ಇಡ್ಲಿಯಲ್ಲಿ 2000 ವೆರೈಟಿ

ದಕ್ಷಿಣ ಭಾರತದ ಸಾಂಪ್ರದಾಯಿಕ ತಿಂಡಿ ಇಡ್ಲಿಯಲ್ಲಿ ನಮಗೆ ಹೆಚ್ಚೆಂದರೆ ಹತ್ತು ಅಥವಾ ಹದಿನೈದು ವೆರೈಟಿ ಗೊತ್ತಿರುತ್ತದೆ. ಆದರೆ ಚೆನ್ನೈನಲ್ಲಿರುವ ಎಂ.ಎಣಿಯವನ್‌ ಎಂಬ ಎಂಬ ವ್ಯಕ್ತಿಯು 2000 ಕ್ಕೂ ಅಧಿಕ ವೆರೈಟಿಯ ಇಡ್ಲಿಗಳನ್ನು ಮಾರುತ್ತಾರಂತೆ. ಅಲ್ಲಿ ಇಡ್ಲಿ ಮ್ಯಾನ್‌ ಎಂದೇ ಪ್ರಸಿದ್ಧರಾಗಿರುವ ಅವರು ಮೂಲತಃ ರಿಕ್ಷಾ ಡ್ರೈವರ್‌ ಆಗಿದ್ದರು. ಆಮೇಲೆ ಇಡ್ಲಿ ಮಾರಾಟ ಮಾಡುವ ಉದ್ಯಮಿಯೊಬ್ಬರ ಬಳಿ ಇಡ್ಲಿ ಡೆಲಿವರಿ ಮಾಡುವ ಕೆಲಸ ಮಾಡಿ ನಂತರ ಕೊಯಂಬತ್ತೂರಿನಿಂದ ಚೆನ್ನೈಗೆ ಎರಡು ಇಡ್ಲಿ ಸ್ಟ್ರೀಮರ್‌ನೊಂದಿಗೆ ಬಂದು ತಾವೇ ಇಡ್ಲಿ ತಯಾರಿಸಿ ಮಾರಾಟ ಮಾಡಿದರು. ವಿವಿಧ ಹಣ್ಣು, ತರಕಾರಿಗಳಿಂದ ಮಾಡುವ ಇಡ್ಲಿ ಸೇರಿದಂತೆ, ಚಾಕ್ಲೇಟ್‌ ಇಡ್ಲಿ, ಆರೆಂಜ್‌ ಇಡ್ಲಿ, ಕಾರ್ನ್‌ ಇಡ್ಲಿ, ಮಿಕ್ಕಿ ಮೌಸ್‌ ಶೇಪ್‌ ಇಡ್ಲಿ, ಕುಂಗ್‌ ಫು ಪಾಂಡ ಇಡ್ಲಿ, ಪಿಜ್ಜಾ ಇಡ್ಲಿ, ಎಳನೀರು ಇಡ್ಲಿ, ಚಟ್ನಿ ಸ್ಟಪ್ಫಿಂಗ್‌ ಇಡ್ಲಿ ಸೇರಿದಂತೆ 2000ಕ್ಕೂ ಹೆಚ್ಚು ಬಗೆಯ ಇಡ್ಲಿಗಳನ್ನು ಇವರು ಮಾಡುತ್ತಾರೆ. ಭಾರತದಲ್ಲಿ ಮೊದಲ ಬಾರಿಗೆ ವರ್ಲ್ಡ್‌ ಇಡ್ಲಿ ಡೇ ಪರಿಚಯಿಸಿದವರು ಇವರೇ ಎಂದು ಹೇಳಲಾಗುತ್ತದೆ. ಚೆನ್ನೈನಲ್ಲಿ ಸ್ವಂತ ರೆಸ್ಟೋರೆಂಟ್‌ ಹೊಂದಿರುವ ಇವರು ಈಗಾಗಲೇ 124 ಕೆ.ಜಿ ತೂಗುವ ದೈತ್ಯ ಇಡ್ಲಿ ತಯಾರಿಸಿ ದಾಖಲೆ ಸ್ಥಾಪಿಸುವ ಪ್ರಯತ್ನವನ್ನೂ ಮಾಡಿದ್ದಾರೆ.