ಬೇಸಿಗೆಯಲ್ಲಿ ದೇಹಕ್ಕೆ ನೀರಿನ ಅಂಶ ಹೆಚ್ಚು ಬೇಕು. ವಿವಿಧ ಪಾನೀಯಗಳು ಈ ಕೊರತೆಯನ್ನು ನೀಗಿಸುತ್ತವಾದರೂ, ಇದರ ಜೊತೆಗೆ ಸಲಾಡ್ಗಳನ್ನು ಸೇವಿಸಿದರೆ ದೇಹ ಇನ್ನೂ ತಂಪಾಗಿರುತ್ತದೆ.
ಬಾಂಬೆ ಚಾಟ್ಸ್ ಸಲಾಡ್
ಸಾಮಗ್ರಿ: ಬೇಯಿಸಿದ ಕಾಬೂಲಿ ಕಡಲೆ ಕಾಳು-2 ಬಟ್ಟಲು, ಹೆಚ್ಚಿದ ಸೌತೆಕಾಯಿ-ಅರ್ಧ ಬಟ್ಟಲು, ಹೆಚ್ಚಿದ ಸೇಬು-ಅರ್ಧ ಬಟ್ಟಲು, ಬೇಯಿಸಿ ಹೆಚ್ಚಿದ ಆಲೂಗೆಡ್ಡೆ-1 ಬಟ್ಟಲು, ಹೆಚ್ಚಿದ ಈರುಳ್ಳಿ-1, ಹುಣಸೆ ರಸ-2 ದೊಡ್ಡ ಚಮಚ, ಜೀರಿಗೆ ಪುಡಿ-1 ಟೀ ಸ್ಪೂನ್, ಚಾಟ್ ಮಸಾಲ-1 ದೊಡ್ಡ ಚಮಚ, ಕಿಚನ್ ಕಿಂಗ್ ಪುಡಿ-1 ಟೀ ಸ್ಪೂನ್, ಸಕ್ಕರೆ-3 ದೊಡ್ಡ ಚಮಚ, ಖಾರದ ಪುಡಿ-1 ಟೀ ಸ್ಪೂನ್, ಬ್ಲಾಕ್ ಸಾಲ್ಟ್-1 ಟೀ ಸ್ಪೂನ್, ಉಪ್ಪು-ರುಚಿಗೆ ತಕ್ಕಷ್ಟು.
ವಿಧಾನ: ಒಂದು ಬಟ್ಟಲ್ಲಿನಲ್ಲಿ ಹುಣಸೆ ರಸ, ಉಪ್ಪು ಮತ್ತು ಉಳಿದ ಎಲ್ಲಾ ಸಾಮಗ್ರಿಗಳನ್ನು ಸೇರಿಸಿ ಚೆನ್ನಾಗಿ ಕಲಸಿ ಸೇವಿಸಿ.
ಹೆಸರು ಕಾಳು ಮೊಳಕೆ ಸಲಾಡ್
ಸಾಮಗ್ರಿ: ಮೊಳಕೆಯೊಡೆದ ಹೆಸರುಕಾಳು-ಒಂದೂವರೆ ಬಟ್ಟಲು, ತುರಿದ ಕ್ಯಾರೆಟ್-ಅರ್ಧ ಬಟ್ಟಲು, ತೆಂಗಿನ ತುರಿ-ಕಾಲು ಬಟ್ಟಲು, ಕೊತ್ತಂಬರಿ ಸೊಪ್ಪು-ಸ್ವಲ್ಪ, ಉಪ್ಪು-ರುಚಿಗೆ ತಕ್ಕಷ್ಟು, ಹೆಚ್ಚಿದ ಸೌತೆಕಾಯಿ-ಅರ್ಧ ಬಟ್ಟಲು, ನಿಂಬೆ ರಸ-1 ದೊಡ್ಡ ಚಮಚ, ಒಗ್ಗರಣೆಗೆ ಎಣ್ಣೆ-2 ದೊಡ್ಡ ಚಮಚ, ಸಾಸಿವೆ-ಸ್ವಲ್ಪ, ಹೆಚ್ಚಿದ ಹಸಿ ಮೆಣಸಿನಕಾಯಿ-3, ಕರಿಬೇವು-ಸ್ವಲ್ಪ, ಇಂಗು-1 ಚಿಟಿಕೆ, ಒಣ ಮೆಣಸು-2.
ವಿಧಾನ: ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ ಒಗ್ಗರಣೆ ಸಾಮಗ್ರಿಗಳನ್ನು ಸೇರಿಸಿ ಬಾಡಿಸಿ ತಣ್ಣಗಾದ ನಂತರ ಮೊಳಕೆಯೊಡೆದ ಹೆಸರು ಕಾಳು ಸೇರಿಸಿ ನಂತರ ಕ್ಯಾರೆಟ್, ತೆಂಗಿನ ತುರಿ, ಸೌತೆಕಾಯಿ, ಉಪ್ಪು, ಕೊತ್ತಂಬರಿ ಸೊಪ್ಪು ಮತ್ತು ನಿಂಬೆ ರಸ ಸೇರಿಸಿ ತಿರುವಿ ಸೇವಿಸಿ.
ಟ್ರಾಪಿಕಲ್ ಇಂಡಿಯನ್ ಸಲಾಡ್
ಸಾಮಗ್ರಿ: ಹೆಚ್ಚಿದ ಪೈನಾಪಲ್-1 ಬಟ್ಟಲು, ಹೆಚ್ಚಿದ ಸೇಬು-1, ಹೆಚ್ಚಿದ ಬಾಳೆಹಣ್ಣು-1, ಬಿಡಿಸಿದ ಕಿತ್ತಳೆ ಹಣ್ಣು-2, ಹೆಚ್ಚಿದ ಸೌತೆಕಾಯಿ-1, ಹೆಚ್ಚಿದ ದೊಡ್ಡ ಮೆಣಸಿನಕಾಯಿ-ಅರ್ಧ ಬಟ್ಟಲು, ಹೆಚ್ಚಿ ಬೀಜ ತೆಗೆದ ಟೊಮ್ಯಾಟೋ-ಸ್ವಲ್ಪ, ಡ್ರೆಸ್ಸಿಂಗ್ಗೆ ಮಾವಿನ ಹಣ್ಣಿನ ರಸ ಅಥವಾ ಅವಕಾಡೊ ಪಲ್ಪ್-ಅರ್ಧ ಬಟ್ಟಲು, ಗಟ್ಟಿ ಮೊಸರು-ಅರ್ಧ ಬಟ್ಟಲು, ಫ್ರೆಶ್ ಕ್ರೀಮ್-4 ದೊಡ್ಡ ಚಮಚ, ಧನಿಯಾ ಪುಡಿ-ಅರ್ಧ ಟೀ ಸ್ಪೂನ್, ಖಾರ ಪುಡಿ-ಅರ್ಧ ಟೀ ಸ್ಪೂನ್, ಜೀರಿಗೆ ಪುಡಿ-ಅರ್ಧ ಟೀ ಸ್ಪೂನ್, ಉಪ್ಪು-ರುಚಿಗೆ ತಕ್ಕಷ್ಟು, ಕಾಳು ಮೆಣಸಿನ ಪುಡಿ-ರುಚಿಗೆ ತಕ್ಕಷ್ಟು.
ವಿಧಾನ: ಮಸಾಲೆ ಸಾಮಗ್ರಿಗಳನ್ನೆಲ್ಲಾ ಮಿಕ್ಸಿಗೆ ಹಾಕಿ ರುಬ್ಬಿ ಎಂಟು ಗಂಟೆಗಳ ಕಾಲ ಫ್ರಿಜ್ನಲ್ಲಿ ಇಡಿ. ನಂತರ ಇದನ್ನು ಬಡಿಸುವಾಗ ಹೆಚ್ಚಿದ ಹಣ್ಣು ಮತ್ತು ತರಕಾರಿಗೆ ಡ್ರೆಸ್ಸಿಂಗನ್ನು ಸೇರಿಸಿ ಚೆನ್ನಾಗಿ ಕಲಸಿ ಲೆಕ್ಯೂಸ್ ಎಲೆಯ ಮೇಲಿ ಹರಡಿ ಅದರ ಮೇಲೆ ಚೆರ್ರಿ ಹಣ್ಣನ್ನು ಅಲಂಕರಿಸಿ ಸರ್ವ್ ಮಾಡಿ.
ಕ್ಯಾಬೇಜ್-ಮಯೋನೈಸ್ ಸಲಾಡ್
ಸಾಮಗ್ರಿ: ಮೊಟ್ಟೆ ಸಹಿತ ಅಥವಾ ರಹಿತ ಮಯೋನೈಸ್-ಅರ್ಧ ಬಟ್ಟಲು, ತುರಿದ ಎಲೆಕೋಸು-2 ಬಟ್ಟಲು, ತುರಿದ ಕ್ಯಾರೆಟ್-1 ಬಟ್ಟಲು, ನಿಂಬೆ ರಸ-1 ದೊಡ್ಡ ಚಮಚ, ಉಪ್ಪು, ಕರಿ ಮೆಣಸು ಪುಡಿ ಮತ್ತು ಸಕ್ಕರೆ-ರುಚಿಗೆ ತಕ್ಕಂತೆ.
ವಿಧಾನ: ಮಯೊಸೈಸ್ ಒಂದನ್ನು ಬಿಟ್ಟು ಮಿಕ್ಕ ಎಲ್ಲಾ ಸಾಮಗ್ರಿಗಳನ್ನು ಬಟ್ಟಲಿಗೆ ಹಾಕಿ ಚೆನ್ನಾಗಿ ಕಲಸಿ ಫ್ರಿಜ್ನಲ್ಲಿಡಿ. ಇದನ್ನು ಬಡಿಸುವ ಮುನ್ನ ನಿಂಬೆ ರಸ, ಉಪ್ಪು, ಮೆಣಸಿನ ಪುಡಿ ಸೇರಿಸಿ ಚೆನ್ನಾಗಿ ಕಲಸಿ ಲೆಕ್ಯೂಸ್ ಎಲೆಯ ಮೇಲೆ ಹರಡಿ.
ವಿಜಯಲಕ್ಷ್ಮಿ ರೆಡ್ಡಿ