ಗೋಡಂಬಿ ಸಂಗ್ರಹಣೆ ಹೀಗಿರಲಿ

ಗೋಡಂಬಿ ಎಂದಾಕ್ಷಣ ಅದರಿಂದ ತಯಾರಿಸುವ ರುಚಿ ರುಚಿಯಾದ ತಿನಿಸುಗಳು ಕಣ್ಣು ಮುಂದೆ ಬಂದು ಬಾಯಲ್ಲಿ ನೀರೂರುತ್ತದೆ. ಗೋಡಂಬಿ ಕೇವಲ ತಿಂಡಿಗಷ್ಟೇ ಸೀಮಿತವಲ್ಲ. ಇದರಲ್ಲಿರುವ ಪೋಷಕಾಂಶಗಳು ಮಾನವನ ದೇಹಕ್ಕೆ ಪ್ರಯೋಜನಕಾರಿಯಾಗಿದೆ. ಗೋಡಂಬಿಗಾಗಿಯೇ ಒಂದು ದಿನವನ್ನು ಮೀಸಲಿಡಲಾಗಿದ್ದು, ಅಮೆರಿಕದಲ್ಲಿ ಗೋಡಂಬಿ ದಿನವನ್ನು ನವೆಂಬರ್‌ 23ರಂದು ಆಚರಿಸಲಾಗುತ್ತದೆ.

ಈ ಗೋಡಂಬಿಯನ್ನು ಸೂಕ್ತವಾಗಿ ಸಂಗ್ರಹಿಸದಿದ್ದರೆ ಮೆತ್ತಗಾಗಿ ಹೋಗುತ್ತವೆ. ಇದನ್ನು ತಪ್ಪಿಸಲು ಇಲ್ಲಿದೆ ಟಿಪ್ಸ್

-ಪೌಷ್ಟಿಕಾಂಶ ಆಗರವಾಗಿರುವ ಗೋಡಂಬಿ ಬೀಜಗಳನ್ನು ಸೂಕ್ತವಾಗಿ ಸಂಗ್ರಹಿಸಿ ಇಡದಿದ್ದರೆ ಅವು ಮೆತ್ತಗಾಗುತ್ತವೆ ಮತ್ತು ಪೆಡಸಾಗುತ್ತವೆ. ಕೆಲವು ಸುಲಭ ವಿಧಾನಗಳ ಮೂಲಕ ಗೋಡಂಬಿಯನ್ನು ತಾಜಾವಾಗಿಡಬಹುದು.

-ಗೋಡಂಬಿಯನ್ನು ಗಾಳಿಯಾಡದ ಪ್ಲಾಸ್ಟಿಕ್‌ ಚೀಲ, ಡಬ್ಬ ಅಥವಾ ಫಾಯಿಲ್‌ ಲೈನ್‌ಡ್‌ ಕ್ಯಾನ್‌ಗಳಲ್ಲಿ ಸಂಗ್ರಹಿಸಿ ಇಡಿ.

-ಇದರ ಡಬ್ಬಗಳನ್ನು ತಂಪಾದ ಮತ್ತು ಒಣದಾಗಿರುವ ಜಾಗಗಳಲ್ಲಿ ಇಡಿ. ಇದನ್ನು ಫ್ರಿಜ್‌ನಲ್ಲಿಟ್ಟರೆ ಹೆಚ್ಚು ಸಮಯದವರೆಗೆ ತಾಜಾವಾಗಿರುವುದಿಲ್ಲ. ಆದರೆ ಫ್ರೀಜರ್‌ನಲ್ಲಿಟ್ಟರೆ ಒಂದು ವರ್ಷದವರೆಗೆ ಇರುತ್ತದೆ.

-ಇಡೀ ಗೋಡಂಬಿಗಳು ತುಂಬಾ ದಿನಗಳವರೆಗೆ ಫ್ರೆಶ್‌ ಆಗಿರುತ್ತವೆ. ಎರಡು ಭಾಗಗಳಾಗಿರುವ ಅಥವಾ ತುಂಡಾಗಿರುವ ಗೋಡಂಬಿ ಬೇಗನೆ ಹಾಳಾಗುತ್ತವೆ.

-ಅಡುಗೆಗೆ ಗೋಡಂಬಿ ಬಳಸುವ ಮುನ್ನ ಅದನ್ನು ತಿಂದು ಪರೀಕ್ಷಿಸಿ. ಇದರಿಂದ ಆ ಗೋಡಂಬಿ ಚೆನ್ನಾಗಿದೆಯೇ ಇಲ್ಲವೇ ಹಾಳಾಗಿದೆಯೇ ಎಂದು ತಿಳಿಯುತ್ತದೆ.