ಶಾಲೆಯಲ್ಲಿ ಅತಿ ಹೆಚ್ಚು ಅಂಕ ಪಡೆದರೆ ಅದರಿಂದಾಗುವ ಲಾಭ ಕೇವಲ ಉದ್ಯೋಗ ಭವಿಷ್ಯಕ್ಕೆ ಮಾತ್ರ ಸೀಮಿತವಲ್ಲ. ವಿದ್ಯಾರ್ಥಿಗಳು ಉತ್ತಮ ಅಂಕ ಪಡೆದರೆ ಅವರಿಗೆ ಶಿಕ್ಷಣ ಮಾತ್ರವಲ್ಲ ಬೇರೆ ಅತ್ಯಾವಶ್ಯಕ ಇಲೆಕ್ಟ್ರಾನಿಕ್ಸ್ ಉಪಕರಣಗಳನ್ನು ಖರೀದಿಸಲು ಸುಲಭದಲ್ಲಿ ಸಾಲ ಸಿಗುತ್ತದೆ.
ಕಾಲೇಜು ಪರೀಕ್ಷೆಯಲ್ಲಿ ಶೇ. 90ರಷ್ಟು ಅಂಕ ಪಡೆದರೆ ದುಬಾರಿ ಸ್ಮಾರ್ಟ್ ಫೋನ್ನ್ನು ಸಾಲ ಮಾಡಿ ಖರೀದಿಸಲು ಸಾಧ್ಯವೇ ? ಹೌದು, ಖಂಡಿತಾ ಸಾಧ್ಯವಿದೆ. ಬಹುತೇಕ ಹಣಕಾಸು ಸಂಸ್ಥೆಗಳು ವಿದ್ಯಾರ್ಥಿಗಳ ಸಾಲಕ್ಕೆ ಈಗ ಅವರ ಅಂಕ ಪಟ್ಟಿಯನ್ನೇ ಪರೀಕ್ಷಿಸುತ್ತಿವೆ. ಉತ್ತಮ ಅಂಕ ಪಡೆದ ವಿದ್ಯಾರ್ಥಿಗಳು ಸುಲಭದಲ್ಲಿ ಸಾಲ ಪಡೆದು ಆಧುನಿಕ ಗ್ಯಾಜೆಟ್ಗಳನ್ನು ಖರೀದಿಸಲು ಸಾಧ್ಯವಾಗುವಂತೆ ಇದು ಮಾಡಿದೆ.
ಸುಲಭ ಸಾಲ: ಪ್ರಾಪ್ತ ವಯಸ್ಕರಿಗೆ ಐಟಿ ರಿಟರ್ನ್, ಸ್ಯಾಲರಿ ಸ್ಲಿಪ್ ಅಥವಾ ಕ್ರೆಡಿಟ್ ಸ್ಕೋರ್ ನೋಡಿಕೊಂಡು ಸಾಲ ನೀಡಲಾಗುತ್ತದೆ. ಆದರೆ ವಿದ್ಯಾರ್ಥಿಗಳಲ್ಲಿ ಅಂತಹ ದಾಖಲೆಗಳು ಇರುವುದಿಲ್ಲ. ಆದ್ದರಿಂದ ಇಂತಹ ಮಕ್ಕಳಿಗೆ ಸಾಲ ಸೌಲಭ್ಯ ಒದಗಿಸಲು ಅಸಂಪ್ರದಾಯಿಕ ವಿಧಾನ ಅನುಸರಿಸಿದ್ದೇವೆ ಎಂದು ವಿದ್ಯಾರ್ಥಿಗಳಿಗೆ ಸಾಲ ಒದಗಿಸುವ ಸಂಸ್ಥೆಯಾದ ಕ್ರೆಝಿಬೀನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಮಧುಸೂಧನ್ ಹೇಳಿದರು. ಪ್ರಸಕ್ತ ಸಂಸ್ಥೆಯು 4.5 ಲಕ್ಷ ವಿದ್ಯಾರ್ಥಿಗಳಿಗೆ ಸಾಲ ನೀಡಿದ್ದು, ಶೇ. 50ರಷ್ಟು ವಿದ್ಯಾರ್ಥಿಗಳು ಲ್ಯಾಪ್ಟಾಪ್, ಮೊಬೈಲ್ ಫೋನ್ ಮತ್ತು ಹಾರ್ಡ್ಡಿಸ್ಕ್ಗಾಗಿಯೇ ಸಾಲ ಮಾಡಿದ್ದಾರ ಎಂದು ವಿವರಿಸಿದರು.
ಸಂಸ್ಥೆಯ ಪ್ರತಿಷ್ಠೆ: ಅಂಕಗಲು ಮಾತ್ರವಲ್ಲದೆ ವಿದ್ಯಾರ್ಥಿಗಳು ಕಲಿಯುತ್ತಿರುವ ಶಿಕ್ಷಣ ಸಂಸ್ಥೆಯ ಪ್ರತಿಷ್ಠೆ, ವಿದ್ಯಾರ್ಥಿಗಳ ಶೈಕ್ಷಣ ಅರ್ಹತೆಯನ್ನು ಕೂಡ ಪರಿಗಣಿಸಲಾಗುತ್ತದೆ. 'ಯಾವ ರೀತಿಯ ಕಾಲೇಜು ಮತ್ತು ವಿದ್ಯಾರ್ಥಿಯ ವೈಯಕ್ತಿಕ ಸಾಧನೆಯನ್ನು ನಾವು ಪರಿಗಣಿಸುತ್ತೇವೆ' ಎಂದು ಮಧುಸೂಧನ್ ಹೇಳಿದರು. ಕೆಲವು ಕಾಲೇಜುಗಳಲ್ಲಿ ಅಟೊಮೇಟೆಡ್ ಸ್ಕೋರಿಂಗ್ ವ್ಯವಸ್ಥೆ ಇರುತ್ತದೆ. ಇದರಿಂದ ಸಾಲ ವಿತರಣೆ ಪ್ರಕ್ರಿಯೆ ವೇಗವಾಗಿ ನಡೆಯುತ್ತದೆ. ಉದಾಹರಣೆಗೆ ವಿಶ್ವೇಶ್ವರಯ್ಯ ಟೆಕ್ನಾಲಜಿಕಲ್ ಯುನಿವರ್ಸಿಟಿಯಲ್ಲಿ ಆನ್ಲೈನ್ನಲ್ಲಿ ಅಂಕ ಪಟ್ಟಿ ಲಭ್ಯವಿದೆ. ಇದರಿಂದ ಸುಲಭವಾಗಿ ವಿದ್ಯಾರ್ಥಿಗಳಿಗೆ ಸಾಲ ನೀಡಲು ಸಾಧ್ಯವಾಗುತ್ತದೆ. ಉಳಿದ ಕಾಲೇಜುಗಳಲ್ಲಿ ಅಂದರೆ ಆನ್ಲೈನ್ ಅಂಕ ಪಟ್ಟಿ ಇಲ್ಲದ ಕಾಲೇಜುಗಳಲ್ಲಿ ಕಲಿಯುತ್ತಿರುವ ವಿದ್ಯಾರ್ಥಿಗಳು ಅಂಕ ಪಟ್ಟಿಯನ್ನು ತರಬೇಕಾಗುತ್ತದೆ. ಕೇವಲ ಲ್ಯಾಪ್ಟಾಪ್, ಮೊಬೈಲ್ ಮಾತ್ರವಲ್ಲದೆ ದ್ವಿಚಕ್ರ ವಾಹನಗಳು ಮತ್ತು ಕಾಲೇಜು ಶುಲ್ಕಗಳಿಗೂ ಸಾಲ ಸೌಲಭ್ಯ ಸಿಗುತ್ತದೆ ಎಂದವರು ವಿವರಿಸಿದರು.
ಕಡಿಮೆ ಕಂತು: ಹೈದರಾಬಾದ್ನ ಮಲ್ಲಾ ರೆಡ್ಡಿ ಎಂಜಿನಿಯರಿಂಗ್ ಕಾಲೇಜು ವಿದ್ಯಾರ್ತಿ ನಾಗರಾಜು ಲ್ಯಾಪ್ಟಾಪ್ ಖ ಈದಿಸಲು 36 ಸಾವಿರ ರೂ. ಸಾಲ ಮಾಡಿದ್ದರು. 'ನಾನು 10 ಸಾವಿರ ರೂ. ಡೌನ್ ಪೇಮೆಂಟ್ ಮಾಡಿದೆ. ಬಳಿಕ ಇಎಂಐ ಆಗಿ 2,000 ರೂ. ಪಾವತಿಸುತ್ತಾ ಬಂದೆ. 13 ತಿಂಗಳಲ್ಲಿ ಸಾಲ ಪೂರ್ಣ ಪಾವತಿಯಾಯಿತು. ಬಳಿಕ 14 ಸಾವಿರ ಸಾಲ ಮಾಡಿ ನೋಟ್ಬುಕ್ ಖರೀದಿಸಿದೆ. ಇದಕ್ಕೆ ತಿಂಗಳಿಗೆ 850 ರೂ. ಪಾವತಿ ಮಾಡುತ್ತಿದ್ದೇನೆ' ಎಂದು ನಾಗರಾಜು ತಿಳಿಸಿದರು.
ಚೈತನ್ಯ ಕೊನೆರು ಅವರದ್ದು ಕೂಡ ಇದೇ ಕಥೆ. ಸಾಮಾಜಿಕ ಜಾಲ ತಾಣಗಳ ಮೂಲಕ ವಿದ್ಯಾರ್ಥಿಗಳಿಗೆ ಮೊಬೈಲ್ ಖರೀದಿಸಲು ಸಾಲ ಸಿಗುತ್ತದೆ ಎಂದು ಗೊತ್ತಾಯಿತು ಎಂದು ಬೆಂಗಳೂರು ಗೀತಂ ವಿವಿಯಲ್ಲಿ ಕಲಿಯುತ್ತಿರುವ ಚೈತನ್ಯ ಹೇಳಿದರು. 'ನನ್ನ ತಂದೆಗೆ ಸೆಮಿಸ್ಟರ್ ಶುಲ್ಕವಾದ 1.85 ಲಕ್ಷ ರೂ. ಹೊಂದಿಸಲು ಕಷ್ಟವಾಯಿತು. ಆಗ ನಾನು ಒಂದು ಲಕ್ಷ ರೂ. ಸಾಲ ಮಾಡಲು ನಿರ್ಧರಿಸಿದೆ. ಶಿಕ್ಷಣ ಸಾಲಕ್ಕೆ ಶೇ. 12ರಿಂದ 17ರಷ್ಟು ಬಡ್ಡಿಯಿದ್ದರೆ ಆನ್ಲೈನ್ ಸಾಲ ನೀಡಿಕೆಯಲ್ಲಿ ಶೇ. 9ರಿಂದ 10ರಷ್ಟು ಮಾತ್ರ ಬಡ್ಡಿಯಿದೆ. ಹೀಗಾಗಿ ಬಡ್ಡಿ ಹೊರೆಯೂ ಕಡಿಮೆಯಾಗುತ್ತದೆ' ಎಂದವರು ವಿವರಿಸಿದರು.
ನೇರ ಸಾಲ ಇಲ್ಲ: ಸಾಮಾನ್ಯವಾಗಿ ಇಂತಹ ಆನ್ಲೈನ್ ಸಾಲ ನೀಡಿಕೆ ಸಂಸ್ಥೆಗಳು ನೇರವಾಗಿ ನಗದು ರೂಪದಲ್ಲಿ ಸಾಲ ನೀಡುವುದಿಲ್ಲ. ಬದಲಾಗಿ ಸಂಬಂಧಪಟ್ಟ ಶಿಕ್ಷಣ ಸಂಸ್ಥೆ, ವಾಹನ ಡೀಲರ್ ಅಥವಾ ಇ-ಕಾಮರ್ಸ್ ವೆಬ್ಸೈಟ್ಗೆ ಹಣವನ್ನು ವರ್ಗಾವಣೆ ಮಾಡುತ್ತವೆ ಎಂದು ಫೇರ್ಸೆಂಟ್ ಸಂಸ್ಥೆಯ ಸಹ ಸಂಸ್ಥಾಪಕ ರಜತ್ ಗಾಂಧಿ ಹೇಳಿದರು. ಸಂಸ್ಥೆಯು ಗ್ರಾಹಕ ಸಾಮಗ್ರಿಗಳ ಸಾಲವನ್ನು 50,000 ರೂ.ಗಳಿಗೆ ಸೀಮಿತಗೊಳಿಸಿದೆ. ಪ್ರತಿ ತಿಂಗಳಿಗೆ 15,000 ಅರ್ಜಿಗಳು ಬರುತ್ತಿದ್ದು, ಇವುಗಳ ಪೈಕಿ ಶೇ. 5ರಷ್ಟು ವಿದ್ಯಾರ್ಥಿಗಳದ್ದಾಗಿರುತ್ತದೆ ಎಂದವರು ವಿವರಿಸಿದರು.