- ಉಮಾ ಸರ್ವೇಶ್
ರುಚಿ ಜತೆ ಪೌಷ್ಟಿಕ ಆಹಾರವಾಗಿಯೂ ಉತ್ತರ ಕನ್ನಡದ ಕರಾವಳಿ ಭಾಗದಲ್ಲಿ ಮಾಟೊಡಿ ಫೇಮಸ್.
ಮೆಂತ್ಯ ಸೊಪ್ಪು ಮತ್ತು ಕಡಲೆಬೇಳೆಯಿಂದ ತಯಾರಾಗುವ ಇದು ಘಮಘಮ ಪರಿಮಳದಿಂದಲೇ ಎಲ್ಲ್ಲರನ್ನೂ ಆಕರ್ಷಿಸುತ್ತದೆ.
ಒಂದು ಕಡೆಯಿಂದ ಮತ್ತೊಂದು ಕಡೆ ಇದರ ರುಚಿ ಹರಡಿ ಕರಾವಳಿಯನ್ನೂ ಮೀರಿ ರಾಜ್ಯಾದ್ಯಂತ ಬಹುತೇಕ ಮನೆಗಳಲ್ಲಿ ಫೇಮಸ್ ಆಗಿದೆ. ಮೆಂತ್ಯೆ ಸೊಪ್ಪು ಹಾಗೂ ಕಡಲೆಬೇಳೆಯಲ್ಲಿ ವಿಟಮಿನ್ಸ್ ಇರುವುದರಿಂದ ಆರೋಗ್ಯಕ್ಕೆ ಇದು ತುಂಬ ಒಳ್ಳೆಯದು. ಇದನ್ನು ಮಾಡಲು ಕೂಡ ತುಂಬ ಸುಲಭ. ಅನ್ನದ ಜೊತೆ ಎಣ್ಣೆ ಹಾಕಿ ಕಲಸಿ ತಿಂದರೆ ತುಂಬ ರುಚಿ. ದೋಸೆ , ಚಪಾತಿ , ರೋಟಿ ಜೊತೆಯಲ್ಲೂ ತಿನ್ನಬಹುದು. ಫ್ರಿಜ್ನಲ್ಲಿ 5,6 ದಿನ ಇಟ್ಟು ಬಳಸಬಹುದು.
ಸಾಮಗ್ರಿ: ಕಡಲೆಬೇಳೆ 1ಕಪ್, ಸಣ್ಣಗೆ ಹೆಚ್ಚಿದ ಮೆಂತ್ಯೆ ಸೊಪ್ಪು 4 ಕಪ್, ಕಾಯಿ ತುರಿ 1/2 ಕಪ್, ಹಸಿ ಮೆಣಸಿನಕಾಯಿ 5,6 ಜೀರಿಗೆ 1ಸ್ಪೂನ್, ರುಚಿಗೆ ಉಪ್ಪು , ಇಂಗು , ಎಣ್ಣೆ. 8-10 ಸ್ಪೂನ್ , ಒಗ್ಗರಣೆಗೆ ಸಾಸಿವೆ , ಉದ್ದಿನಬೇಳೆ , ಕಡಲೆಬೇಳೆ, ಒಣಮೆಣಸಿನಕಾಯಿ .
ವಿಧಾನ
ಕಡಲೆಬೇಳೆಯನ್ನು ಚೆನ್ನಾಗಿ ತೊಳೆದು ನೆನೆಸಿ. ನೆನೆದ ಬೇಳೆ ನೀರನ್ನು ಬಸಿದು ಮೆಣಸಿನಕಾಯಿ, ಜೀರಿಗೆ , ಕಾಯಿ ಎಲ್ಲ ಸೇರಿಸಿ ಮಿಕ್ಸಿ ಮಾಡಿ. ಬಾಣಲೆಯಲ್ಲಿ ಸೊಪ್ಪನ್ನು ಬೇಯಿಸಿ ತಿರುವಿದ್ದನ್ನು ಸೇರಿಸಿ ಸ್ವಲ್ಪ ಎಣ್ಣೆ ಹಾಕಿ ಕೈಯಾಡಿಸಿ. ಬೆಂದ ಮೇಲೆ ಸಾಸಿವೆ ಬೇಳೆ ಇಂಗು ಒಗ್ಗರಣೆ ಹಾಕಿ. ರುಚಿಯಾದ ಮಾಟೊಡಿ ರೆಡಿ.