ಸಿರಿಧಾನ್ಯ ಲಡ್ಡುಗೆ ಬೇಡಿಕೆ

ದಸರಾ ಸೆಲೆಬ್ರೇಷನ್‌ ಹೆಚ್ಚಿಸುವ ಲಡ್ಡುಗಳು ಸಿರಿಧಾನ್ಯಮಯವಾಗಿವೆ. ಜನರೀಗ ಹಬ್ಬಕ್ಕೆ ಬೂಂದಿ ಲಡ್ಡು, ಮೋತಿಚೂರ್‌ ಮುಂತಾದ ಲಡ್ಡುಗಳಿಗಿಂತ ಹೆಲ್ದಿ ಮಿಲೆಟ್ಸ್‌ ಲಡ್ಡುಗಳನ್ನು ಪ್ರಿಫರ್‌ ಮಾಡುತ್ತಿದ್ದಾರೆ.

ಬಬಿತಾ ಎಸ್‌.

ಮುಂಬರುವ ಆಯುಧ ಪೂಜೆ, ವಿಜಯದಶಮಿ ಉತ್ಸವಗಳಿಗೆ ಲಡ್ಡುಗೆ ಸಿಕ್ಕಾಪಟ್ಟೆ ಡಿಮಾಂಡ್‌. ಸ್ನೇಹಿತರಿಗೆ, ಬಂಧುಗಳಿಗೆ ಕೊಡಲು, ಉದ್ಯೋಗಿಗಳಿಗೆ ಹಂಚಲು ಲಡ್ಡು ಮುಂತಾದ ಸಿಹಿ ತಿಂಡಿಗಳು ಬೇಕೇ ಬೇಕು. ಈ ಸಮಯದಲ್ಲಿ ಸಿಹಿ ತಿಂಡಿಗಳಿಗೆ ಇರುವ ಬೇಡಿಕೆ ದುಪ್ಪಟ್ಟಾಗುತ್ತದೆ. ಅದರಲ್ಲೂ ವಿವಿಧ ಲಡ್ಡು, ಉಂಡೆ, ಬರ್ಫಿ ದಸರಾ ಹಬ್ಬಕ್ಕೆ ಹೆಚ್ಚು ಮಾರಾಟಾವಾಗುತ್ತವೆ. ಆದರೆ ಈ ಬಾರಿ ಕೆಲವು ಸ್ವೀಟ್‌ ಶಾಪ್‌ಗಳು ಗ್ರಾಹಕರಿಗೆ ಸಿರಿಧಾನ್ಯಗಳಿಂದ ಮಾಡಿದ ವಿವಿಧ ಲಡ್ಡುಗಳನ್ನು ಪರಿಚಯಿಸುತ್ತಿವೆ.

ಆರೋಗ್ಯ ಸ್ನೇಹಿ

ಮಿಲೆಟ್ಸ್‌ ಆಹಾರಗಳು ಈಗ ತುಂಬಾ ಪ್ರಾಮುಖ್ಯತೆ ಪಡೆದುಕೊಂಡಿರುವ ಹಿನ್ನೆಲೆಯಲ್ಲಿ ಜನರು ಹಬ್ಬದ ಸಿಹಿ ತಿನಿಸುಗಳು ಕೂಡಾ ಸಿರಿಧಾನ್ಯಗಳದ್ದೇ ಇರಲಿ ಎಂದು ಬಯಸುತ್ತಿದ್ದಾರೆ. ಈ ಪರಿಣಾಮ ನವಣೆ, ಸಜ್ಜೆ, ರಾಗಿ, ಅರಕಾ ಇತ್ಯಾದಿ ಧಾನ್ಯಗಳಿಂದ ತಯಾರಿಸಿದ ರುಚಿಕರ ಮತ್ತು ಹೆಲ್ದಿ ಲಡ್ಡುಗಳು ಸ್ವೀಟ್‌ ಮಳಿಗೆಗಳಲ್ಲಿ ಕಾಣಸಿಗುತ್ತಿವೆ. ಸಿಹಿಯ ಜೊತೆಗೆ ಆ ಧಾನ್ಯಗಳಲ್ಲಿರುವ ಆರೋಗ್ಯ ಪ್ರಯೋಜನಗಳನ್ನೂ ಪಡೆದುಕೊಂಡ ತೃಪ್ತಿ ಜನರದ್ದಾಗಿರುತ್ತದೆ.

ವೆರೈಟಿ ಇದೆ

ಸಿರಿಧಾನ್ಯಗಳ ಲಡ್ಡುಗಳಲ್ಲಿಯೂ ಸಾಕಷ್ಟು ವೆರೈಟಿ ಇದೆ. ಕೆಲವು ಕಡೆ ಒಂದೇ ಧಾನ್ಯದಿಂದ ಮಾಡಿದ ಲಡ್ಡು ಮಾರಾಟವಾದರೆ, ಇನ್ನು ಕೆಲವೆಡೆ ಅನೇಕ ಸಿರಿಧಾನ್ಯಗಳನ್ನು ಬಳಸಿ ಮಾಡಿದ ಮಲ್ಟಿ ಮಿಲೆಟ್ಸ್‌ ಲಡ್ಡುಗಳೂ ಕಾಣಸಿಗುತ್ತವೆ. ಈ ಪೈಕಿ ಮಲ್ಟಿ ಮಿಲೆಟ್ಸ್‌ ಲಡ್ಡುಗೆ ಬೇಡಿಕೆ ಹೆಚ್ಚು ಎಂದು ಸಿಹಿ ತಿನಿಸು ಮಾರಾಟಗಾರರು ಹೇಳುತ್ತಾರೆ.

ಎಲ್ಲಿ ಸಿಗುತ್ತವೆ?

ಬೆಂಗಳೂರಿನ ಬಸವನಗುಡಿಯಲ್ಲಿರುವ ಮಿಲೆಟ್ಸ್‌ ಮಾಮಾ ಎಂಬ ರೆಸ್ಟೋರೆಂಟ್‌ನಲ್ಲಿ ನೀವು ಆರೋಗ್ಯಕರ ಮಿಲೆಟ್ಸ್‌ ಲಡ್ಡು ಸವಿಯಬಹುದು. ಲಡ್ಡು ಮಾತ್ರವಲ್ಲದೆ, ಪಾಯಸ, ಹಲ್ವ, ಹಾಲುಬಾಯಿ, ಕಡುಬು ಇತ್ಯಾದಿಗಳನ್ನೂ ಇಲ್ಲಿ ಸಿರಿಧಾನ್ಯಗಳಿಂದ ಮಾಡಲಾಗುತ್ತದೆ. ಇದಲ್ಲದೆ ಆನ್‌ಲೈನ್‌ನಲ್ಲೂ ಫಿಂಗಲ್‌ ಮಿಲೆಟ್‌ ಲಡ್ಡು ಇತ್ಯಾದಿಗಳು ಸಿಗುತ್ತವೆ.