ರಕ್ತಪರಿಚಲನೆ ಹೆಚ್ಚಿಸುವ ಆರೋಗ್ಯಕರ ಆಹಾರ

ದೇಹದ ರಕ್ತಪರಿಚಲನೆ ಹೆಚ್ಚಿಸುವ ನಿಟ್ಟಿನಲ್ಲಿ ಆಹಾರಗಳ ಪಾತ್ರ ಅತ್ಯಂತ ಮಹತ್ವದ್ದು. ಕೆಲವು ಆಹಾರಗಳ ಸೇವನೆಯಿಂದ ರಕ್ತಪರಿಚಲನೆ ಕ್ರಿಯೆ ಚುರುಕುಗೊಳ್ಳುತ್ತದೆ.

ಲವಲವಿಕೆ ಸುದ್ದಿಲೋಕ

ಜೀವಕೋಶಗಳ ಆರೋಗ್ಯಕರ ಬೆಳವಣಿಗೆ ಮತ್ತು ವಿವಿಧ ಅಂಗಗಳು ಸಮರ್ಪಕವಾಗಿ ಕಾರ್ಯ ನಿರ್ವಹಿಸಲು ದೇಹದಲ್ಲಿ ಸರಾಗವಾದ ರಕ್ತಪರಿಚಲನೆ ಅತಿ ಅಗತ್ಯ. ಆ್ಯಂಟಿಆಕ್ಸಿಡೆಂಟ್ಸ್‌, ಒಮೆಗಾ 3 ಫ್ಯಾಟಿ ಆ್ಯಸಿಡ್ಸ್‌, ನಾರು, ವಿಟಮಿನ್‌ಗಳು ಮತ್ತು ಖನಿಜಾಂಶಗಳಿಂದ ತುಂಬಿದ ಆಹಾರಗಳನ್ನು ತಿನ್ನುವುದರಿಂದ ರಕ್ತಪರಿಚಲನೆ ಸುಗಮವಾಗಿ ದೇಹದಲ್ಲಿರುವ ತ್ಯಾಜ್ಯಗಳೆಲ್ಲಾ ಹೊರ ಹೋಗುತ್ತವೆ. ರಕ್ತಪರಿಚಲನೆಯಲ್ಲಿ ವ್ಯತ್ಯಯವಾದರೆ ಅನೇಕ ಅನಾರೋಗ್ಯಗಳು ಕಾಡುತ್ತವೆ. ದೇಹದಲ್ಲಿ ರಕ್ತಪರಿಚಲನೆ ಹೆಚ್ಚಿಸುವ ಕೆಲವು ಆಹಾರಗಳು ಹೀಗಿವೆ.

ಮೀನು: ಕೆಲವು ಮೀನುಗಳಲ್ಲಿ ಹೃದಯದ ಆರೋಗ್ಯ ಹೆಚ್ಚಿಸುವ ಒಮೆಗಾ 3 ಫ್ಯಾಟಿ ಆ್ಯಸಿಡ್ಸ್‌ನ ಪ್ರಮಾಣ ಅತ್ಯಧಿಕವಾಗಿರುತ್ತದೆ. ಇದು ರಕ್ತಪರಿಚಲನೆಯನ್ನು ಹೆಚ್ಚಿಸುತ್ತದೆ.

ಕಿತ್ತಳೆ: ವಿಟಮಿನ್‌ ಸಿ ಯ ಆಗರವಾಗಿರುವ ಕಿತ್ತಳೆ ಹಣ್ಣು ನೈಸರ್ಗಿಕ ರೀತಿಯಲ್ಲಿ ರಕ್ತವನ್ನು ತೆಳುಗೊಳಿಸುತ್ತದೆ ಮತ್ತು ರಕ್ತನಾಳಗಳನ್ನು ಬಲಪಡಿಸುತ್ತದೆ. ರಕ್ತಪರಿಚಲನೆಗೆ ಮತ್ತು ರಕ್ತ ಹೆಪ್ಪುಗಟ್ಟಲು ಅಡ್ಡಿಯುಂಟು ಮಾಡುವ ಅಂಶಗಳನ್ನು ನಿವಾರಿಸುತ್ತದೆ.

ಹಸಿ ಬೀಜ: ಆಗಸೆ ಬೀಜ, ಕುಂಬಳಕಾಯಿ ಬೀಜ, ಕಾಮಕಸ್ತೂರಿ ಬೀಜ ಇತ್ಯಾದಿಗಳು ಒಮೆಗಾ 3 ಫ್ಯಾಟಿ ಆ್ಯಸಿಡ್ಸ್‌. ನಾರು ಮತ್ತು ಆ್ಯಂಟಿಆಕ್ಸಿಡೆಂಟ್ಸ್‌ನ ಪ್ರಮುಖ ಮೂಲವಾಗಿವೆ. ಉರಿಯೂತ ನಿರೋಧಕ ಮತ್ತು ಪ್ರೋಟೀನ್‌ನ ಆಗರವೂ ಆಗಿರುವ ಈ ಬೀಜಗಳು ಕೊಲೆಸ್ಟ್ರಾಲ್‌ ನಿವಾರಿಸಿ ರಕ್ತದ ಗುಣಮಟ್ಟ ಹೆಚ್ಚಿಸುತ್ತದೆ.

ಗೊಜಿ ಹಣ್ಣು: ನೋಡಲು ಒಣ ದ್ರಾಕ್ಷಿಯಂತಿರುವ ಈ ಹಣ್ಣು ಕೆಂಪು ಬಣ್ಣದಿಂದ ಕೂಡಿದ್ದು, ನಾರಿನ ಆಗರವಾಗಿದೆ. ಇದು ದೇಹದಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಿಸುತ್ತದೆ ಮತ್ತು ರಕ್ತಪರಿಚಲನೆಯನ್ನು ಹೆಚ್ಚಿಸುತ್ತದೆ.

ಶುಂಠಿ: ಜೀರ್ಣಕ್ರಿಯೆಗೆ ಸಂಬಂಧಿಸಿದ ಸಮಸ್ಯೆಗಳನ್ನು ನಿವಾರಿಸುವ ಶುಂಠಿ ರಕ್ತಪರಿಚಲನೆ ಹೆಚ್ಚಿಸಲೂ ಸಹಕಾರಿಯಾಗಿದೆ. ಪ್ರತಿದಿನ ಒಂದು ತುಂಡು ಹಸಿ ಶುಂಠಿ ಅಥವಾ ಒಂದು ಕಪ್‌ ಶುಂಠಿ ಚಹಾ ಸೇವಿಸಿದರೆ ರಕ್ತಪರಿಚಲನೆ ಹೆಚ್ಚುತ್ತದೆ.

ಬೆಳ್ಳುಳ್ಳಿ: ನೈಸರ್ಗಿಕವಾಗಿ ರಕ್ತವನ್ನು ತೆಳುವಾಗಿಸುವ ಬೆಳ್ಳುಳ್ಳಿ ರಕ್ತಪರಿಚಲನೆಯನ್ನೂ ಸರಾಗಗೊಳಿಸುತ್ತದೆ. ಪ್ರತಿದಿನ ಬೆಳ್ಳುಳ್ಳಿಯ ಮೂರು ಎಸಳುಗಳನ್ನು ತಿಂದರೆ ಮುಚ್ಚಿಕೊಂಡಿರುವ ಅಪಧಮನಿಗಳು ತೆರೆದುಕೊಳ್ಳುತ್ತವೆ.

ಡಾರ್ಕ್‌ ಚಾಕ್ಲೇಟ್‌: ಇದರಲ್ಲಿರುವ ಕೋಕೊದಲ್ಲಿ ಫ್ಲೇವನಾಯ್ಡ್‌ಗಳಿದ್ದು, ಇದು ರಕ್ತಪರಿಚಲನೆಗೆ ಸಹಕಾರಿಯಾಗಿದೆ. ಆದ್ದರಿಂದ ಪ್ರತಿದಿನ ಒಂದು ಸಣ್ಣ ತುಂಡು ಡಾರ್ಕ್‌ ಚಾಕ್ಲೇಟ್‌ ತಿನ್ನುವುದು ಉತ್ತಮ.

ಕಲ್ಲಂಗಡಿ ಹಣ್ಣು: ನೈಸರ್ಗಿಕ ಆ್ಯಂಟಿಆಕ್ಸಿಡೆಂಟ್‌ ಲೈಕೊಪಿನ್‌ನ ಆಗರವಾಗಿರುವ ಈ ಹಣ್ಣು ದೇಹದಲ್ಲಿ ರಕ್ತಪರಿಚಲನೆ ಹೆಚ್ಚಿಸುತ್ತದೆ.