ಆರೋಗ್ಯಸ್ನೇಹಿ ಬಾದಾಮಿ ಹಿಟ್ಟು

ಪೌಷ್ಟಿಕಾಂಶಗಳ ಆಗರವಾಗಿರುವ ಬಾದಾಮಿ ಹಿಟ್ಟನ್ನು ವಿವಿಧ ಖಾದ್ಯಗಳಿಗೆ ಬಳಸುವ ಟ್ರೆಂಟೊಂದು ಗಮನ ಸೆಳೆಯುತ್ತಿದೆ. ಗ್ಲುಟೆನ್‌ ಫ್ರೀಯಾಗಿರುವ ಈ ಹಿಟ್ಟು ಆರೋಗ್ಯಕ್ಕೆ ಉತ್ತಮವಾಗಿ ಪರಿಣಮಿಸಿದೆ.

ಲವಲವಿಕೆ ಸುದ್ದಿಲೋಕ

ಧಾನ್ಯಗಳ ಹಿಟ್ಟಿಗೆ ಪರ್ಯಾಯವಾಗಿ ಹೊರಹೊಮ್ಮುತ್ತಿರುವ ಬಾದಾಮಿ ಹಿಟ್ಟು ರುಚಿಯಲ್ಲಿ ಸ್ವಲ್ಪ ಸಿಹಿಯಾಗಿದ್ದು, ಪೌಷ್ಟಿಕಾಂಶಭರಿತವಾಗಿದೆ. ಬಾದಾಮಿ ಬೀಜದಿಂದ ಮಾಡಲ್ಪಡುವ ಈ ಹಿಟ್ಟು ತನ್ನ ಆರೋಗ್ಯ ಗುಣಗಳಿಂದ ಜನರಿಗೆ ಪ್ರಿಯವಾಗಿದೆ. ಗ್ಲುಟೆನ್‌ ಫ್ರೀ ಸಿಹಿ ತಿಂಡಿಗಳು ಮತ್ತು ಬ್ರೆಡ್‌ ಮಾಡಲು ಈ ಹಿಟ್ಟನ್ನು ಬಳಸಲಾಗುತ್ತಿದ್ದು, ಇದು ಆಯಾ ಖಾದ್ಯಕ್ಕೆ ವಿಶೇಷ ರುಚಿಯನ್ನು ನೀಡುತ್ತದೆ.

ಪೌಷ್ಟಿಕ ಆಹಾರ

ಮೂವತ್ತು ಗ್ರಾಂ ಬಾದಾಮಿ ಹಿಟ್ಟಿನಲ್ಲಿ 163 ಕ್ಯಾಲೊರಿ, 14.2 ಗ್ರಾಂ ಕೊಬ್ಬು ಮತ್ತು 6.1 ಗ್ರಾಂ ಪ್ರೋಟಿನ್‌ ಇವೆ. ವಿಟಮಿನ್‌ ಇ ಕೂಡಾ ಇದರಲ್ಲಿ ಹೆಚ್ಚಿನ ಪ್ರಮಾಣದಲ್ಲಿದ್ದು ಇದು ಚರ್ಮವನ್ನು ಅಕಾಲಿಕವಾಗಿ ಸುಕ್ಕುಗಟ್ಟಿಸುವ ಜೀವಕೋಶಗಳನ್ನು ಹೋಗಲಾಡಿಸಿ ಚರ್ಮದ ಆರೋಗ್ಯವನ್ನು ಹೆಚ್ಚಿಸುತ್ತದೆ. ಹೃದಯದ ಆರೋಗ್ಯವನ್ನು ಹೆಚ್ಚಿಸುವ ಈ ಹಿಟ್ಟಿನಲ್ಲಿ ಕಾರ್ಬೊಹೈಡ್ರೇಟ್ಸ್‌ ಪ್ರಮಾಣ ಕಡಿಮೆಯಿದ್ದು, ಆರೋಗ್ಯಕರ ಕೊಬ್ಬು ಮತ್ತು ನಾರು ಹೊಂದಿದೆ. ಈ ಕಾರಣಕ್ಕೆ ಕಡಿಮೆ ಗ್ಲಿಸರಿನ್‌ ಇಂಡೆಕ್ಸ್‌ ಹೊಂದಿರುವ ಈ ಹಿಟ್ಟು ರಕ್ತದಲ್ಲಿ ಸಕ್ಕರೆ ಉತ್ಪಾದನೆಯನ್ನು ನಿಧಾನಗೊಳಿಸಿ ಅಗತ್ಯ ಶಕ್ತಿಯನ್ನು ನೀಡುತ್ತದೆ. ಮಧುಮೇಹ ಸಮಸ್ಯೆಯಿದ್ದವರಿಗೆ ಈ ಹಿಟ್ಟಿನಿಂದ ಮಾಡಿದ ಖಾದ್ಯಗಳು ಒಳ್ಳೆಯದು.

ಧಾನ್ಯದ ಹಿಟ್ಟಿಗೆ ಪರ್ಯಾಯ

ಬಾದಾಮಿ ಹಿಟ್ಟು ನೈಸರ್ಗಿಕವಾಗಿಯೇ ಗ್ಲುಟೆನ್‌ ಮುಕ್ತವಾಗಿರುವ ಕಾರಣ ಇದನ್ನು ಧಾನ್ಯಗಳ ಹಿಟ್ಟಿಗೆ ಪರ್ಯಾಯವಾಗಿ ಪರಿಗಣಿಸಲಾಗಿದೆ. ಗ್ಲುಟೆನ್‌ ಇಲ್ಲದ ಆಹಾರ ಸೇವನೆಗೆ ಆದ್ಯತೆ ನೀಡುವವರು ಈ ಹಿಟ್ಟನ್ನು ಹೆಚ್ಚು ಬಳಸಲು ಆರಂಭಿಸಿದ್ದಾರೆ. ಪೌಷ್ಟಿಕಾಂಶ ಪ್ರಮಾಣವೂ ಹೆಚ್ಚಿರುವ ಈ ಹಿಟ್ಟು ರಕ್ತದೊತ್ತಡವನ್ನೂ ಕಡಿಮೆ ಮಾಡುತ್ತದೆ. ಇಂಟರ್‌ನ್ಯಾಷನಲ್‌ ಜರ್ನಲ್‌ ಆಫ್‌ ಒಬೆಸಿಟಿ ಆ್ಯಂಡ್‌ ರಿಲೇಟೆಡ್‌ ಮೆಟಾಬಾಲಿಕ್‌ ಡಿಸಾರ್ಡರ್‌ನಲ್ಲಿ ಪ್ರಕಟವಾದ ಅಧ್ಯಯನ ವರದಿಯೊಂದು, ಪ್ರತಿದಿನ ಬಾದಾಮಿ ಅಥವಾ ಬಾದಾಮಿ ಹಿಟ್ಟಿನ ಆಹಾರ ಸೇವಿಸುವ ಮೂಲಕ ದೇಹ ತೂಕವನ್ನು ಅತ್ಯಂತ ಸುಲಭವಾಗಿ ಕಡಿಮೆಗೊಳಿಸಬಹುದು ಎಂದು ಹೇಳಿದೆ.

ಮನೆಯಲ್ಲೇ ಮಾಡಿ

ಉತ್ತಮ ಗುಣಮಟ್ಟದ ಬಾದಾಮಿಗಳನ್ನು ಸ್ಲೈಸ್‌ ಮಾಡಿ ಫುಡ್‌ ಪ್ರೊಸೆಸರ್‌ ಅಥವಾ ಬ್ಲೆಂಡರ್‌ನಲ್ಲಿ ಪುಡಿ ಮಾಡಿ. ಬ್ಲೆಂಡ್‌ ಮಾಡುವಾಗ ಆಗಾಗ ತಿರುವುತ್ತಿದ್ದರೆ ಹಿಟ್ಟು ಜಿಡ್ಡಾಗುವುದಿಲ್ಲ. ಬಿಸಿ ನೀರಿನಲ್ಲಿ ಬಾದಾಮಿಯನ್ನು ನೆನೆಸಿಟ್ಟು ಸಿಪ್ಪೆ ತೆಗೆದು ಒಣಗಿಸಿ ಆಮೇಲೆ ಗ್ರೈಂಡ್‌ ಮಾಡಿದರೂ ಹಿಟ್ಟು ನುಣ್ಣಗಾಗುತ್ತದೆ.