ಶಿಕ್ಷಣಕ್ಕೆ ನೆರವು ನೀಡುವ ಆ್ಯಪ್‌ಗಳು

ಈಗಂತೂ ಸ್ಮಾರ್ಟ್‌ಫೋನ್‌ ಯುಗ. ಮಕ್ಕಳಿಗೆ ಅದರ ಬಳಕೆಯೆಂದರೆ ಅಂಗೈನಲ್ಲಿನ ನೆಲ್ಲಿಕಾಯಿಯಂತೆ ಎಂದರೆ ಅತಿಶಯೋಕ್ತಿ ಅಲ್ಲ. ಶಿಕ್ಷಣವೆಂಬ ಮಹತ್ವದ ಘಟ್ಟದಲ್ಲಿ ಅದನ್ನು ಸದುಪಯೋಗ ಪಡಿಸಿಕೊಂಡರೆ ಮುಂದೆ ಉಜ್ವಲ ಭವಿಷ್ಯ ರೂಪಿಸಿಕೊಳ್ಳಬಹುದು.

ಸ್ಮಾರ್ಟ್‌ಫೋನ್‌ ಯುಗದಲ್ಲಿ ಗೂಗಲ್‌ ಪ್ಲೇ ಸ್ಟೋರ್‌ಗೆ ಹೋದರೆ ರಾಶಿ ರಾಶಿ ಆ್ಯಪ್‌ಗಳು ಸಿಗುತ್ತವೆ. ಇವುಗಳಲ್ಲಿ ಕೆಲವೊಂದು ಅಪ್ಲಿಕೇಶನ್‌ಗಳು ಖಚಿತವಾಗಿಯೂ ವಿದ್ಯಾರ್ಥಿಗಳಿಗೆ ತಮ್ಮ ಜ್ಞಾನ ವೃದ್ಧಿಸಿಕೊಳ್ಳಲು ನೆರವಾಗುವುದರಲ್ಲಿ ಸಂಶಯವಿಲ್ಲ. ಅಂತಹ ಕೆಲವೊಂದು ಆ್ಯಪ್‌ಗಳ ಮಾಹಿತಿ ಇಲ್ಲಿದೆ.

Any Books

ಎನಿಬುಕ್ಸ್‌ ಆ್ಯಪ್‌ನಲ್ಲಿ 20 ಲಕ್ಷ ಇ-ಪುಸ್ತಕಗಳಿವೆ. ಯಾವುದೇ ಸಮಯದಲ್ಲಿ ಎಲ್ಲಿ ಬೇಕಾದರೂ ತಮಗಿಷ್ಟವಾದ ಪುಸ್ತಕವನ್ನು ಆಯ್ಕೆ ಮಾಡಿಕೊಂಡು ಓದಿಕೊಳ್ಳಲು ಇದು ನೆರವಾಗುತ್ತದೆ. ಮೊಬೈಲ್‌ ಗ್ರಂಥಾಲಯ ರೀತಿಯಲ್ಲಿ ಇದು ಕೆಲಸ ಮಾಡುತ್ತಿದ್ದು, ಕನ್ನಡ, ಇಂಗ್ಲಿಷ್‌, ಹಿಂದಿ ಸೇರಿದಂತೆ ವಿವಿಧ ಭಾಷೆಗಳ ಪುಸ್ತಕಗಳು ಇದರಲ್ಲಿ ಲಭ್ಯವಿವೆ. ತಮಗೆ ಅವಶ್ಯಕವಾದ ಪುಸ್ತಕವನ್ನು ಡೌನ್‌ಲೋಡ್‌ ಮಾಡಿಕೊಂಡು ವಿದ್ಯಾರ್ಥಿಗಳು ಅಭ್ಯಾಸ ಮಾಡಬಹುದಾಗಿದೆ.

Memrise

ವಿದೇಶಿ ಭಾಷೆಗಳನ್ನು ಕಲಿಯುವ ಆಸಕ್ತಿಯುಳ್ಳವರಿಗೂ ಸಾಕಷ್ಟು ಆ್ಯಪ್‌ಗಳು ಲಭ್ಯವಿವೆ. ಇದಕ್ಕೆ ಮೆಮರೈಸ್‌ ತುಂಬಾ ಸಹಾಯಕವಾಗುತ್ತದೆ. ವಿಶ್ವದ 25 ಭಾಷೆಗಳಲ್ಲಿ 150ಕ್ಕೂ ಹೆಚ್ಚಿನ ಕೋರ್ಸ್‌ಗಳು ಇದರಲ್ಲಿ ಸಿಗುತ್ತವೆ. ಇಂಗ್ಲಿಷ್‌, ಸ್ಪ್ಯಾನಿಶ್‌, ಫ್ರೆಂಚ್‌, ಜರ್ಮನ್‌, ರಷ್ಯನ್‌, ಅರೆಬಿಕ್‌ ಸೇರಿದಂತೆ ನಾನಾ ದೇಶಗಳ ಭಾಷೆಗಳನ್ನು ಇದರಿಂದ ಸುಲಭವಾಗಿ ಕಲಿಯಬಹುದಾಗಿದೆ.

Swadhyaya

ಸ್ವಾಧ್ಯಾಯ ಆ್ಯಪ್‌ ಆನ್‌ಲೈನ್‌ ಕೋಚಿಂಗ್‌ ಸೇವೆ ಒದಗಿಸುತ್ತದೆ. ವಿಶೇಷವಾಗಿ ಕರ್ನಾಟಕ ಲೋಕಸೇವಾ ಆಯೋಗ (ಕೆಪಿಎಸ್‌ಸಿ) ಪರೀಕ್ಷೆ ತಯಾರಿಗೆ ಸಂಬಂಧಿಸಿದ ಮಾಹಿತಿ ಇದರಲ್ಲಿದೆ. ಆನ್‌ಲೈನ್‌ ಕೋಚಿಂಗ್‌, ಗೈಡೆನ್ಸ್‌, ಆನ್‌ಲೈನ್‌ ಸ್ಟಡಿ ಮೆಟಿರಿಯಲ್ಸ್‌, ಅಣಕು ಪರೀಕ್ಷೆ ಸೇರಿದಂತೆ ಹಲವು ಸೇವೆಗಳು ಇದರಲ್ಲಿ ಸಿಗುತ್ತವೆ. ಪಿಎಸ್‌ಐ, ಇಎಸ್‌ಐ, ಕೆಎಎಸ್‌, ಪಿಡಿಒ, ಎಸ್‌ಡಿಎ ಮತ್ತು ಎಫ್‌ಡಿಎ ಪರೀಕ್ಷೆ ಬರೆಯುವವರಿಗೆ ಇದು ತುಂಬಾ ಉಪಯುಕ್ತವಾಗಿದೆ. ಕೆಎಎಸ್‌ನ ಈ ಮೊದಲ ಎಲ್ಲಾ ಪರೀಕ್ಷೆಗಳ ಪ್ರಶ್ನಾ ಪತ್ರಿಕೆಗಳು ಮತ್ತು ಉತ್ತರಗಳು ಕೂಡ ಇದರಲ್ಲಿ ಲಭ್ಯವಿವೆ.

Pixlr

ಇದು ಉಚಿತ ಫೋಟೋ ಎಡಿಟರ್‌ ಆ್ಯಪ್‌. ತಾವು ಸೆರೆ ಹಿಡಿದಿರುವ ಯಾವುದೇ ಅದ್ಭುತ ದೃಶ್ಯ ಕ್ಷಣವನ್ನು ಮತ್ತಷ್ಟು ರಂಗಾಗಿಸಿ, ಪಕ್ಕಾ ಆಗಿಸುವ ಕೆಲಸವನ್ನು ಇದು ಮಾಡುತ್ತದೆ. ಸಾವಿರಾರು ಎಫೆಕ್ಟ್ಗಳು, ಓವರ್‌ಲೇಸ್‌, ಫಿಲ್ಟರ್‌ಗಳು ಇದರಲ್ಲಿ ಲಭ್ಯವಿವೆ. ಈ ಮೂಲಕ ಫೋಟೋ ಕೋಲಾಜ್‌ ಮಾಡಲು ಸಾಧ್ಯವಾಗುವಂತೆ ಮಾಡುತ್ತದೆ. ಈ ಮೂಲಕ ಫೋಟೋಗ್ರಫಿ ಕ್ಷೇತ್ರದಲ್ಲಿ ವಿದ್ಯಾರ್ಥಿ ದೆಸೆಯಲ್ಲೇ ಉತ್ತಮ ಸಾಧನೆ ಮಾಡಲು ನೆರವಾಗುವ ಕೆಲಸವನ್ನು ಇದು ಮಾಡುತ್ತದೆ.