ಮಾವು ಬೆಳೆಗಾರರೇ ಇತ್ತ ಗಮನಿಸಿ, ಮಾವನ್ನು ಹಣ್ಣು ಮಾಡುವಾಗ ಈ ವಿಧಾನ ಅನುಸರಿಸಿ

ಬೆಂಗಳೂರು: ಈಗ ಮಾವಿನ ಸೀಸನ್‌ ಪ್ರಾರಂಭವಾಗಿದ್ದು, ಮಾವು ಬೆಳೆಯುವ ರೈತರಿಗೆ ತಜ್ಞರು ಒಂದಿಷ್ಟು ಸಲಹೆಗಳನ್ನು ನೀಡಿದ್ದಾರೆ. ಮಾವನ್ನು ಹಣ್ಣು ಮಾಡುವುದಕ್ಕಾಗಿ ಕೆಲವು ಮಾರ್ಗಸೂಚಿಗಳನ್ನು ಅನುಸರಿಸಬೇಕು ಎಂದು ಹಾಪ್‌ಕಾಮ್ಸ್‌ನ ವ್ಯವಸ್ಥಾಪಕ ಮಹೇಶ್‌.ಬಿ ಹೇಳಿದ್ದಾರೆ.

ರೈತರು ತಾವು ಬೆಳೆದಿರುವ ಮಾವಿನ ಕಾಯಿಯನ್ನು ಹಣ್ಣು ಮಾಡಬೇಕಾದರೆ ಕಟಾವಿಗೆ ಬಂದಿರುವ ಮಾವನ್ನು ಒಂದು ಇಂಚು ತೊಟ್ಟು ಇರುವಂತೆ ಕಟಾವು ಮಾಡಿ ಪ್ಲಾಸ್ಟಿಕ್ ಕ್ರೇಟ್‌ನಲ್ಲಿ ಪ್ರತಿ ಹಂತದಲ್ಲೂ ಪೇಪರ್ ಹಾಕಿ ಕೋಳಿ ಮೊಟ್ಟೆಯ ರೀತಿ ಜೋಡಿಸಬೇಕು. ನಂತರ ಕಟಾವು ಮಾಡಿದ ಒಂದು ದಿನ ಬಿಟ್ಟು ವಾಡೆ ಹಾಕಬೇಕು.

ವಾಡೆ ಹಾಕುವಾಗ ಕ್ರೇಟ್‌ನಿಂದ ಕ್ರೇಟ್‌ಗೆ ಅರ್ಧ ಅಡಿ ಜಾಗ ಬಿಟ್ಟು 5 ರಿಂದ 6 ಕ್ರೇಟ್ ಎತ್ತರಕ್ಕೆ ಜೋಡಿಸಿ ಕ್ರೇಟ್‌ಗಳ ಮಧ್ಯೆ ಸಣ್ಣ ಪ್ಲಾಸ್ಟಿಕ್ ಟಬ್ ಗಳಲ್ಲಿ 300 ಮಿ.ಲೀ. ನೀರು ಹಾಕಿ, ಅದಕ್ಕೆ 10 ಮಿ.ಲೀ. ಎಥಿಲಿನ್ ದ್ರಾವಣ ಹಾಕಿ, ನಂತರ 10 ಗ್ರಾಂನಷ್ಟು ಸೋಡಿಯಂ ಹಾಕಿ. 1 ಟನ್ ಸಾಮರ್ಥ್ಯದ ಮಾವಿಗೆ ಅಂದರೆ 50 ಕ್ರೇಟ್‌ಗೆ ಸುಮಾರು 10 ಪ್ಲಾಸ್ಟಿಕ್ ಟಬ್ ಗಳನ್ನು ಇಡಬೇಕು.

ಕೃಷಿಕರಿಗೆ ಮಾದರಿಯಾದ ಮಾದೇವಕ್ಕ

ನಂತರ ಬಟ್ಟೆಯ ಟಾರ್ಪಲ್‌ನ್ನು ಗಾಳಿಯಾಡದಂತೆ ಭದ್ರವಾಗಿ ಮುಚ್ಚಬೇಕು. ಭತ್ತದ ಹುಲ್ಲು ಇದ್ದರೆ ಟಾರ್ಪಲಿನ್ ಮೇಲೆ ಹಾಕಿ. ಈ ರೀತಿ ಮಾಡಿದ 48 ಅಥವಾ 60 ಗಂಟೆಯ ನಂತರ ವಾಡೆ ತೆಗೆದು ಗಾಳಿಗೆ ತೆರೆದಿಡಬೇಕು. ನಂತರ ಮಾವು ಬಣ್ಣ ಬಂದಿರುತ್ತದೆ. ಆಗ ಮಾರಾಟದ ವ್ಯವಸ್ಥೆ ಮಾಡಬಹುದು. ಇದೇ ವಿಧಾನವನ್ನು ಹಾಪ್‌ಕಾಮ್ಸ್‌ನಲ್ಲಿ ಬಳಸಲಾಗುತ್ತಿದೆ ಎಂದು ಹಾಪ್‌ಕಾಮ್ಸ್‌ ವ್ಯವಸ್ಥಾಪಕ ಮಹೇಶ್‌.ಬಿ ಹೇಳಿದ್ದಾರೆ.

ನಿಂತ ಮಳೆ ನೀರೇ ಬೇಸಾಯಕ್ಕೆ ಆಸರೆ

ದಯವಿಟ್ಟು ಯಾವುದೇ ಕಾರಣಕ್ಕೂ ಕಾರ್ಬೈಡ್‌ ಬಳಸಬಾರದು. ಹಣ್ಣಿನ ಆರೋಗ್ಯವನ್ನು ಕಾಪಾಡಿ ಎಂದು ಕೇಳಿರುವ ಅವರು ಹೆಚ್ಚಿನ ಮಾಹಿತಿಗೆ ಹತ್ತಿರದ ತೋಟಗಾರಿಕೆ ಇಲಾಖೆಯನ್ನು ಸಂಪರ್ಕಿಸಿ ಎಂದು ಅವರು ಹೇಳಿದ್ದಾರೆ.

ಶ್ರೀಗಂಧದ ತೋಟದಲ್ಲಿ ಉಪ ಬೆಳೆಗಳ ವರಮಾನ