ಸಿಲೆಬ್ರಿಟಿ ಟೇಸ್ಟ್‌: ರಂಜಾನ್‌ ಹಬ್ಬಕ್ಕೆ ಸಿಹಿ ತಯಾರಿಸುವ ಸಹೇರಾ ಅಫ್ಜಾ

ಕನ್ನಡ, ತೆಲುಗು, ಹಿಂದಿ ಸಿನಿಮಾಗಳಲ್ಲಿ ಮಿಂಚುತ್ತಿರುವ ಹೊಸ ಪ್ರತಿಭೆ ಸಹೇರಾ ಅಫ್ಜಾ, ರಂಜಾನ್‌ ಹಬ್ಬದ ವಿಶೇಷ ತಿನಿಸುಗಳ ಕುರಿತು ಮಾತನಾಡಿದ್ದಾರೆ.

ನಂದಿನಿ ಕೆ.ಎಲ್‌

ರಂಜಾನ್‌ಗೆ ವೆರೈಟಿ ತಿನಿಸು

ಸಾಮಾನ್ಯವಾಗಿ ರಂಜಾನ್‌ ಹಬ್ಬಕ್ಕೆ ಬಿರಿಯಾನಿ, ಕಬಾಬ್‌, ಚಿಕನ್‌ ಸಾರು, ಮಟನ್‌ ಹಲೀಮ್‌, ಮಟನ್‌ ಸಾರು ಮುಂತಾದ ನಾನ್‌ವೆಜ್‌ ಖಾದ್ಯಗಳಿರುತ್ತವೆ. ನಾವು ಇದರ ಜೊತೆಗೆ ಸಮೋಸ, ಗುಲಾಬ್‌ ಜಾಮೂನ್‌, ಶೀರ್‌ ಕುರ್ಮಾ, ಫ್ರೂಟ್ಸ್‌ ಸಲಾಡ್‌, ಪಾಯಸ ಸೇರಿದಂತೆ ಕನಿಷ್ಠ ಆರು ಬಗೆಯ ಸಿಹಿ ತಿಂಡಿ ತಯಾರಿಸುತ್ತೇವೆ. ಪ್ರತಿವರ್ಷ ಹಬ್ಬಕ್ಕೆ ನಾನೇ ಸಿಹಿ ತಿಂಡಿಗಳನ್ನು ಮಾಡುತ್ತೇನೆ.

ಸಿಹಿ ನನಗಿಷ್ಟ

ನನಗೆ ಇಷ್ಟವಿಲ್ಲದ ಆಹಾರವೇ ಇಲ್ಲ. ನಾನ್‌ವೆಜ್‌ನಿಂದ ಹಿಡಿದು ವೆಜ್‌ ಪದಾರ್ಥಗಳೂ ನನಗಿಷ್ಟ. ಇಟಾಲಿಯನ್‌ ಮತ್ತು ಅರೇಬಿಯನ್‌ ಶೈಲಿಯ ಆಹಾರ ನನ್ನ ಆಲ್‌ ಟೈಮ್‌ ಫೇವರಿಟ್‌. ವೆರೈಟಿ ಸ್ವೀಟ್ಸ್‌ ಅಂದ್ರೆ ನನಗೆ ಪಂಚಪ್ರಾಣ. ನಾನ್‌ವೆಜ್‌ ಇಲ್ಲದೆ ನನಗೆ ಒಂದು ದಿನವನ್ನೂ ಕಳೆಯಲು ಆಗುವುದಿಲ್ಲ.

ಕುಕ್ಕಿಂಗ್‌ ಎಕ್ಸ್‌ಪರ್ಟ್‌

ಅಡುಗೆ ತಯಾರಿಸುವುದರಲ್ಲಿ ನಾನು ಎಕ್ಸ್‌ಪರ್ಟ್‌. ಒಂದು ಪದಾರ್ಥವನ್ನು ಟೇಸ್ಟ್‌ ಮಾಡಿಯೇ ಅದರಲ್ಲಿ ಏನೇನಿದೆ ಎಂದು ಹೇಳಬಲ್ಲೆ. ಬಿರಿಯಾನಿ, ಮಾಂಸಾಹಾರ, ಇಟಾಲಿಯನ್‌ ಮತ್ತು ಚೈನೀಸ್‌ ಅಡುಗೆಯನ್ನು ಚೆನ್ನಾಗಿ ಮಾಡುತ್ತೇನೆ. ಅಡುಗೆ ಮಾಡಿ ಬಡಿಸುವುವುದೆಂದರೆ ನನಗೆ ತುಂಬಾ ಖುಷಿ.

ನೋ ಡಯಟ್‌

ನಾನು ಚಾಕೊಲೇಟ್‌, ಐಸ್‌ಕ್ರೀಮ್‌, ಪಿಜ್ಜಾ, ಬರ್ಗರ್‌, ಪಾನಿಪುರಿ, ಗೋಬಿ ಮಂಚೂರಿಯನ್‌ ಇತ್ಯಾದಿಗಳೆಲ್ಲವನ್ನೂ ಸೇವಿಸುತ್ತೇನೆ. ಯಾವುದನ್ನೂ ಅವೈಡ್‌ ಮಾಡುವುದಿಲ್ಲ. ಯಾವ ಪ್ರದೇಶಕ್ಕೆ ಹೋದರೂ ಅಲ್ಲಿನ ಸ್ಥಳೀಯ ಆಹಾರದ ರುಚಿ ನೋಡುತ್ತೇನೆ.

ಪೌಷ್ಟಿಕ ಆಹಾರ

ಆಹಾರ ನೋಡಲು ಅಂದವಾಗಿರಬೇಕು ಮತ್ತು ಟೇಸ್ಟ್‌ ಕೂಡ ಚೆನ್ನಾಗಿರಬೇಕು. ಅದರಲ್ಲಿ ಎಲ್ಲಾ ಜೀವಸತ್ವಗಳಿರಬೇಕು. ನನಗೆ ಒಂದೇ ರೀತಿಯ ಆಹಾರ ಸೇವಿಸಲು ಇಷ್ಟವಾಗುವುದಿಲ್ಲ. ಮನೆ, ಹೋಟೆಲ್‌ ಹೀಗೆ ಎಲ್ಲೇ ಹೋದರೂ ವೆರೈಟಿ ಪುಡ್‌ ತಿನ್ನುತ್ತೇನೆ.

ಒಮ್ಮೆ ನಮ್ಮ ಮನೆಗೆ ಸ್ನೇಹಿತರು ಬಂದಾಗ ನಾನು ಯಾವುದೋ ಸ್ವೀಟ್‌ ಮಾಡಲು ಹೋಗಿದ್ದೆ. ಆದರೆ ಅದು ಪೂರ್ತಿ ಸೀದು ಹೋಗಿತ್ತು. ಅದನ್ನು ನೋಡಿ ಫ್ರೆಂಡ್ಸ್‌ ತುಂಬಾ ನಕ್ಕಿದ್ದರು. ಅಂದಿನಿಂದ ನಾನು ತುಂಬಾ ಎಚ್ಚರವಹಿಸಿ ಅಡುಗೆ ಮಾಡುತ್ತೇನೆ.

ಸಹೇರಾ ಅಫ್ಜಾ, ನಟಿ