ಬಾಯಿ ನೀರೂರಿಸುವ ಚಾಕ್ಲೇಟ್‌ ಇಡ್ಲಿ

ಬಿಳಿ ಇಡ್ಲಿ ತಿಂದು ಬೋರ್‌ ಆಗಿದ್ದರೆ ರುಚಿಕರವಾದ ಚಾಕ್ಲೇಟ್‌ ಇಡ್ಲಿ ಟ್ರೈ ಮಾಡಿ. ಇಡ್ಲಿ ಮತ್ತು ಚಾಕ್ಲೇಟ್‌ ಕಾಂಬಿನೇಷನ್‌ನ ಈ ಹೊಸ ರುಚಿ ನ್ಯೂ ಜನರೇಷನ್‌ಗೆ ಇಷ್ಟವಾಗುತ್ತಿದೆ.

ಬಬಿತಾ ಎಸ್‌.

ವೈಟ್‌ ವಂಡರ್‌ ಇಡ್ಲಿ ಕಲರ್‌ಫುಲ್‌ ಆಗಿದೆ. ಕ್ಯಾರೆಟ್‌, ಪಾಲಕ್‌, ಬೀಟ್‌ರೂಟ್‌ ಇತ್ಯಾದಿಗಳನ್ನು ಬಳಸಿ ಬಣ್ಣ ಬಣ್ಣದ ಇಡ್ಲಿ ಮಾಡುವ ಜೊತೆಗೆ ಇಡ್ಲಿ ಬರ್ಗರ್‌, ಇಡ್ಲಿ ಪಿಜ್ಜಾ, ಇಡ್ಲಿ 65 ಮುಂತಾದ ಫ್ಯೂಷನ್‌ ಇಡ್ಲಿಗಳೂ ಜನರ ಮನ ಸೆಳೆದಿವೆ. ಇದೀಗ ಹೊಸ ರೀತಿಯ ಇಡ್ಲಿ ವೆರೈಟಿಗೆ ಚಾಕ್ಲೇಟ್‌ ಇಡ್ಲಿಯೂ ಸೇರ್ಪಡೆಯಾಗಿದೆ.

ಹೊಸ ರುಚಿ

ಚಾಕ್ಲೇಟ್‌ ಎಲ್ಲರಿಗೂ ಇಷ್ಟವಾಗುತ್ತದೆ. ಅದರಲ್ಲೂ ಯಂಗ್‌ಸ್ಟರ್ಸ್‌ಗೆ ಚಾಕ್ಲೇಟ್‌ ಅಂದರೆ ಪಂಚಪ್ರಾಣ. ಈ ಸಾರ್ವಕಾಲಿಕ ಜನಪ್ರಿಯ ಚಾಕ್ಲೇಟ್‌ ಫ್ಲೇವರ್‌ ಅನ್ನು ಇಡ್ಲಿಗೆ ಸೇರಿಸಿ ಮಾಡಿದ ಪ್ರಯೋಗದಿಂದ ಚಾಕ್ಲೇಟ್‌ ಇಡ್ಲಿ ಎಂಬ ಹೊಸ ವೆರೈಟಿ ಸೃಷ್ಟಿಯಾಗಿದೆ. ಸಾಂಪ್ರದಾಯಿಕ ಇಡ್ಲಿಯನ್ನು ಯುವಜನತೆಗೆ ಹತ್ತಿರವಾಗಿಸುವ ಪ್ರಯತ್ನ ಇದಾಗಿದೆ. ಬಿಳಿ ಇಡ್ಲಿ ತಿಂದು ಬೋರ್‌ ಆದವರಿಗೆ ಚಾಕ್ಲೇಟ್‌ ಇಡ್ಲಿ ಇಷ್ಟವಾಗುತ್ತದೆ. ಮುಖ್ಯವಾಗಿ ಸಪ್ಪೆ ಇಡ್ಲಿ ತಿನ್ನಲು ಹಿಂದೇಟು ಹಾಕುವ ಸಣ್ಣ ಮಕ್ಕಳು ಈ ಚಾಕ್ಲೇಟ್‌ ಇಡ್ಲಿಯನ್ನು ಬಾಯಿ ಚಪ್ಪರಿಸಿಕೊಂಡು ತಿನ್ನುತ್ತಾರೆ.

ಮನೆಯಲ್ಲೇ ಮಾಡಿ

ಚಾಕ್ಲೇಟ್‌ ಇಡ್ಲಿಯನ್ನು ಮನೆಯಲ್ಲಿ ಕೂಡ ಸುಲಭವಾಗಿ ಮಾಡಬಹುದು. ಒಂದು ಬೌಲ್‌ ಇಡ್ಲಿ ಹಿಟ್ಟಿಗೆ ಎರಡು ಟೇಬಲ್‌ ಸ್ಪೂನ್‌ ಸಿಹಿ ರಹಿತ ಕೋಕೊ ಪೌಡರ್‌, ಎರಡು ಟೇಬಲ್‌ ಸ್ಪೂನ್‌ ಸಕ್ಕರೆ, ಎರಡು ಟೇಬಲ್‌ ಸ್ಪೂನ್‌ ಕಂಡೆನ್ಸ್‌ಡ್‌ ಮಿಲ್ಕ್‌, ಅರ್ಧ ಟೀ ಸ್ಪೂನ್‌ ವೆನಿಲ್ಲಾ ಎಸೆನ್ಸ್‌, ಕಾಲು ಟೀ ಸ್ಪೂನ್‌ ಏಲಕ್ಕಿ ಪುಡಿ, ಎರಡು ಟೀ ಸ್ಪೂನ್‌ ಕಾರ್ನ್‌ಫ್ಲೋರ್‌ ಮತ್ತು ಎರಡು ಚಿಟಿಕೆ ಉಪ್ಪು ಹಾಕಿ ಚೆನ್ನಾಗಿ ಕಲಸಿ. ಇಡ್ಲಿ ಪಾತ್ರೆಗೆ ಬೆಣ್ಣೆ ಸವರಿ ಹಿಟ್ಟು ಸುರಿದು ಹಬೆಯಲ್ಲಿ ಬೇಯಿಸಿ. ಆಮೇಲೆ ಇಡ್ಲಿಯನ್ನು ತೆಗೆದು ಪ್ಲೇಟ್‌ನಲ್ಲಿ ಜೋಡಿಸಿ. ಇದರ ಮೇಲೆ ಚಾಕ್ಲೇಟ್‌ ಸಾಸ್‌ ಹಾಕಿ. ಆಮೇಲೆ ಒಂದಿಷ್ಟು ಚಾಕ್ಲೇಟ್‌ ಚಿಫ್ಸ್‌ ಉದುರಿಸಿ ಸರ್ವ್‌ ಮಾಡಿ.

ಎಲ್ಲಿ ಸಿಗುತ್ತದೆ?

ಬೆಂಗಳೂರಿನ ಜಯನಗರದಲ್ಲಿರುವ ಇಡ್ಲೀಸ್‌ನಲ್ಲಿ ಚಾಕ್ಲೇಟ್‌ ಇಡ್ಲಿ ಸರ್ವ್‌ ಮಾಡಲಾಗುತ್ತದೆ. ಅನೇಕ ಫ್ಲೇವರ್‌ಗಳ ಇಡ್ಲಿಗಳು ಸಿಗುವ ಈ ಫುಡ್‌ ಜಾಯಿಂಟ್‌ನಲ್ಲಿ ಚಾಕ್ಲೇಟ್‌ ಇಡ್ಲಿಗೆ ಹೆಚ್ಚಿನ ಡಿಮಾಂಡ್‌ ಇದೆ. ಚಾಕ್ಲೇಟ್‌ ಇಡ್ಲಿಗೆ ಚಾಕ್ಲೇಟ್‌ ಸಾಸ್‌ ಮತ್ತು ಚಾಕ್ಲೇಟ್‌ ಚಿಫ್ಸ್‌ ಉದುರಿಸಿ ಕೊಡಲಾಗುತ್ತದೆ.