ಮಕ್ಕಳ ಊಟದ ಡಬ್ಬಿಯನ್ನು ಆಕರ್ಷಕವಾಗಿರಿಸಿ

ಮಕ್ಕಳಿಗೆ ತಿನ್ನಿಸುವುದೆಂದರೆ ಅದು ದೊಡ್ಡ ಸಾಹಸವೇ ಸರಿ. ಸದಾ ಹೊಸ ರುಚಿಯ ತಿಂಡಿ ಬಯಸುವ ಮಕ್ಕಳ ಹೊಟ್ಟೆ ತುಂಬಿಸುವುದೆಂದರೆ ತಾಯಂದಿರಿಗೆ ದೊಡ್ಡ ತಲೆನೋವು. ಪ್ರತಿ ದಿ ಇಡ್ಲಿನಾ ಅಮ್ಮ, ಅದೇ ಉಪ್ಪಿಟ್ಟಾ ಎಂದು ರಾಗ ಎಳೆಯುವ ಮಕ್ಕಳಿಗೆ ಹೊಸ ಹೊಸ ರೀತಿಯ ತಿನಿಸುಗಳನ್ನು ಮಾಡುವುದು ಪ್ರತಿ ತಾಯಂದಿರಿಗೂ ಒಂದು ಚಾಲೆಂಜ್‌.

ಸ್ವಲ್ಪ ಕ್ರಿಯೇಟಿವ್‌ ಆಗಿ ಯೋಚಿಸಿದರೆ ಈ ಸಾದಾ ತಿನಿಸುಗಳಿಂದಲೇ ಹೊಸ ರುಚಿಯ ತಿನಿಸುಗಳನ್ನು ಮಾಡಬಹುದು.

ವೆಜ್‌ ರೋಲ್‌

ಸಾಮಗ್ರಿ: ಗೋಧಿ ಹಿಟ್ಟು-2 ಕಪ್‌, ಮೈದಾ ಹಿಟ್ಟು-1 ಕಪ್‌, ಈರುಳ್ಳಿ-4, ಕ್ಯಾರೆಟ್‌-4, ಕ್ಯಾಪ್ಸಿಕಂ-2, ಎಲೆಕೋಸು-ಅರ್ಧ, ಬೀನ್ಸ್‌-ಸ್ವಲ್ಪ, ಉಪ್ಪು-ರುಚಿಗೆ ತಕ್ಕಷ್ಟು, ಕಾಳುಮೆಣಸಿನ ಪುಡಿ, ಅಕ್ಕಿ ಹಿಟ್ಟು-1 ಚಮಚ, ಎಣ್ಣೆ, ಒಗ್ಗರಣೆಗೆ ಜೀರಿಗೆ, ಸಾಸಿವೆ, ಇಂಗು, ಕರಿಬೇವು.

ವಿಧಾನ: ಗೋಧಿ ಹಿಟ್ಟಿಗೆ ಮೈದಾ, ಉಪ್ಪು ಮತ್ತು ನೀರು ಬೆರೆಸಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿ ಸ್ವಲ್ಪ ಎಣ್ಣೆ ಹಚ್ಚಿ ಹತ್ತು ನಿಮಿಷ ಇಡಿ. ತರಕಾರಿಗಳನ್ನು ಚಿಕ್ಕ ತುಂಡುಗಳಾಗಿ ಕತ್ತರಿಸಿ. ನಾಲ್ಕು ಚಮಚ ಎಣ್ಣೆಯನ್ನು ಬಿಸಿ ಮಾಡಿ ಜೀರಿಗೆ, ಸಾಸಿವೆ, ಕರಿಬೇವು ಒಗ್ಗರಣೆ ಹಾಕಿ. ನಂತರ ಇದಕ್ಕೆ ತರಕಾರಿ ತುಂಡುಗಳನ್ನು ಹಾಕಿ ಸಣ್ಣ ಉರಿಯಲ್ಲಿ ಬೇಯಿಸಿ. ಆಮೇಲೆ ಉಪ್ಪು ಮತ್ತು ಕಾಳುಮೆಣಸಿನ ಪುಡಿ ಹಾಕಿ ತಿರುವಿ. ಕಲಸಿಟ್ಟ ಗೋಧಿ ಕಣಕದಿಂದ ಚಿಕ್ಕ ಚಿಕ್ಕ ಚಪಾತಿ ಮಾಡಿ. ಇದರ ಮಧ್ಯ ಭಾಗಕ್ಕೆ ತರಕಾರಿ ಮಿಶ್ರಣ ಹಾಕಿ ಸುರುಳಿ ಸುತ್ತಿ. ಈ ರೋಲನ್ನು ಸಿಲ್ವರ್‌ ಪೇಪರ್‌ನಲ್ಲಿ ಅರ್ಧ ಭಾಗ ಸುತ್ತಿ ಲಂಚ್‌ ಬಾಕ್ಸ್‌ಗೆ ಹಾಕಿ.

ಮಸಾಲ ಇಡ್ಲಿ

ಸಾಮಗ್ರಿ: ಇಡ್ಲಿ ಹಿಟ್ಟು, ಆಲೂಗೆಡ್ಡೆ-4, ಈರುಳ್ಳಿ-2, ಶುಂಠಿ ಬೆಳ್ಳುಳ್ಳಿ ಪೇಸ್ಟ್‌-1 ಚಮಚ, ಹಸಿ ಮೆಣಸಿನಕಾಯಿ ಪೇಸ್ಟ್‌-1 ಚಮಚ, ಉಪ್ಪು-ರುಚಿಗೆ ತಕ್ಕಷ್ಟು, ಒಗ್ಗರಣೆಗೆ ಜೀರಿಗೆ, ಸಾಸಿವೆ, ಕರಿಬೇವು, ಇಂಗು, ಉದ್ದಿನಬೇಳೆ.

ವಿಧಾನ: ಆಲೂಗೆಡ್ಡೆಯನ್ನು ಚೆನ್ನಾಗಿ ಬೇಯಿಸಿ ಸಿಪ್ಪೆ ತೆಗೆದು ಪೇಸ್ಟ್‌ ಥರ ಮಾಡಿ. ಬಾಣಲೆಯಲ್ಲಿ ಒಗ್ಗರಣೆ ಹಾಕಿ ಅದಕ್ಕೆ ಹೆಚ್ಚಿದ ಈರುಳ್ಳಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್‌ ಮತ್ತು ಮೇಲಿನ ಸಾಮಗ್ರಿಗಳನ್ನು ಒಂದೊಂದಾಗಿ ಹಾಕಿ ಹುರಿಯಿರಿ. ಆಮೇಲೆ ಆಲೂಗೆಡ್ಡೆ ಪೇಸ್ಟ್‌ ಬೆರೆಸಿ ತಿರುವಿ ಪಾತ್ರೆಯನ್ನು ಕೆಳಗಿಳಿಸಿ. ಇಡ್ಲಿ ಪಾತ್ರೆಗೆ ಒಂದು ಚಮಚ ಇಡ್ಲಿ ಹಿಟ್ಟು ಹಾಕಿ. ಅದರ ಮೇಲೆ ಒಂದು ಚಮಚ ಆಲೂಗೆಡ್ಡೆ ಮಸಾಲ ಹಾಕಿ. ಮತ್ತೆ ಅದರ ಮೇಲೆ ಒಂದು ಚಮಚ ಇಡ್ಲಿ ಹಿಟ್ಟು ಹಾಕಿ. ಹೀಗೆ ಎಲ್ಲಾ ತಟ್ಟೆಗೆ ಹಿಟ್ಟು ಹಾಕಿ ಹತ್ತು ನಿಮಿಷ ಬೇಯಿಸಿ.

ಬ್ರೆಡ್‌ ಪಕೋಡ

ಸಾಮಗ್ರಿ: ಕಡಲೆ ಹಿಟ್ಟು-2 ಕಪ್‌, ಅಕ್ಕಿ ಹಿಟ್ಟು-1 ಕಪ್‌, ಕೆಂಪು ಖಾರ ಪುಡಿ-2 ಚಮಚ, ಉಪ್ಪು-ರುಚಿಗೆ ತಕ್ಕಷ್ಟು, ಕರಿಯಲು ಎಣ್ಣೆ, ಜೀರಿಗೆ ಪುಡಿ-ಅರ್ಧ ಚಮಚ, ಬ್ರೆಡ್‌ ಪ್ಯಾಕೆಟ್‌-1.

ವಿಧಾನ: ಒಂದು ಬ್ರೆಡ್ಡನ್ನು ನಾಲ್ಕು ಪೀಸ್‌ ಮಾಡಿಡಿ. ಕಡಲೆ ಹಿಟ್ಟಿಗೆ ಜೀರಿಗೆ ಪುಡಿ, ಉಪ್ಪು, ಕೆಂಪು ಖಾರ ಪುಡಿ, ಅಕ್ಕಿ ಹಿಟ್ಟು ಮತ್ತು ನೀರು ಬೆರೆಸಿ ಬಜ್ಜಿ ಹಿಟ್ಟಿನ ಹದಕ್ಕೆ ಕಲಸಿ ಹದಿನೈದು ನಿಮಿಷ ಬಿಡಿ. ನಂತರ ಬ್ರೆಡ್‌ ಪೀಸ್‌ಗಳನ್ನು ಕಲಸಿಟ್ಟ ಹಿಟ್ಟಲ್ಲಿ ಅದ್ದಿ ಕಾದ ಎಣ್ಣೆಯಲ್ಲಿ ಕರಿಯಿರಿ.