ರಾಜ್ಯಕ್ಕೆ ಭ್ರಷ್ಟಾಚಾರದಲ್ಲಿ ಮೊದಲ ಸ್ಥಾನ: ಬಿಎಸ್‌ವೈ

ಬೆಂಗಳೂರು: ಸಿದ್ದರಾಮಯ್ಯ ಸರಕಾರ ಅಧಿಕಾರಕ್ಕೆ ಬಂದು ನಾಲ್ಕು ವರ್ಷ ಮುಗಿದು ಐದನೇ ವರ್ಷಕ್ಕೆ ಕಾಲಿಟ್ಟಿದೆ, ಈ ನಾಲ್ಕು ವರ್ಷಗಳಲ್ಲಿ ರಾಜ್ಯ ಭ್ರಷ್ಟಾಚಾರದಲ್ಲಿ ಮೊದಲನೇ ಸ್ಥಾನ ಪಡೆದಿದೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಯಡಿಯೂರಪ್ಪ ಹೇಳಿದ್ದಾರೆ.

ಕಾನೂನು ಸುವ್ಯವಸ್ಥೆ ಹದಗೆಟ್ಟಿರುವುದರಲ್ಲಿ ರಾಜ್ಯಕ್ಕೆ ಎರಡನೇ ಸ್ಥಾನ. ಇದೇ ಈ ಸರಕಾರದ ದೊಡ್ಡ ಸಾಧನೆ. ಸರಕಾರವು ಕರ್ನಾಟಕದ ಜನರು ತಲೆತಗ್ಗಿಸುವಂತೆ ಮಾಡಿದೆ ಎಂದರು.

ಪ್ರಾಮಾಣಿಕ ಅಧಿಕಾರಿಗಳು ಕೆಲಸ ಮಾಡಲಾಗದ ಉಸಿರು ಕಟ್ಟಿಸುವ ಸ್ಥಿತಿ ರಾಜ್ಯದಲ್ಲಿದೆ. ಡಿ.ಕೆ.‌ರವಿ, ಅನುರಾಗ್ ತಿವಾರಿ ಇಂತಹ ಅಧಿಕಾರಿಗಳ ಸಾವು, ಐಎಎಸ್ ಅಧಿಕಾರಿಗಳಾದ ರಶ್ಮಿ, ಮಥಾಯ್ ಅವರಿಗೆ ಕಿರುಕುಳ, ಅನ್ನಭಾಗ್ಯ ಯೋಜನೆಯ ಅಕ್ಕಿ‌ ದುರ್ಬಳಕೆ, ಭ್ರಷ್ಟಾಚಾರ ತಾಂಡವವಾಡುತ್ತಿದೆ ಎಂದರು.

1335 ಕೋಟಿಗೂ ಹೆಚ್ಚು ಗ್ರಾಮೀಣಾಭಿವೃದ್ಧಿ ಇಲಾಖೆಯ ಹಣ ಅಧಿಕಾರಿಗಳ ವೈಯಕ್ತಿಕ ಖಾತೆಯಲ್ಲಿ ಇಟ್ಟುಕೊಂಡಿದ್ದಾರೆ. ಕೃಷ್ಣಾ ಯೋಜನೆಗೆ ಪ್ರತಿ ವರ್ಷ ಹತ್ತು ಸಾವಿರ ಕೋಟಿ ರೂ. ಖರ್ಚು ಮಾಡುವುದಾಗಿ ಹೇಳಿ ಆ ಭಾಗದ ಜನರಿಗೆ ಈ ಸರಕಾರ ಮೋಸ ಮಾಡಿದೆ. ಗೋಹತ್ಯೆ ನಿಷೇಧ ಜಾರಿಗೆ ತರುವ ಹಿನ್ನಲೆಯಲ್ಲಿ ಪ್ರಧಾನಮಂತ್ರಿ ಮುಂದಿಟ್ಟಿರುವ ದಿಟ್ಟ ಹೆಜ್ಜೆ ಸ್ವಾಗತಾರ್ಹ. ಮೋದಿಯವರ ಸಾಧನೆ ನಮಗೆ ಮುಂದಿನ ಚುನಾವಣೆಯಲ್ಲಿ ದೊಡ್ಡ ಶಕ್ತಿ ನೀಡಲಿದೆ. ಈ ಸರಕಾರದ ವೈಫಲ್ಯವೂ ನಮಗೆ ಉಪಯುಕ್ತ ಆಗಲಿದೆ ಎಂದು ಬಿಎಸ್‌ವೈ ಹೇಳಿದರು.

'ನಾನು ಈ ಹಿಂದೆ ರಾಜ್ಯದ ಹಣಕಾಸು ಸ್ಥಿತಿಗತಿ ಇಲ್ಲದಿದ್ದಾಗ ಸಾಲ ಮನ್ನಾ ಮಾಡಲು ಸಾಧ್ಯವಿಲ್ಲ ಎಂದಿದ್ದು ನಿಜ, ಆದರೆ ನಂತರ ಸಾಲ‌ಮನ್ನಾ ಮಾಡಿದ್ದು ನಾನೇ ,' ಎಂದರು. ಸುಪ್ರೀಂಕೋರ್ಟ್ ಆದೇಶದ ಮೇಲೆ ಕುಮಾರಸ್ವಾಮಿ ಅವರ ತನಿಖೆ ನಡೆಯುತ್ತಿದೆ. ಗಣಿಗಾರಿಕೆಯ ಮೇಲೆ ನಾನು ಈಗಾಗಲೇ ಪುಸ್ತಕ ಮಾಡಿ ಹಂಚಿದ್ದೇನೆ,ಮತ್ತೆ ಪುಸ್ತಕ ಹಂಚುವ ಅಗತ್ಯವಿಲ್ಲ ಎಂದು ಹೇಳಿದರು. ಯಡಿಯೂರಪ್ಪ ಅವರ ಪತ್ರಿಕಾ ಸಂವಾದದ ವೇಳೆ ವಿದ್ಯುತ್‌ ಕೈ ಕೊಟ್ಟಿತ್ತು.