ಬ್ರಾಕೊಲಿ ಕಾಫಿಯಲ್ಲಿದೆ ಆರೋಗ್ಯ

ಹಸಿರು ತರಕಾರಿ ಬ್ರಾಕೊಲಿಯಿಂದ ಮಾಡಿದ ಕಾಫಿ ಬ್ರಾಕೊಲಿ ಲ್ಯಾಟೆ ಎಂಬ ಹೆಸರಿನಲ್ಲಿ ಗಮನ ಸೆಳೆಯುತ್ತಿದೆ. ಕಾಫಿ ಮೂಲಕ ತರಕಾರಿಯ ಆರೋಗ್ಯ ಪ್ರಯೋಜನ ಪಡೆಯುವ ಈ ಕಾನ್ಸೆಪ್ಟ್‌ ಹೊಸ ಫುಡ್‌ ಟ್ರೆಂಡ್‌ ಆಗಿದೆ.

ಲವಲವಿಕೆ ಸುದ್ದಿಲೋಕ

ಕಾಫಿ ಫ್ಲೇವರ್‌ಗಳ ಲಿಸ್ಟ್‌ಗೆ ಹೊಸ ಸೇರ್ಪಡೆ ಬ್ರಾಕೊಲಿ ಲ್ಯಾಟೆ. ಕೇಳಲು ವಿಚಿತ್ರವೆನಿಸಿದರೂ ಇದೀಗ ಹೊಸ ಕಾಫಿ ಟ್ರೆಂಡ್‌ ಆಗಿ ಬೆಳೆಯುತ್ತಿದೆ. ಆಸ್ಪ್ರೇಲಿಯಾದಲ್ಲಿ ಪ್ರಯೋಗ ಮಾಡಲಾಗಿರುವ ಈ ಕಾಫಿ ಭಾರತಕ್ಕೂ ಕಾಲಿಡುವ ದಿನ ದೂರವಿಲ್ಲ. ಸೂಪರ್‌ ಫುಡ್‌ ಎಂದು ಕರೆಯಲ್ಪಡುವ ಬ್ರಾಕೊಲಿಯ ಆರೋಗ್ಯ ಪ್ರಯೋಜನವನ್ನು ಕಾಫಿಯ ಮೂಲಕ ಪಡೆಯುವ ಈ ಟ್ರೆಂಡ್‌ ಆರೋಗ್ಯಕ್ಕೂ ಪೂರಕವಾಗಿದೆ.

ಹೆಲ್ದಿ ಪೇಯ

ಬ್ರಾಕೊಲಿ ಲ್ಯಾಟೆಯನ್ನು ಆಸ್ಪ್ರೇಲಿಯಾದ ನ್ಯಾಷನಲ್‌ ಸೈನ್ಸ್‌ ಏಜೆನ್ಸಿ ಇತ್ತೀಚೆಗಷ್ಟೇ ಕಂಡು ಹಿಡಿದಿದೆ. ಆಸ್ಪ್ರೇಲಿಯನ್ನರು ತರಕಾರಿಗಳನ್ನು ಹೆಚ್ಚು ಸೇವಿಸಬೇಕು ಎಂಬುದೇ ಈ ಅನ್ವೇಷಣೆಯ ಮುಖ್ಯ ಉದ್ದೇಶವಾಗಿತ್ತು. ಸಮೀಕ್ಷೆಯೊಂದರ ಪ್ರಕಾರ, ಬಹುತೇಕ ಆಸ್ಪ್ರೇಲಿಯನ್ನರು ತರಕಾರಿಯನ್ನೇ ತಿನ್ನುವುದಿಲ್ಲವಂತೆ. ಇದರಿಂದ ಅಲ್ಲಿ ವಿವಿಧ ತರಕಾರಿಗಳಿಂದ ಕಾಫಿ ಮಾಡುವ ಪ್ರಯೋಗ ಆರಂಭವಾಯಿತು. ಇದರಿಂದ ಪೌಷ್ಟಿಕಾಂಶ ಹೆಚ್ಚಿರುವ ಬ್ರಾಕೊಲಿ ಕಾಫಿ ಮಾಡುವ ಐಡಿಯಾ ಬಂತು ಎಂದು ಸೈನ್ಸ್‌ ಏಜೆನ್ಸಿ ತಮ್ಮ ವೆಬ್‌ಸೈಟ್‌ನಲ್ಲಿ ಬರೆದುಕೊಂಡಿದೆ.

ಮಾಡುವುದು ಹೇಗೆ?

ಪ್ರೋಟೀನ್‌, ನಾರು ಬಯೋಆ್ಯಕ್ಟಿವ್‌ ಫಿಟೊಕೆಮಿಕಲ್ಸ್‌ ಹೆಚ್ಚಿನ ಪ್ರಮಾಣದಲ್ಲಿರುವ ಬ್ರಾಕೊಲಿಯನ್ನು ಬಿಸಿಲಿನಲ್ಲಿ ಚೆನ್ನಾಗಿ ಒಣಗಿಸಿ ಆಮೇಲೆ ಅದನ್ನು ನುಣ್ಣಗೆ ಪುಡಿ ಮಾಡಲಾಗುತ್ತದೆ. ಈ ಬ್ರಾಕೊಲಿ ಪುಡಿಯನ್ನು ದಿನಕ್ಕೆ ಎರಡು ಟೇಬಲ್‌ ಸ್ಪೂನ್‌ ಸೇವಿಸಿದರೆ ದಿನಕ್ಕೆ ತರಕಾರಿಯಿಂದ ಸೇವನೆಯಿಂದ ಸಿಗುವ ಎಲ್ಲಾ ಪೌಷ್ಟಿಕಾಂಶಗಳನ್ನು ಪಡೆಯಬಹುದು. ಈ ಬ್ರಾಕೊಲಿ ಪುಡಿಯನ್ನು ಸೋಯಾ ಹಾಲಿಗೆ ಬೆರೆಸಿ ಕುಡಿಯಬೇಕು. ವಿಟಮಿನ್‌ ಮತ್ತು ಖನಿಜಾಂಶಗಳ ಆಗರವಾಗಿರುವ ಬ್ರಾಕೊಲಿ ಕಾಫಿ ಕ್ಯಾನ್ಸರ್‌ ಬರುವ ಅಪಾಯವನ್ನು ಕಡಿಮೆಗೊಳಿಸುತ್ತದೆ ಎಂದು ಹೇಳಲಾಗಿದೆ. ಕೆಫೈನ್‌ ಮತ್ತು ಸಕ್ಕರೆ ಇಲ್ಲದ ಈ ಕಾಫಿಯನ್ನು ಊಟಕ್ಕಿಂತ ಮೊದಲು ಕುಡಿದರೆ ದೇಹ ತೂಕವೂ ಗಣನೀಯವಾಗಿ ಕಡಿಮೆಯಾಗುತ್ತದೆ ಎಂದು ಆರೋಗ್ಯ ತಜ್ಞರು ಹೇಳಿದ್ದಾರೆ.

ಹೊಸ ಪ್ರಯೋಗ

ಕಾಫಿ ಮಾರ್ಕೆಟ್‌ನಲ್ಲಿ ಬ್ರಾಕೊಲಿ ಮಾತ್ರವಲ್ಲದೆ, ಇತರ ತರಕಾರಿಗಳಿಂದಲೂ ಕಾಫಿ ಮಾಡುವ ಪ್ರಯೋಗಗಳು ನಡೆದಿವೆ. ಕಳೆದ ವರ್ಷ ಕ್ಯಾರೆಟ್‌, ಕಿತ್ತಳೆ, ಅವಕಾಡೊ, ಮಶ್ರೂಮ್‌ ಮತ್ತು ಸೇಬು ಹಣ್ಣಿನ ಕಾಫಿಗಳನ್ನು ಪರಿಚಯಿಸಲಾಗಿದೆ. ಜನರು ಕೆಫೈನ್‌ ಸೇವನೆ ಕಡಿಮೆಗೊಳಿಸಿ ತರಕಾರಿಗಳಲ್ಲಿರುವ ಪೌಷ್ಟಿಕಾಂಶ ಸೇವನೆಯನ್ನು ಹೆಚ್ಚಿಸಬೇಕು ಎಂಬುದು ಈ ಪ್ರಯೋಗದ ಪ್ರಮುಖ ಉದ್ದೇಶವಾಗಿದೆ.