತದಲ್ಲಿ 1,200ಕ್ಕೂ ಹೆಚ್ಚು ಟೆಕ್‌ ಆಧರಿತ ಜಾಗತಿಕ ಇನ್‌ಹೌಸ್‌ ಸೆಂಟರ್‌ಗಳು (ಜಿಐಸಿಗಳು) ಇವೆ. ಅಂದರೆ, ಬಹುತೇಕ ಕಂಪನಿಗಳು ಭಾರತದಲ್ಲಿ ತಮ್ಮ ವ್ಯವಹಾರ ಘಟಕಗಳನ್ನು ಸ್ಥಾಪಿಸಿ, ತಮ್ಮ ಪೋಷಕ ಕಂಪನಿಗಳಿಂದ ಪ್ರತ್ಯೇಕವಾಗಿ ವ್ಯವಹಾರ ನಡೆಸುತ್ತಿವೆ. ಟೆಕ್ಸಾಸ್‌ ಇನ್‌ಸ್ಟ್ರುಮೆಂಟ್ಸ್‌, ಇಂಟೆಲ್‌, ಎಎಂಡಿ ಮತ್ತು ಕ್ವಾಲ್‌ಕಂನಂತಹ ಚಿಪ್‌ ತಯಾರಿಕಾ ಕಂಪನಿಗಳೂ ಇವುಗಳಲ್ಲಿ ಒಳಗೊಂಡಿವೆ.

'ಜಿಐಸಿಗಳು ತಮ್ಮ ಪೋಷಕ ಉದ್ದಿಮೆಗಳ ಮೂಲಕ ಭಾರತದಲ್ಲಿ ಸದೃಢವಾದ ಅಸ್ತಿತ್ವ ಸ್ಥಾಪಿಸಿಕೊಂಡಿವೆ ಮತ್ತು ಇನ್ನಷ್ಟು ಅನ್ವೇಷಣೆಗೆ ಮುಂದಾಗುತ್ತಿವೆ' ಎಂದು ಸಿಬ್ಬಂದಿ ಕಂಪನಿ ಟೀಮ್‌ಲೀಸ್‌ನ ಸಹ-ಸ್ಥಾಪಕರಾದ ರಿತುಪರ್ಣ ಚಕ್ರವರ್ತಿ ಅಭಿಪ್ರಾಯಪಡುತ್ತಾರೆ. 'ವ್ಯವಹಾರ ಪ್ರಗತಿ ಮತ್ತು ಉದ್ಯೋಗ ಪ್ರಗತಿಯೂ ಒಂದೇ ಮಟ್ಟದಲ್ಲಿದ್ದು, ಮುಂದಿನ ದಿನಗಳಲ್ಲಿ ಇನ್ನಷ್ಟು ನೇಮಕ ನಿರೀಕ್ಷಿಸಬಹುದಾಗಿದೆ' ಎಂದು ಅವರು ಹೇಳುತ್ತಾರೆ.

ಕಳೆದ 3ರಿಂದ 4 ವರ್ಷಗಳಲ್ಲಿ ಜಿಐಸಿಗಳ ಕೊಡುಗೆ ಗಮನಾರ್ಹವಾಗಿ ಏರಿಕೆ ಕಂಡಿದೆ ಎಂದು ನಾಸ್ಕಾಂ ಹೇಳಿದೆ. 2015ರ ಆರ್ಥಿಕ ವರ್ಷದಲ್ಲಿ ಜಿಐಸಿ ಮಾರುಕಟ್ಟೆ ಗಾತ್ರ ಸುಮಾರು 19.4 ಶತಕೋಟಿ ಡಾಲರ್‌ ಇತ್ತು. ಇತ್ತೀಚೆಗೆ ಕೊನೆಗೊಂಡ ಆರ್ಥಿಕ ವರ್ಷದಲ್ಲಿ ಈ ಮಾರುಕಟ್ಟೆಯು ಸುಮಾರು 28.3 ಶತಕೋಟಿ ಡಾಲರ್‌ಗೆ ತಲುಪಿದೆ ಎಂದು ನಾಸ್ಕಾಂ ಹೇಳಿದೆ. ಇದೇ ಸಮಯದಲ್ಲಿ ಜಿಐಸಿಗಳು ನೇಮಕ ಮಾಡಿರುವ ಪ್ರತಿಭಾನ್ವಿತರ ಸಂಖ್ಯೆ 2015ರಲ್ಲಿ ಸುಮಾರು 7.45 ಲಕ್ಷ ಇತ್ತು. 2019ರಲ್ಲಿ ಇದು ಒಂದು ದಶಲಕ್ಷ ದಾಟಿದೆ ಎಂದು ನಾಸ್ಕಾಂ ಮಾಹಿತಿ ನೀಡಿದೆ. ಉದ್ಯೋಗ ಪ್ರಗತಿಯು ಅಂದಾಜು ಶೇಕಡ 14ರಷ್ಟು ಇದೆ ಎಂದು ಚಕ್ರವರ್ತಿ ಹೇಳುತ್ತಾರೆ. 'ಇಷ್ಟು ಮಾತ್ರವಲ್ಲದೆ, ಬಹುತೇಕ ಎಲ್ಲಾ ವಲಯಗಳಲ್ಲಿಯೂ ಡಿಜಿಟಲ್‌ ಪ್ರತಿಭಾನ್ವಿತರಿಗೆ ಕಳೆದ ಕೆಲವು ವರ್ಷಗಳಿಂದ ಬೇಡಿಕೆ ಹೆಚ್ಚಾಗಿದೆ' ಎಂದು ನಾಸ್ಕಾಂನ ಹಿರಿಯ ಎಕ್ಸಿಕ್ಯುಟಿವ್‌ವೊಬ್ಬರು ಅಭಿಪ್ರಾಯಪಡುತ್ತಾರೆ.

ಬೆಂಗಳೂರಿಗೆ ಅಗ್ರಸ್ಥಾನ: ಭಾರತದಲ್ಲಿರುವ ಜಿಐಸಿಗಳಲ್ಲಿ ಬೆಂಗಳೂರು ಅಗ್ರ ಸ್ಥಾನದಲ್ಲಿದೆ. ಒಟ್ಟು ಜಿಐಸಿಗಳಲ್ಲಿ ಶೇಕಡ 50ರಷ್ಟು ಪಾಲು ಬೆಂಗಳೂರಿನಲ್ಲಿದೆ. ಜಿಐಸಿಗಳು ಮರುಕೌಶಲ ಮತ್ತು ಕೌಶಲವೃದ್ಧಿಯ ಕಡೆಗೂ ಗಮನ ನೀಡುತ್ತಿದ್ದು, ಭವಿಷ್ಯದಲ್ಲಿ ಬೇಡಿಕೆ ಉಂಟಾಗುವ ಕೌಶಲಗಳನ್ನು ತಮ್ಮ ಸಿಬ್ಬಂದಿಗಳಿಗೆ ಕಲಿಸಿಕೊಡುತ್ತಿವೆ ಎಂದು ರಿತುಪರ್ಣ ಮಾಹಿತಿ ನೀಡಿದ್ದಾರೆ.