ಕಾಲು ಕೆಜಿ ಪ್ರೀತಿ ಸಿನಿಮಾದಲ್ಲಿ ಕ್ಯೂಟ್ ಆಗಿ ನಟಿಸಿರುವ ಹಿತಾ ಫೂಡಿಯೂ ಹೌದು. ಹಿರಿಯ ನಟ ಸಿಹಿ ಕಹಿ ಚಂದ್ರು ಅವರ ಮಗಳಾದ ಈಕೆಗೆ ತನ್ನಪ್ಪನ ಅಡುಗೆ ಎಂದರೆ ಬಲು ಇಷ್ಟವಂತೆ.
ನಂದಿನಿ ಕೆ.ಎಲ್
ಸಿಹಿ ಕಹಿ ಚಂದ್ರು ಕೇವಲ ನಟರಾಗಿ ಮಾತ್ರವಲ್ಲ, ಉತ್ತಮ ಅಡುಗೆ ಮಾಡುವುದರಲ್ಲೂ ಎತ್ತಿದ ಕೈ. ಹಾಗಾದರೆ ಅವರ ಮಗಳು ಹಿತಾರ ಆಹಾರ ಅಭಿರುಚಿ ಹೇಗಿರಬಹುದು ಎಂದು ತಿಳಿದುಕೊಳ್ಳುವ ಕುತೂಹಲ ನಿಮ್ಮದಾಗಿದ್ದರೆ ಇಲ್ಲಿ ಓದಿ.
ಮೊಸರನ್ನ ಪ್ರಿಯೆ
ನನಗೆ ಮೊಸರನ್ನ ತುಂಬಾ ಇಷ್ಟ. ಎಲ್ಲಾ ಕಾಲದಲ್ಲಿಯೂ, ಎಲ್ಲಾ ಸ್ಥಳಕ್ಕೂ ಸುಲಭವಾಗಿ ಹೊಂದುವ ಆಹಾರವೆಂದರೆ ಮೊಸರನ್ನ. ಅದನ್ನು ತಿಂದಷ್ಟು ಖುಷಿಯಾಗುತ್ತದೆ. ಮನೆಯಲ್ಲಿ ನಮ್ಮಜ್ಜಿ ಮಾಡುವ ಎಲ್ಲಾ ಅಡುಗೆಯನ್ನು ಇಷ್ಟಪಟ್ಟು ತಿನ್ನುತ್ತೇನೆ. ಸಾರು, ಮೊಮೊ, ಇಟಾಲಿಯನ್ ಸ್ಪಾಗೆಟಿ ಅಂದ್ರೆ ನನಗೆ ತುಂಬಾ ಇಷ್ಟ.
ಖಾರ ಇಷ್ಟ
ನಾನು ಸಸ್ಯಾಹಾರಿ. ಆದರೆ ಮೊಟ್ಟೆ ತಿನ್ನುತ್ತೇನೆ. ಸ್ವೀಟ್ ಐಟಮ್ಗಿಂತ ಸ್ಪೈಸಿ ಫುಡ್ಗಳು ಹೆಚ್ಚು ಇಷ್ಟವಾಗುತ್ತವೆ. ಮೆಣಸಿನಕಾಯಿ ಬಜ್ಜಿಯನ್ನು ತುಂಬಾ ತಿನ್ನುತ್ತೇನೆ.
ಫೇವರಿಟ್ ಫುಡ್ ಅಡ್ಡಾ
ನಮ್ಮ ಮನೆ ಹತ್ತಿರವಿರುವ ಪಾನಿಪುರಿಯ ಟೇಸ್ಟ್ ಸೂಪರ್ ಆಗಿರುತ್ತದೆ. ಚಾಟ್ಸ್ ತಿನ್ನಬೇಕಿದ್ದರೆ ವಿ.ವಿ ಪುರಂನಲ್ಲಿರುವ ಫುಡ್ ಸ್ಟ್ರೀಟ್, ಮಸಾಲೆ ದೋಸೆ ಬೇಕಿದ್ದರೆ ಸಿಪಿಆರ್ಗೆ ಹೋಗುತ್ತೇನೆ. ಬೇರೆ ಪ್ರದೇಶಗಳಿಗೆ ಹೋದಾಗ ಅಲ್ಲಿನ ಫುಡ್ಗಳನ್ನೇ ಟೇಸ್ಟ್ ಮಾಡಲು ಇಷ್ಟಪಡುತ್ತೇನೆ.
ನನ್ನಪ್ಪ ಬೆಸ್ಟ್ ಕುಕ್
ನನ್ನಪ್ಪ ನಳಪಾಕದಲ್ಲಿ ಎತ್ತಿದ ಕೈ. ಅವರಿಗೆ ಅನೇಕ ರೆಸಿಪಿಗಳನ್ನು ಮಾಡಲು ಗೊತ್ತಿದೆ. ನಮಗೆಲ್ಲರಿಗೂ ಅವರು ವಿವಿಧ ಟೇಸ್ಟ್ಗಳ ಆಹಾರ ಮಾಡಿ ಕೊಡುತ್ತಾರೆ. ಅದಕ್ಕೆ ಅಮ್ಮನೂ ಸಹಾಯ ಮಾಡುತ್ತಾರೆ. ನಿಜ ಹೇಳಬೇಕೆಂದರೆ ಅಪ್ಪನಿಗಿಂತ ಅಮ್ಮ ಚೆನ್ನಾಗಿ ಅಡುಗೆ ಮಾಡುತ್ತಾರೆ. ನನಗೆ ಉಪ್ಪಿಟ್ಟೆಂದರೆ ಆಗಲ್ಲ. ಆದರೆ ಅಪ್ಪ ಮಾಡುವ ಉಪ್ಪಿಟ್ಟನ್ನು ಮಾತ್ರ ಇಷ್ಟಪಟ್ಟು ತಿನ್ನುತ್ತೇನೆ.
ಹಿತಮಿತ ಆಹಾರ
ನಾನು ಫೂಡಿಯಾಗಿರುವುದರಿಂದ ಊಟ ಬಿಟ್ಟು ಡಯಟ್ ಮಾಡುವ ಗೋಜಿಗೆ ಹೋಗುವುದಿಲ್ಲ. ಎಲ್ಲವನ್ನೂ ಚೆನ್ನಾಗಿ ತಿನ್ನುತ್ತೇನೆ. ಹಾಗಂತ ತಿನ್ನುವುದರಲ್ಲಿಯೂ ಒಂದು ಲಿಮಿಟೇಷನ್ ಹಾಕಿಕೊಂಡಿದ್ದೇನೆ. ನಾವು ಆರೋಗ್ಯವಾಗಿರಬೇಕಾದರೆ ಚೆನ್ನಾಗಿ ಊಟ ಮಾಡಬೇಕು. ಜಂಕ್ ಫುಡ್ ಕಡಿಮೆ ಸೇವಿಸಬೇಕು. ಸಾಧ್ಯವಾದಷ್ಟು ಮನೆಯಲ್ಲಿ ಮಾಡಿದ ಆಹಾರವನ್ನೇ ಹೆಚ್ಚು ತಿನ್ನಬೇಕು.
ಡಿಟಾಕ್ಸ್ ಜ್ಯೂಸ್
ನಾನು ಹಸಿ ತರಕಾರಿ, ಫ್ರೂಟ್ಸ್ ಜ್ಯೂಸ್, ಡ್ರೈ ಪ್ರೂಟ್ಗಳನ್ನು ಹೆಚ್ಚು ಸೇವಿಸುತ್ತೇನೆ. ಅಮ್ಮ ಮಾಡಿಕೊಡುವ ಡಿಟಾಕ್ಸ್ ಜ್ಯೂಸ್ಗೆ ಮೊದಲ ಆದ್ಯತೆ ಕೊಡುತ್ತೇನೆ. ಶೂಟಿಂಗ್ ಇದ್ದಾಗ ಮನೆ ಊಟ ತೆಗೆದುಕೊಂಡು ಹೋಗುತ್ತೇನೆ. ಅಲ್ಲಿ ರೈಸ್ ತಿನ್ನುವುದಿಲ್ಲ.
ಅಪ್ಪನಿಗೆ ಮೊಟ್ಟೆ ತಿನ್ನಿಸಿದ್ದೆ
ನಾನು ಚಿಕ್ಕವಳಿದ್ದಾಗ ಅಪ್ಪನಿಗೆ ಪನೀರ್ ಎಂದು ಹೇಳಿ ಮೊಟ್ಟೆಯನ್ನು ಬಾಯಿಗೆ ತುರುಕಿದ್ದೆ. ಇದರಿಂದ ಅಪ್ಪ ವಾಂತಿ ಮಾಡಿಕೊಂಡು ಬಂದು ನನಗೆ ಸರಿಯಾಗಿ ಬೈದಿದ್ದರು. ಅವರು ವೆಜ್ ಫುಡ್ ಮಾತ್ರ ತಿನ್ನುತ್ತಾರೆ. ಅವರಿಂದ ಬೈಸಿಕೊಂಡ ಬಳಿಕ ನಾನು ಊಟದ ವಿಚಾರದಲ್ಲಿ ಯಾರಿಗೂ ಬಲವಂತ ಮಾಡಲು ಹೋಗುವುದಿಲ್ಲ.
ಆಹಾರ ಸೇವಿಸುವಾಗ ಮುಖದಲ್ಲಿ ಮದಹಾಸವಿರಬೇಕು. ಎಲ್ಲರು ಒಟ್ಟಾಗಿ ಕುಳಿತು ಹಂಚಿಕೊಂಡು ತಿನ್ನಬೇಕು. ಆಹಾರವನ್ನು ಖುಷಿಯಿಂದ ತಿಂದಾಗಲೇ ಸಮಾಧಾನವಾಗುವುದು.
ಹಿತಾ ಚಂದ್ರಶೇಖರ್, ನಟಿ