ದಸರಾ ಸಂಭ್ರಮ ಹೆಚ್ಚಿಸುವ ಸಿಹಿ

ನವರಾತ್ರಿಯ ಕೊನೆಯ ಎರಡು ದಿನಗಳಲ್ಲಿಸಿಹಿ ತಿಂಡಿಗಳದ್ದೇ ದರ್ಬಾರ್‌. ಆಯುಧ ಪೂಜೆ, ವಿಜಯದಶಮಿ ರಂಗೇರುವುದೇ ವೈವಿಧ್ಯಮಯ ಸಿಹಿ ತಿಂಡಿಗಳ ಕೊಡು ಕೊಳ್ಳುವಿಕೆಯಿಂದ. ಈ ಬಾರಿಯ ಹಬ್ಬದೂಟಕ್ಕೆ ಮತ್ತು ಆತ್ಮೀಯರಿಗೆ ಕೊಡುವ ರುಚಿಕರ ಸ್ವೀಟ್‌ಗಳನ್ನು ಮನೆಯಲ್ಲಿಯೇ ಮಾಡಿ ಸಂಭ್ರಮಿಸಿ.

ವಿಜಯಲಕ್ಷ್ಮಿ ರೆಡ್ಡಿ

ಬಾಂಬೆ ಹಲ್ವ

ಸಾಮಗ್ರಿ: ನಿಂಬೆ ರಸ-1 ಟೀ ಸ್ಪೂನ್‌, ಏಲಕ್ಕಿ ಪುಡಿ-1 ಟೀ ಸ್ಪೂನ್‌, ಕಾರ್ನ್‌ ಫ್ಲೋರ್‌-ಅರ್ಧ ಬಟ್ಟಲು, ಕಿತ್ತಳೆ ಬಣ್ಣ-ಸ್ವಲ್ಪ, ಸಣ್ಣಗೆ ಹೆಚ್ಚಿದ ಬಾದಾಮಿ-ಸ್ವಲ್ಪ, ತುಪ್ಪ-ಕಾಲು ಬಟ್ಟಲು, ಬಿಸಿ ನೀರಿನಲ್ಲಿನೆನೆಸಿದ ಕುಂಕುಮ ಕೇಸರಿ-ಸ್ವಲ್ಪ, ನೀರು-ಒಂದೂವರೆ ಬಟ್ಟಲು.

ವಿಧಾನ: ಒಂದು ಬಟ್ಟಲು ನೀರಿಗೆ ಕಾರ್ನ್‌ ಫ್ಲೋರ್‌ ಮತ್ತು ಕಿತ್ತಳೆ ಬಣ್ಣ ಹಾಕಿ ಕಲಸಿ ಕಡಿಮೆ ಉರಿಯಲ್ಲಿಬೇಯಿಸಿ. ಈ ಮಿಶ್ರಣ ಸ್ವಲ್ಪ ಗಟ್ಟಿಯಾದ ನಂತರ ಅದಕ್ಕೆ ಏಲಕ್ಕಿ ಪುಡಿ, ತುಪ್ಪ, ನಿಂಬೆ ರಸ ಹಾಗೂ ಅರ್ಧ ಬಟ್ಟಲು ನೀರಿನಲ್ಲಿನೆನೆಸಿದ ಕೇಸರಿ ಸೇರಿಸಿ ಒಂದೆರಡು ನಿಮಿಷ ಕುದಿಸಿ ಜಿಡ್ಡು ಸವರಿದ ತಟ್ಟೆಗೆ ಹಾಕಿ ತಣ್ಣಗಾದ ನಂತರ ಬೇಕಾದ ಆಕಾರಕ್ಕೆ ಕತ್ತರಿಸಿ ಅದರ ಮೇಲೆ ಬಾದಾಮಿ ಚೂರುಗಳನ್ನು ಉದುರಿಸಿ.

ದಮ್‌ರೋಟ್‌

ಸಾಮಗ್ರಿ: ಸಿಹಿ ಕುಂಬಳ ತುರಿ-4 ಬಟ್ಟಲು, ತುಪ್ಪ-1 ಟೇಬಲ್‌ ಸ್ಪೂನ್‌, ಕೇಸರಿ ಬಣ್ಣ-ಸ್ವಲ್ಪ, ಚಿರೋಟಿ ರವೆ-100 ಗ್ರಾಂ, ತುಪ್ಪದಲ್ಲಿಹುರಿದ ಗೋಡಂಬಿ ಮತ್ತು ದ್ರಾಕ್ಷಿ-ಸ್ವಲ್ಪ, ಸಪ್ಪೆ ಖೋವಾ-ಎರಡೂವರೆ ಬಟ್ಟಲು, ಸಕ್ಕರೆ-ಕಾಲು ಕೆ.ಜಿ, ಏಲಕ್ಕಿ ಪುಡಿ-ಸ್ವಲ್ಪ.

ವಿಧಾನ: ಸಿಹಿ ಕುಂಬಳ ತುರಿಗೆ ಅರ್ಧ ಬಟ್ಟಲು ನೀರು ಸೇರಿಸಿ ಮೆತ್ತಗಾಗುವವರೆಗೆ ಬೇಯಿಸಿ ತಣ್ಣಗಾದ ನಂತರ ಅದರ ನೀರು ಹಿಂಡಿ. ಇದಕ್ಕೆ ಖೋವಾ, ಸಕ್ಕರೆ, ಚಿರೋಟಿ ರವೆ, ಏಲಕ್ಕಿ ಪುಡಿ ಹಾಕಿ ಚೆನ್ನಾಗಿ ಕಲಸಿ ಬೇಕಿಂಗ್‌ ಪಾತ್ರೆಗೆ ಹಾಕಿ ಓವನ್‌ನಲ್ಲಿ180 ಡಿಗ್ರಿ ಸೆಲ್ಸಿಯಸ್‌ನಲ್ಲಿಇಪ್ಪತ್ತು ನಿಮಿಷ ಬೇಯಿಸಿ ನಂತರ ಐದು ನಿಮಿಷ ಗ್ರಿಲ್‌ ಮೋಡ್‌ನಲ್ಲಿಬೇಯಿಸಿ ತೆಗೆಯಿರಿ.

ಆ್ಯಪಲ್‌ ಪೇಡ

ಸಾಮಗ್ರಿ: ಸಪ್ಪೆ ಖೋವಾ-ಅರ್ಧ ಕೆ.ಜಿ, ಸಕ್ಕರೆ-1 ಬಟ್ಟಲು, ರಸ್ಬೆರ್ರಿ ಬಣ್ಣ-ಸ್ವಲ್ಪ, ಹಳದಿ ಬಣ್ಣ-ಸ್ವಲ್ಪ, ಹೆಚ್ಚಿದ ಬಾದಾಮಿ ಚೂರು-ಸ್ವಲ್ಪ, ತುಪ್ಪ-2 ಟೇಬಲ್‌ ಸ್ಪೂನ್‌.

ವಿಧಾನ: ದಪ್ಪ ತಳದ ಪಾತ್ರೆಗೆ ಸಕ್ಕರೆ ಮತ್ತು ಖೋವಾ ಹಾಕಿ ಸಣ್ಣ ಉರಿಯಲ್ಲಿಸ್ವಲ್ಪ ಗಟ್ಟಿಯಾಗುವವರೆಗೆ ಬೇಯಿಸಿ ಕೊನೆಗೆ ಹಳದಿ ಬಣ್ಣ ಸೇರಿಸಿ ಹಲ್ವ ಹದಕ್ಕೆ ಬರುವವರೆಗೆ ಬೇಯಿಸಿ. ನಂತರ ಇದಕ್ಕೆ ಏಲಕ್ಕಿ ಪುಡಿ ಮತ್ತು ತುಪ್ಪ ಹಾಕಿ ಕೆಳಗಿಳಿಸಿ ತಣ್ಣಗಾದ ನಂತರ ಹದವಾಗಿ ಕಲಸಿ ನಿಂಬೆ ಹಣ್ಣಿನ ಗಾತ್ರದ ಉಂಡೆ ಮಾಡಿ ಅದರ ಮೇಲಿನ ಭಾಗಕ್ಕೆ ರಸ್ಬೆರ್ರಿ ಬಣ್ಣ ಹೆಚ್ಚಿ ಒಂದೊಂದು ಉಂಡೆಗಳ ಮೇಲೆ ಲವಂಗ ಇಡಿ.

ಮಾಲ್ಕೋವಾ

ಸಾಮಗ್ರಿ: ಸಕ್ಕರೆ-ಅರ್ಧ ಕೆ.ಜಿ, ನೀರು-ಮೂರುವರೆ ಬಟ್ಟಲು, ಸಪ್ಪೆ ಖೋವಾ-ಕಾಲು ಕೆ.ಜಿ, ಸೋಂಪು-1 ಟೀ ಸ್ಪೂನ್‌, ಮೈದಾ ಹಿಟ್ಟು-1 ಬಟ್ಟಲು, ಅಕ್ಕಿ ಹಿಟ್ಟು-1 ಟೇಬಲ್‌ ಸ್ಪೂನ್‌, ಕರಿಯಲು ಎಣ್ಣೆ, ಸಕ್ಕರೆ-ಕಾಲು ಕೆ.ಜಿ, ಬಾದಾಮಿ ಚೂರುಗಳು-ಸ್ವಲ್ಪ.

ವಿಧಾನ: ಬಾಣಲೆಗೆ ಸಕ್ಕರೆ ಮತ್ತು ಒಂದೂವರೆ ಕಪ್‌ ನೀರು ಹಾಕಿ ಒಂದೆಳೆ ಪಾಕ ಬರುವವರೆಗೆ ಕುದಿಸಿ. ಖೋವಾಗೆ ಎರಡು ಬಟ್ಟಲು ನೀರು, ಸೋಂಪು, ಮೈದಾ, ಅಕ್ಕಿ ಹಿಟ್ಟು ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ಕಲಸಿ. ಈ ಮಿಶ್ರಣವನ್ನು ಒಂದು ಸೌಟಿನಲ್ಲಿತೆಗೆದುಕೊಂಡು ಕಾದ ಎಣ್ಣೆಗೆ ಹಾಕಿ ಸಣ್ಣ ಉರಿಯಲ್ಲಿಕಂದು ಬಣ್ಣ ಬರುವವರೆಗೂ ಬೇಯಿಸಿ ಸಕ್ಕರೆ ಪಾಕಕ್ಕೆ ಹಾಕಿ ಐದು ನಿಮಿಷದ ತೆಗೆದು ತಟ್ಟೆಯಲ್ಲಿಜೋಡಿಸಿ ಅದರ ಮೇಲೆ ಬಾದಾಮಿ ಚೂರುಗಳನ್ನು ಹರಡಿಸಿ.

ಬೇಸನ್‌ ಬರ್ಫಿ

ಸಾಮಗ್ರಿ: ಕಡಲೆ ಹಿಟ್ಟು-2 ಬಟ್ಟಲು, ಏಲಕ್ಕಿ ಪುಡಿ-ಸ್ವಲ್ಪ, ಪಿಸ್ತಾ ಹಾಗೂ ಬಾದಾಮಿ ಚೂರು-ಸ್ವಲ್ಪ, ಪುಡಿ ಸಕ್ಕರೆ-1 ಬಟ್ಟಲು, ತುಪ್ಪ-1 ಬಟ್ಟಲು.

ವಿಧಾನ: ಬಾಣಲೆಯಲ್ಲಿತುಪ್ಪ ಕರಗಿಸಿ ಕಡಲೆ ಹಿಟ್ಟು ಸೇರಿಸಿ ಕಡಿಮೆ ಉರಿಯಲ್ಲಿಕಂದು ಬಣ್ಣ ಬರುವವರೆಗೂ ಹುರಿದು ನಂತರ ಅದಕ್ಕೆ ಏಲಕ್ಕಿ ಪುಡಿ, ಬಾದಾಮಿ ಪಿಸ್ತಾ ಚೂರುಗಳನ್ನು ಸೇರಿಸಿ ತಣ್ಣಗಾಗಲು ಬಿಡಿ. ನಂತರ ಅದಕ್ಕೆ ಸಕ್ಕರೆ ಸೇರಿಸಿ ಚೆನ್ನಾಗಿ ಕಲಸಿ ತುಪ್ಪ ಸವರಿದ ತಟ್ಟೆಗೆ ಎರಡು ಇಂಚು ದಪ್ಪಕ್ಕೆ ಹರಡಿಸಿ ಎರಡು ಗಂಟೆಗಳ ನಂತರ ಬೇಕಾದ ಆಕಾರಕ್ಕೆ ಕತ್ತರಿಸಿ.

ಸೆವೆನ್‌ ಕಪ್‌ ಬರ್ಫಿ

ಸಾಮಗ್ರಿ: ಕಡಲೆ ಹಿಟ್ಟು-1 ಕಪ್‌, ತುಪ್ಪ-1 ಕಪ್‌, ತೆಂಗಿನಕಾಯಿ ತುರಿ-1 ಕಪ್‌, ಹಾಲು-1 ಕಪ್‌, ಸಕ್ಕರೆ-3 ಕಪ್‌, ಚಿಕ್ಕದಾಗಿ ಕತ್ತರಿಸಿದ ಗೊಡಂಬಿ-ಕಾಲು ಕಪ್‌.

ವಿಧಾನ: ಕಡಲೆÜ ಹಿಟ್ಟನ್ನು ಚೆನ್ನಾಗಿ ಹುರಿದು ಕೆಳಗಿಳಿಸಿ ಅದಕ್ಕೆ ಸಕ್ಕರೆ, ಹಾಲು, ತೆಂಗಿನಕಾಯಿ ತುರಿ ಮತ್ತು ಅರ್ಧ ಕಪ್‌ ತುಪ್ಪ ಸೇರಿಸಿ ಮತ್ತೆ ಒಲೆಯ ಮೇಲಿಟ್ಟು ಸಣ್ಣ ಉರಿಯಲ್ಲಿಗುಳ್ಳೆಗಳು ಬರುವವರೆಗೆ ಬೇಯಿಸಿ ನಂತರ ಮಿಕ್ಕ ತುಪ್ಪ ಹಾಕಿ ಕೊನೆಗೆ ಗೋಡಂಬಿ ಚೂರುಗಳನ್ನು ಸೇರಿಸಿ ತಳ ಬಿಡುವವರೆಗೆ ಕುದಿಸಿ ತುಪ್ಪ ಸವರಿದ ತಟ್ಟೆಗೆ ಹಾಕಿ ಹರಡಿಸಿ ತಣ್ಣಗಾದ ನಂತರ ಬೇಕಾದ ಆಕಾರಕ್ಕೆ ಕತ್ತರಿಸಿ.