ಕೆಚ್ಚಲನ್ನು ಹೇಗೆ ಪರೀಕ್ಷೆ ಮಾಡಬೇಕು?

ಹೈನುರಾಸಿನ ಕೆಚ್ಚಲು ಪೂರ್ಣಕುಂಭ ಕಲಶವಿದ್ದ ಹಾಗೆ. ಹಾಲು ಉತ್ಪಾದನೆ ಯಲ್ಲಿಕೆಚ್ಚಲಿಗೆ ವಿಶೇಷ ಮಹತ್ವವಿದೆ. ಅದು ಹಲವಾರು ಕಾರ್ಯ ಚಟುವಟಿಕೆಗಳ ಪ್ರಮುಖ ಭಾಗ. ರಾಸುಗಳನ್ನು ಮುಖ್ಯವಾಗಿ ಹಾಲಿನ ಉತ್ಪಾದನೆಯ ಸಾಮರ್ಥ್ಯದ ಮೇಲೆ ಆಯ್ಕೆ ಮಾಡುವುದರಿಂದ ಕೆಚ್ಚಲಿನ ರಚನೆ ಸರಿಯಾಗಿರಬೇಕು. ಕೆಚ್ಚಲಿನ ಯಾವುದಾದರೂ ಒಂದು ಮೊಲೆ ರೋಗಪೀಡಿತವಾಗಿ ಹಾಲು ಉತ್ಪಾದನೆ ಕಡಿಮೆಯಿದ್ದರೆ ಆ ರಾಸಿಗೆ ನಿರೀಕ್ಷೆಯ ದರ ಸಿಗಲಾರದು. ಆದ್ದರಿಂದ ಪ್ರತಿಯೊಬ್ಬ ಹೈನುಗಾರ ಮತ್ತು ಹೈನುಗಾರಿಕೆ ಉದ್ಯೋಗದಲ್ಲಿನಿರತರಾಗಿ­ರುವ ಕಾರ್ಮಿಕ ವರ್ಗದವರೂ ರಾಸಿನ ಕೆಚ್ಚಲಿನ ಆರೋಗ್ಯ ರಕ್ಷಣೆಯ ಬಗ್ಗೆ ವಿಶೇಷ ಮುತುವರ್ಜಿ ವಹಿಸಬೇಕು.

ಆರೋಗ್ಯವಂತ ಕೆಚ್ಚಲು: ರಾಸಿನ ಕೆಚ್ಚಲಿನ ಆಕಾರ ಮತ್ತು ಗಾತ್ರ ಮುಖ್ಯವಾಗಿ ಗಮನಿಸಬೇಕಾದ ವಿಷಯ. ಕೆಲವೊಂದು ರಾಸುಗಳಲ್ಲಿಬಾಹ್ಯ ನೋಟಕ್ಕೆ ಕೆಚ್ಚಲು ದೊಡ್ಡದಾಗಿ ಕಂಡರೂ ಹಾಲು ಉತ್ಪಾದನೆ ಕಡಿಮೆಯಿರುತ್ತದೆ. ರಾಸಿನ ಕೆಚ್ಚಲಿನ ಗಾತ್ರಕ್ಕೆ ಅನುಗುಣವಾಗಿ ಹಾಲು ಉತ್ಪಾದನೆಯಾಗುವುದಿಲ್ಲ. ಕೆಚ್ಚಲಿನಲ್ಲಿಹಾಲು ಉತ್ಪಾದಿಸುವ ಹಾಲಿನ ಗ್ರಂಥಿಗಳ ಸಂಖ್ಯೆ ಹೆಚ್ಚಿದ್ದರೆ ಮಾತ್ರ ಹೆಚ್ಚು ಹಾಲು ಉತ್ಪಾದನೆ ಸಾಧ್ಯವಾಗುತ್ತದೆ. ಅದು ಬಾಹ್ಯ ನೋಟಕ್ಕೆ ಗೊತ್ತಾಗುವುದಿಲ್ಲ.

ಉತ್ತಮ ಕೆಚ್ಚಲಿನ ಲಕ್ಷಣಗಳು

- ರಾಸಿನ ನಾಲ್ಕೂ ಮೊಲೆಗಳು ಪೂರ್ಣ ಪ್ರಮಾಣದಲ್ಲಿಕಾರ್ಯ ಚಟುವಟಿಕೆಯಿಂದ ಕೂಡಿರಬೇಕು. ನಾಲ್ಕೂ ಮೊಲೆಗಳಲ್ಲಿಸಮ ಪ್ರಮಾಣದಲ್ಲಿಹಾಲು ಉತ್ಪಾದನೆಯಾಗುತ್ತಿರಬೇಕು.

- ಮೊಲೆಗಳು ಒಂದಕ್ಕೊಂದು ಸಮಾನ ಅಂತರದಲ್ಲಿರಬೇಕು ಮತ್ತು ಮೊಲೆಗಳು ನೇರವಾಗಿದ್ದು, ಉದ್ದವಿರಬೇಕು.

- ಕೆಚ್ಚಲಿನ ಹಿಂದಿನ ಭಾಗ ಹಿಂದಿನ ಕಾಲಿನ ನೇರಕ್ಕೆ ಇರಬೇಕು.

- ಕೆಚ್ಚಲಿನ ಭಾಗ ರಾಸಿನ ದೇಹಕ್ಕೆ ಅಂಟಿ ಕೊಂಡ ಸ್ಥಿತಿಯಲ್ಲಿರಬೇಕು. ದೇಹದಿಂದ ಜೋತಾಡುವಂತಿರಬಾರದು.

- ರಾಸಿನ ಮೊಲೆಗಳ ಗಾತ್ರ ಸಮಾನವಾಗಿದ್ದು, ಹಾಲಿನ ಧಾರೆ ದಪ್ಪವಾಗಿದ್ದು ಸಿಂಪರಣೆಯಾಗುವಂತಿರಬಾರದು.

- ಮೊಲೆಗಳ ನಾಲ್ಕೂ ತೊಟ್ಟುಗಳ ಗಾತ್ರ, ಉದ್ದ, ಹಾಗೂ ಅಂತರ ಸಮಾನವಾಗಿರಬೇಕು.

- ನಾಲ್ಕೂ ಮೊಲೆಗಳ ಹಾಲನ್ನು ಸುಲಭವಾದ ಕೆಚ್ಚಲು ಬಾವಿನ ಪರೀಕ್ಷೆಯಿಂದ ಪರೀಕ್ಷೆ ಮಾಡಿ ಮಂದ ರೂಪದ ಕೆಚ್ಚಲು ಬಾವು ಇದ್ದರೆ ಪತ್ತೆ ಹಚ್ಚಿಕೊಳ್ಳಬೇಕು.

- ಕೆಚ್ಚಲಿನ ರಕ್ತಸಂಚಾರಕ್ಕೆ ಹೊಟ್ಟೆಯ ಅಡಿಭಾಗದಲ್ಲಿತುಂಬಾ ರಕ್ತನಾಳಗಳಿರಬೇಕು. ಮತ್ತು ಕೆಚ್ಚಲಿನ ಎರಡೂ ಭಾಗದಲ್ಲಿರಕ್ತನಾಳಗಳು ದಪ್ಪವಾಗಿ ಉಬ್ಬಿಕೊಂಡು ಅಂಕುಡೊಂಕಾಗಿ ಉದ್ದವಿದ್ದು, ಸರಿಯಾಗಿ ಗೋಚರವಾಗಬೇಕು. ಈ ರಕ್ತನಾಳಗಳು ದಪ್ಪಕ್ಕಿಂತ, ಹೊಳಪಾಗಿ ಅಂಕುಡೊಂಕಾಗಿದ್ದರೆ ಮತ್ತು ಕೆಚ್ಚಲಿನ ಬುಡದವರೆಗೆ ಈ ಅಂಕುಡೊಂಡು ಇದ್ದರೆ ಹೆಚ್ಚು ಹಾಲು ನಿರೀಕ್ಷೆ ಮಾಡಬಹುದು. ರಾಸಿಗೆ ಕರಾವುಗಳ ಸಂಖ್ಯೆ ಜಾಸ್ತಿಯಾದ ಹಾಗೆ ರಕ್ತನಾಳಗಳ ದಪ್ಪ ಜಾಸ್ತಿಯಾಗುವುದು.

- ಅತಿ ಕಡಿಮೆ ಅವಧಿಯಲ್ಲಿಹಾಲು ಇಳಿಸಬೇಕು ಮತ್ತು ಪೂರ್ಣ ಪ್ರಮಾಣದಲ್ಲಿಹಾಲು ನೀಡಬೇಕು.

- ರಾಸಿನ ಮೊಲೆಗಳು ನೆಲಮಟ್ಟದಿಂದ ಕನಿಷ್ಠ ಪಕ್ಷ 15-18 ಇಂಚು ಎತ್ತರದಲ್ಲಿರಬೇಕು. ಅಂದರೆ ಮೊಣಕಾಲು ಗಂಟಿನ ಸಮತಳಕ್ಕಿಂತ ಎತ್ತರವಿರಬೇಕು.

- ರಾಸಿನ ದೇಹವು ಮುಂಭಾಗಕ್ಕಿಂತ ಕೆಚ್ಚಲಿನ (ದೇಹದ ಹಿಂಭಾಗ) ಭಾಗ ದೊಡ್ಡದಾಗಿರಬೇಕು.

ಹೈನುರಾಸಿನ ಆಯ್ಕೆ ಕ್ರಮವೇನಾದರೂ ಇದೆಯೇ?

ಇದೆ. ಆದರೆ ಹೈನು ರಾಸಿನ ಆಯ್ಕೆ ಸಂದರ್ಭದಲ್ಲಿಅವಸರಕ್ಕೆ ಆಸ್ಪದವಿಲ್ಲ. ತಾಳ್ಮೆಯಿಂದ ಕೂಲಂಕಷವಾಗಿ ಪರಿಶೀಲಿಸಬೇಕು. ಹಾಲಿನ ಇಳುವರಿಯೊಂದಿಗೆ ರಾಸಿನ ಸ್ವಭಾವ, ಲಕ್ಷಣಗಳು, ಆರೋಗ್ಯ, ವಯಸ್ಸು, ಕರುಗಳ ಸಂಖ್ಯೆ, ಕರಾವಿನ ಅವಧಿ ಮುಂತಾದವು­ಗಳನ್ನೂ ಪರಿಗಣಿಸಬೇಕು.ಆಯ್ಕೆಯಲ್ಲಿಎಡದರೆ ಮುಂದೆ ಕಷ್ಟ ನಷ್ಟ ಖಂಡಿತ.