ಅವರೆಕಾಳಿನ ರುಚಿ ವೈವಿಧ್ಯ

ಚಳಿಗಾಲದಲ್ಲಿ ಬಹುತೇಕ ಮನೆಗಳಲ್ಲಿ ಅವರೆಕಾಳಿನ ಖಾದ್ಯಗಳು ಸಾಮಾನ್ಯ. ರಕ್ತದೊತ್ತಡ ಮತ್ತು ಮಧುಮೇಹ ಸಮಸ್ಯೆಯಿದ್ದವರು ಹಸಿ ಅವರೆಕಾಳನ್ನು ಸಾರು ಅಥವಾ ಪಲ್ಯದ ರೂಪದಲ್ಲಿ ಸೇವಿಸುತ್ತಾ ಬಂದರೆ ತುಂಬಾ ಒಳ್ಳೆಯದು.

ವೇದಾವತಿ ಹೆಚ್‌. ಎಸ್‌

ಅವರೆಕಾಳು ಉಪ್ಪಿಟ್ಟು

ಸಾಮಗ್ರಿ: ಸಿಪ್ಪೆ ತೆಗೆದ ಅವರೆಕಾಳು-ಅರ್ಧ ಕಪ್‌, ಈರುಳ್ಳಿ-2, ಕ್ಯಾರೆಟ್‌ ತುರಿ-ಅರ್ಧ ಕಪ್‌, ರವೆ-1 ಕಪ್‌, ಹಸಿ ಮೆಣಸಿನಕಾಯಿ-3, ಕೊತ್ತಂಬರಿ ಸೊಪ್ಪು-ಸ್ವಲ್ಪ, ಕರಿಬೇವಿನ ಎಲೆ-ಸ್ವಲ್ಪ, ಸಣ್ಣಗೆ ಹೆಚ್ಚಿದ ಶುಂಠಿ-1 ಇಂಚು, ತುಪ್ಪ-ಸ್ವಲ್ಪ, ಎಣ್ಣೆ-ಕಾಲು ಕಪ್‌, ಸಾಸಿವೆ-1 ಟೀ ಚಮಚ, ಕಡಲೆಬೇಳೆ-2 ಟೀ ಚಮಚ, ಉದ್ದಿನಬೇಳೆ-2 ಟೀ ಚಮಚ, ತೆಂಗಿನಕಾಯಿ ತುರಿ-ಅರ್ಧ ಕಪ್‌, ನಿಂಬೆ ಹಣ್ಣು-ಅರ್ಧ, ಉಪ್ಪು-ರುಚಿಗೆ ತಕ್ಕಷ್ಟು.

ವಿಧಾನ: ಅವರೆಕಾಳನ್ನು ಸ್ವಲ್ಪ ಮೆತ್ತಗೆ ಬೇಯಿಸಿ. ತುಪ್ಪ ಬಿಸಿ ಮಾಡಿ ರವೆ ಹುರಿಯಿರಿ. ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ ಸಾಸಿವೆ, ಕಡಲೆಬೇಳೆ, ಉದ್ದಿನಬೇಳೆ, ಶುಂಠಿ, ಕರಿಬೇವು ಎಲೆಯನ್ನು ಹುರಿಯಿರಿ. ನಂತರ ಇದಕ್ಕೆ ಹೆಚ್ಚಿದ ಈರುಳ್ಳಿ ಮತ್ತು ಕ್ಯಾರೆಟ್‌ ತುರಿ ಹಾಕಿ ಹುರಿಯಿರಿ. ನಂತರ ಬೆಂದ ಅವರೆಕಾಳನ್ನು ಮಿಶ್ರ ಮಾಡಿ. ಇದಕ್ಕೆ ನಾಲ್ಕು ಕಪ್‌ ನೀರು ಹಾಕಿ ಕುದಿಸಿ ಉಪ್ಪು ಸೇರಿಸಿ. ಈ ಮಿಶ್ರಣ ಚೆನ್ನಾಗಿ ಕುದಿದ ನಂತರ ರವೆ ಹಾಕಿ ಮಗುಚಿ. ಇದು ಸ್ವಲ್ಪ ಗಟ್ಟಿಯಾದ ನಂತರ ಸಣ್ಣ ಉರಿಯಲ್ಲಿ ಉಪ್ಪಿಟ್ಟನ್ನು ಐದು ನಿಮಿಷಗಳ ಕಾಲ ಮುಚ್ಚಿ ಬೇಯಿಸಿ. ಕೊನೆಗೆ ನಿಂಬೆ ರಸ, ತೆಂಗಿನಕಾಯಿ ತುರಿ, ಕೊತ್ತಂಬರಿ ಸೊಪ್ಪು ಹಾಕಿ ತಿರುವಿ ಕೆಳಗಿಳಿಸಿ.

ಸಾಂಬಾರ್‌

ಸಾಮಗ್ರಿ: ಅವರೆಕಾಳು-ಅರ್ಧ ಕಿಲೋ, ಪುಡಿ ಮಸಾಲೆಗೆ ಧನಿಯಾ-2 ಟೀ ಚಮಚ, ಒಣ ಮೆಣಸು-8, ಜೀರಿಗೆ-2 ಚಮಚ, ಮೆಂತ್ಯೆ ಕಾಳು-1 ಚಮಚ, ಸಾಸಿವೆ-2 ಟೀ ಚಮಚ, ಇಂಗು-1 ಚಿಟಿಕೆ, ಅರಶಿನ ಪುಡಿ-ಅರ್ಧ ಚಮಚ, ಕಾಳುಮೆಣಸು-1 ಚಮಚ, ಕರಿಬೇವಿನ ಎಲೆ-ಸ್ವಲ್ಪ, ರುಬ್ಬುವ ಮಸಾಲೆಗೆ ತೆಂಗಿನಕಾಯಿ ತುರಿ-1 ಬಟ್ಟಲು, ಕೊತ್ತಂಬರಿ ಸೊಪ್ಪು-ಅರ್ಧ ಕಟ್ಟು, ಬೇಯಿಸಿದ ಅವರೆಕಾಳು-ಸ್ವಲ್ಪ, ಅಕ್ಕಿ-2 ಟೀ ಚಮಚ, ಹುಣಸೆ ಹಣ್ಣು-ನಿಂಬೆ ಹಣ್ಣಿನ ಗಾತ್ರದಷ್ಟು, ಉಪ್ಪು-ರುಚಿಗೆ ತಕ್ಕಷ್ಟು.

ವಿಧಾನ: ಪುಡಿ ಮಸಾಲೆಯ ಸಾಮಗ್ರಿಯನ್ನು ಹುರಿದು ಪುಡಿ ಮಾಡಿಡಿ. ಅವರೆಕಾಳನ್ನು ತೊಳೆದು ಬೇಯಿಸಿ. ಬೆಂದ ಅವರೆಕಾಳನ್ನು ಸ್ವಲ್ಪ ತೆಗೆದು ಮಿಕ್ಸಿ ಜಾರ್‌ಗೆ ಹಾಕಿ ರುಬ್ಬುವ ಮಸಾಲೆ ಸಾಮಗ್ರಿ ಸೇರಿಸಿ ನುಣ್ಣಗೆ ರುಬ್ಬಿ. ಪುಡಿ ಮಸಾಲೆಯನ್ನು ಅವರೆಕಾಳಿಗೆ ಹಾಕಿ ಕುದಿಸಿ. ನಂತರ ಇದಕ್ಕೆ ರುಬ್ಬಿದ ಮಿಶ್ರಣ ಮತ್ತು ಚಿಕ್ಕ ತುಂಡು ಬೆಲ್ಲ ಹಾಕಿ ಸಣ್ಣ ಉರಿಯಲ್ಲಿ ಕುದಿಸಿ. ತುಪ್ಪದಲ್ಲಿ ಇಂಗು ಮತ್ತು ಸಾಸಿವೆ ಒಗ್ಗರಣೆ ಮಾಡಿ ಸಾಂಬಾರ್‌ಗೆ ಹಾಕಿ ಒಲೆಯಿಂದ ಕೆಳಗಿಳಿಸಿ.

ಪುಲಾವ್‌

ಸಾಮಗ್ರಿ: ಬಾಸುಮತಿ ಅಕ್ಕಿ-ಒಂದೂವರೆ ಕಪ್‌, ಅವರೆಕಾಳು-1 ಕಪ್‌, ಹೆಚ್ಚಿದ ಈರುಳ್ಳಿ-1 ಕಪ್‌, ಹೆಚ್ಚಿದ ಟೊಮೇಟೊ-ಅರ್ಧ ಕಪ್‌, ನಿಂಬೆ ಹಣ್ಣು-ಅರ್ಧ, ಉಪ್ಪು-ರುಚಿಗೆ ತಕ್ಕಷ್ಟು, ತುಪ್ಪ-5 ಟೀ ಚಮಚ, ಲವಂಗ-4, ಏಲಕ್ಕಿ-2, ಪುಲಾವ್‌ ಎಲೆ-1, ಚಕ್ಕೆ-1 ಇಂಚು, ರುಬ್ಬುವ ಮಸಾಲೆಗೆ ತೆಂಗಿನಕಾಯಿ ತುರಿ-ಅರ್ಧ ಕಪ್‌, ಬೆಳ್ಳುಳ್ಳಿ ಎಸಳು-10, ಕೊತ್ತಂಬರಿ ಸೊಪ್ಪು-ಸ್ವಲ್ಪ, ಹಸಿ ಮೆಣಸಿನಕಾಯಿ-2, ಶುಂಠಿ-1 ಇಂಚು.

ವಿಧಾನ: ಅಕ್ಕಿಯನ್ನು ನೀರಿನಲ್ಲಿ ಅರ್ಧ ಗಂಟೆ ನೆನೆಸಿಡಿ. ರುಬ್ಬುವ ಮಸಾಲೆ ಸಾಮಗ್ರಿಯನ್ನು ಮಿಕ್ಸಿ ಜಾರ್‌ಗೆ ಹಾಕಿ ನುಣ್ಣಗೆ ರುಬ್ಬಿ. ಕುಕ್ಕರ್‌ನಲ್ಲಿ ತುಪ್ಪ ಬಿಸಿ ಮಾಡಿ ಪುಲಾವ್‌ ಎಲೆ, ಏಲಕ್ಕಿ, ಚಕ್ಕೆ, ಲವಂಗ ಹಾಕಿ ಹುರಿಯಿರಿ. ನಂತರ ಇದಕ್ಕೆ ಈರುಳ್ಳಿ ಹಾಕಿ ಬಾಡಿಸಿ. ಆಮೇಲೆ ಟೊಮೇಟೊ ಮತ್ತು ಅವರೆಕಾಳು ಹಾಕಿ. ಈ ಮಿಶ್ರಣಕ್ಕೆ ರುಬ್ಬಿದ ಮಸಾಲೆ ಹಾಕಿ ಹಸಿ ವಾಸನೆ ಹೋಗುವವರೆಗೆ ಹುರಿಯಿರಿ. ಬಾಸುಮತಿ ಅಕ್ಕಿ ಸೇರಿಸಿ ನೀರು ಹಾಕಿ ಮುಚ್ಚಳ ಮುಚ್ಚಿ ಎರಡು ಅಥವಾ ಮೂರು ವಿಶಲ್‌ ಬರುವವರೆಗೆ ಬೇಯಿಸಿ.

ಅವರೆಕಾಳಿನ ಕರ್ರಿ

ಸಾಮಗ್ರಿ: ಅವರೆಕಾಳು-1 ಕಪ್‌, ಹೆಚ್ಚಿದ ಈರುಳ್ಳಿ-1 ಕಪ್‌, ಹೆಚ್ಚಿದ ಟೊಮೇಟೊ-1 ಕಪ್‌, ತೆಂಗಿನಕಾಯಿ ತುರಿ-1 ಕಪ್‌, ಶುಂಠಿ-1 ಇಂಚು, ಬೆಳ್ಳುಳ್ಳಿ-10 ಎಸಳು, ಚಕ್ಕೆ-1 ಇಂಚು, ಲವಂಗ-4, ಎಣ್ಣೆ-4 ಟೀ ಚಮಚ, ಧನಿಯ ಪುಡಿ-2 ಟೀ ಚಮಚ, ಖಾರ ಪುಡಿ-1 ಟೀ ಚಮಚ, ಉಪ್ಪು-ರುಚಿಗೆ ತಕ್ಕಷ್ಟು, ಕೊತ್ತಂಬರಿ ಸೊಪ್ಪು-ಸ್ವಲ್ಪ, ಬೆಲ್ಲ-ಚಿಕ್ಕ ತುಂಡು, ಸಾಸಿವೆ-1 ಟೀ ಚಮಚ, ಕರಿಬೇವು-ಸ್ವಲ್ಪ.

ವಿಧಾನ: ಅವರೆಕಾಳಿಗೆ ನೀರು ಹಾಕಿ ಬೇಯಿಸಿ. ಎಣ್ಣೆ ಬಿಸಿ ಮಾಡಿ ಚಕ್ಕೆ, ಲವಂಗ, ಬೆಳ್ಳುಳ್ಳಿ ಹಾಕಿ ಬಾಡಿಸಿ. ನಂತರ ಈರುಳ್ಳಿ ಹಾಕಿ ಕೆಂಬಣ್ಣ ಬರುವವರೆಗೆ ಹುರಿಯಿರಿ. ಆಮೇಲೆ ಟೊಮೇಟೊ ಹಾಕಿ ಚೆನ್ನಾಗಿ ಬೇಯಿಸಿ. ಕೊತ್ತಂಬರಿ ಸೊಪ್ಪು ಮತ್ತು ತೆಂಗಿನಕಾಯಿ ತುರಿ ಹಾಕಿ ಬಾಡಿಸಿ. ಈ ಮಿಶ್ರಣ ಬೆಂದ ನಂತರ ಮಿಕ್ಸಿ ಜಾರ್‌ಗೆ ಹಾಕಿ ನುಣ್ಣಗೆ ರುಬ್ಬಿ. ಇನ್ನೊಂದೆಡೆ ಎರಡು ಟೀ ಚಮಚ ತುಪ್ಪ ಬಿಸಿ ಮಾಡಿ ಅದಕ್ಕೆ ಸಾಸಿವೆ ಮತ್ತು ಕರಿಬೇವು ಸೊಪ್ಪು ಹಾಕಿ. ಸಾಸಿವೆ ಸಿಡಿದ ನಂತರ ರುಬ್ಬಿದ ಮಸಾಲೆ, ಬೆಲ್ಲ, ಉಪ್ಪು ಹಾಕಿ ಚೆನ್ನಾಗಿ ಕುದಿಸಿ. ಕೊನೆಗೆ ಇದಕ್ಕೆ ಬೆಂದ ಅವರೆಕಾಳು ಹಾಕಿ ಸಣ್ಣ ಉರಿಯಲ್ಲಿ ಕುದಿಸಿ.