ಟೆಕ್ಸಾಸ್‌ನಲ್ಲಿ ದೀಪಿಕಾ ಪಡುಕೋಣೆ ದೋಸೆ

ವಿದೇಶದಲ್ಲಿ ದೀಪಿಕಾ ಪಡುಕೋಣೆಯವರ ಜನಪ್ರಿಯತೆ ಎಷ್ಟಿದೆಯೆಂದರೆ ಅಮೆರಿಕದ ರೆಸ್ಟೋರೆಂಟ್‌ವೊಂದು ದೀಪಿಕಾ ಹೆಸರಿನಲ್ಲೇ ದೋಸೆಯೊಂದನ್ನು ಸರ್ವ್‌ ಮಾಡುತ್ತಿದೆ.

ಲವಲವಿಕೆ ಸುದ್ದಿಲೋಕ

ಅಮೆರಿಕದ ಟೆಕ್ಸಾಸ್‌ನಲ್ಲಿರುವ ದೋಸಾ ಲ್ಯಾಬ್ಸ್‌ ಎಂಬ ಇಂಡಿಯನ್‌ ರೆಸ್ಟೋರೆಂಟ್‌ಗೆ ಭೇಟಿ ಕೊಟ್ಟರೆ ಅಲ್ಲಿನ ಮೆನುವಿನಲ್ಲಿ ದೀಪಿಕಾ ಪಡುಕೋಣೆ ಹೆಸರಿನ ದೋಸೆಯೊಂದು ಗಮನ ಸೆಳೆಯುತ್ತದೆ. ಬಾಲಿವುಡ್‌ ಸ್ಟಾರ್‌ ಮತ್ತು ಕನ್ನಡತಿ ದೀಪಿಕಾರ ಜನಪ್ರಿಯತೆಗೆ ಇದು ಮತ್ತೊಂದು ನಿದರ್ಶನ. ಡಿಪ್ಪಿಗೆ ಜಗತ್ತಿನಾದ್ಯಂತ ಲಕ್ಷಾಂತರ ಅಭಿಮಾನಿಗಳು ಇರುವುದನ್ನು ಗಮನಿಸಿ ಆ ರೆಸ್ಟೋರೆಂಟ್‌ ಮಾಲೀಕರು ದೋಸೆಯೊಂದಕ್ಕೆ ದೀಪಿಕಾ ಪಡುಕೋಣೆ ಹೆಸರನ್ನೇ ಇಟ್ಟುಬಿಟ್ಟಿದ್ದಾರೆ.

10 ಡಾಲರ್‌

ದೋಸಾ ಲ್ಯಾಬ್ಸ್‌ ರೆಸ್ಟೋರೆಂಟ್‌ನ ಮೆನುವಿನಲ್ಲಿರುವ ದೀಪಿಕಾ ಪಡುಕೋಣೆ ದೋಸೆಯ ಬೆಲೆ 10 ಡಾಲರ್‌ (704 ರೂ.). ದೋಸೆ ಹೆಸರಿನ ಕೆಳಗೆ ಹಾಟ್‌ ಘೋಸ್ಟ್‌ ಚಿಲ್ಲಿ ಟಾಪಿಂಗ್‌ ಮತ್ತು ಆಲೂಗೆಡ್ಡೆ ಮಿಶ್ರಣದ ಸ್ಟಪ್ಫಿಂಗ್‌ ಇದೆ ಎಂದು ಬರೆಯಲಾಗಿದೆ. ಅಭಿಮಾನಿಯೊಬ್ಬರು ಟ್ವಿಟ್ಟರ್‌ನಲ್ಲಿ ಪೋಸ್ಟ್‌ ಮಾಡಿದ್ದ ಈ ಮೆನು ಫೋಟೊವನ್ನು ದೀಪಿಕಾ ಪಡುಕೋಣೆ ರೀಟ್ವೀಟ್‌ ಮಾಡಿ, ಹಂಗ್ರೀ ಎನಿವನ್‌? ಎಂದು ಬರೆದುಕೊಂಡಿದ್ದಾರೆ. ರಣವೀರ್‌ ಸಿಂಗ್‌ ಇದನ್ನು ಶೇರ್‌ ಮಾಡಿ, ನನಗೆ ಈ ದೋಸೆ ತಿನ್ನಬೇಕು ಎಂದು ಕ್ಯಾಪ್ಷನ್‌ ಕೊಟ್ಟಿದ್ದಾರೆ. ಈ ಫೋಟೊವೀಗ ವೈರಲ್‌ ಆಗಿದ್ದು, ದೀಪಿಕಾ ಅಭಿಮಾನಿಗಳು ಈ ದೋಸೆ ತಿನ್ನಲು ಕಾತರದಿಂದ ಕಾಯುತ್ತಿದ್ದಾರಂತೆ.

ಪುಣೆಯಲ್ಲಿ ದೀಪಿಕಾ ಪರೋಟ

ದೀಪಿಕಾ ಪಡುಕೋಣೆ ದೋಸೆಯ ಮೆನು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದ್ದೇ ತಡ, ಅಭಿಮಾನಿಯೊಬ್ಬರು ಪುಣೆಯ ರೆಸ್ಟೋರೆಂಟ್‌ವೊಂದರಲ್ಲಿ ದೀಪಿಕಾ ಪಡುಕೋಣೆ ಹೆಸರಿನಲ್ಲಿ ಪರೋಟ ಥಾಲಿ ಸರ್ವ್‌ ಮಾಡಲಾಗುತ್ತಿದೆ ಎಂದು ಟ್ವಿಟ್ಟರ್‌ನಲ್ಲಿ ಬರೆದುಕೊಂಡಿದ್ದಾರೆ. ಅವರು ಪೋಸ್ಟ್‌ ಮಾಡಿರುವ ಅಲ್ಲಿನ ಮೆನು ಫೋಟೊದಲ್ಲಿ ದೀಪಿಕಾ ಪಡುಕೋಣೆ ಪರೋಟ ಥಾಲಿ ಎಂಬ ಹೆಸರಿದೆ. 600 ರೂಪಾಯಿಯ ಈ ವೆಜ್‌ ಥಾಲಿಯಲ್ಲಿ ತಿರಂಗ ಪಲ್ಯ, ದಾಲ್‌ ಮಖಾನ, ರಾಜ್ಮ ಚೋಲೆ, ಎರಡು ಸಿಹಿ ತಿಂಡಿ, ಒಂದು ಸ್ಪೆಷಲ್‌ ಪರೋಟ-1, ರಾಯತ, ಸಲಾಡ್‌, ಹಪ್ಪಳ, ಉಪ್ಪಿನಕಾಯಿ ಮತ್ತು ಬೆಣ್ಣೆ ಸರ್ವ್‌ ಮಾಡಲಾಗುತ್ತದೆ. ಪುಣೆಯ ಆವೋಜಿ ಖಾವೋಜಿ ಎಂಬ ಈ ರೆಸ್ಟೋರೆಂಟ್‌ನಲ್ಲಿ ಕೇವಲ ದೀಪಿಕಾ ಮಾತ್ರವಲ್ಲದೆ, ಅನೇಕ ಸಿಲೆಬ್ರಿಟಿಗಳ ಹೆಸರಿನ ಪರೋಟ ಥಾಲಿಗಳಿವೆ.