ಎಂಬಿಬಿಎಸ್‌ ಕೌನ್ಸೆಲಿಂಗ್‌: ಫಲಿತಾಂಶ ಪ್ರಕಟಗೊಂಡ ಕೆಲವೇ ಗಂಟೆಗಳಲ್ಲಿ ವಾಪಸ್‌

ಹೊಸದಿಲ್ಲಿ: ಭಾರತೀಯ ಮೆಡಿಕಲ್‌ ಕೌನ್ಸಿಲಿಂಗ್‌ ಕಮಿಟಿ, ದೇಶವ್ಯಾಪಿ ಸರಕಾರಿ ಕಾಲೇಜು ಮತ್ತು ಡೀಮ್ಡ್‌ ವಿಶ್ವವಿದ್ಯಾಲಯಗಳಲ್ಲಿ ಅಖಿಲ ಭಾರತ ಕೋಟಾದಡಿ ಎಂಬಿಬಿಎಸ್‌ ಪ್ರವೇಶ ಪಡೆಯುವ ಮೊದಲ ಸುತ್ತಿನ ಆನ್‌ಲೈನ್‌ ಕೌನ್ಸಿಲಿಂಗ್‌ ಫಲಿತಾಂಶವನ್ನು ವಾಪಸ್‌ ಪಡೆದಿದೆ. ಈ ಮೊದಲು ಫಲಿತಾಂಶವನ್ನು ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಿದ್ದ ಕಮಿಟಿ, ಕೆಲವೇ ಗಂಟೆಗಳಲ್ಲಿ ಅದನ್ನು ಡಿಲೀಟ್‌ ಮಾಡಿದೆ. ಬದಲಾಗಿ ಶೀಘ್ರವೇ ಫಲಿತಾಂಶದ ಹೊಸ ವಿವರವನ್ನು ಶೀಘ್ರವೇ ಪ್ರಕಟಿಸುವುದಾಗಿ ಅಂತರ್ಜಾಲದಲ್ಲಿ ಪ್ರಕಟಿಸಿದೆ.

ಇದರಿಂದಾಗಿ ಅವಕಾಶ ಸೀಟು ಪಡೆದವರು ಕಾಲೇಜು ಪ್ರವೇಶದ ದಿನಾಂಕದ ವಿಷಯದಲ್ಲಿ ಒಂದಿಷ್ಟು ವಿನಾಯಿತಿ ಪಡೆಯಲು ಸಾಧ್ಯವಿದೆ. ಈ ಮೊದಲು ಜುಲೈ 6ರಂದು ಮೊದಲ ಹಂತದ ಕೌನ್ಸಿಲಿಂಗ್‌ನಲ್ಲಿ ಉತ್ತೀರ್ಣರಾದವರು ಕಾಲೇಜಿಗೆ ಹೋಗಿ ತಮ್ಮ ಪ್ರವೇಶಾತಿಯನ್ನು ಖಾತರಿ ಪಡಿಸಿಕೊಳ್ಳಬೇಕಾಗಿತ್ತು. ಹೊಸ ಬೆಳವಣಿಗೆಯ ಹಿನ್ನೆಲೆಯಲ್ಲಿ ವಿದ್ಯಾರ್ಥಿಗಳು ಕಮಿಟಿಯ ಅಧಿಕೃತ ಅಂತರ್ಜಾಲವನ್ನು ನಿರಂತರವಾಗಿ ಗಮನಿಸುವಂತೆ ಸಲಹೆ ನೀಡಲಾಗಿದೆ. ಇದೇ ವೇಳೆ, ಮೊದಲ ಹಂತದಲ್ಲಿ ಉತ್ತೀರ್ಣರಾಗಿ ತಾವು ಸೀಟು ಪಡೆದ ಕಾಲೇಜನ್ನು ಬಿಟ್ಟು ಬಿಡಲು ಉದ್ದೇಶಿಸಿರುವ ವಿದ್ಯಾರ್ಥಿಗಳಿಗೆ ಯಾವುದೇ ರೀತಿಯಲ್ಲಿ ದಂಡ ವಿಧಿಸದೆ ಎರಡನೇ ಹಂತದ ಕೌನ್ಸಿಲಿಂಗ್‌ಗೆ ಅವಕಾಶ ನೀಡಲಾಗುತ್ತದೆ ಎಂದು ತಿಳಿದು ಬಂದಿದೆ.