ಕಿಚನ್‌ ಕæೕರ್‌: ಹಣ್ಣುಗಳ ಆಯ್ಕೆ ಹೀಗಿರಲಿ

-ಕಡುಗೆಂಪು ಸಿಪ್ಪೆಯಿರುವ ದಾಳಿಂಬೆ ಹಣ್ಣುಗಳನ್ನು ಆರಿಸಿ. ಸಿಪ್ಪೆ ಕೆಂಪಿದ್ದಷ್ಟು ಅದರ ಸಿಹಿ ಹೆಚ್ಚಿರುತ್ತದೆ. ಅದೇ ರೀತಿ ದೊಡ್ಡ ಮತ್ತು ಭಾರವಾಗಿರುವ ದಾಳಿಂಬೆಯಲ್ಲಿ ರಸಭರಿತ ಬೀಜಗಳು ಜಾಸ್ತಿಯಿರುತ್ತವೆ.

-ಚೆನ್ನಾಗಿ ಪರಿಮಳ ಬೀರುವ, ತಾಜಾ ಹಸಿರು ಎಲೆಗಳಿರುವ ಮತ್ತು ಭಾರವಾಗಿರುವ ಪೈನಾಪಲ್‌ ಆರಿಸಿ. ಇದರ ಎಲೆಗಳು ಹಸಿರು ಮತ್ತು ಕ್ರಿಸ್ಪ್‌ ಆಗಿರಬೇಕು. ಮೆತ್ತಗಿರುವ ಅಥವಾ ಒಣಗಿದ ಕಂದು ಎಲೆಗಳಿರುವ ಪೈನಾಪಲ್‌ ಖರೀದಿಸಬೇಡಿ.

-ತರಚಿ ಹೋಗಿರುವ ಮತ್ತು ಮೆತ್ತಗಾಗಿರುವ ಪೀಚ್‌ ಹಣ್ಣುಗಳಿಗೆ ನೋ ಎನ್ನಿ. ಅದೇ ರೀತಿ ತೊಟ್ಟಿನ ಹತ್ತಿರ ಚೆನ್ನಾಗಿ ಪರಿಮಳ ಬೀರುವ ಮತ್ತು ಸ್ವಲ್ಪ ಮೆತ್ತಗಿರುವ ಮಾವಿನ ಹಣ್ಣುಗಳನ್ನು ಖರೀದಿಸಿ.

-ಗ್ರೇಪ್‌ಫ್ರೂಟ್‌, ಮೋಸಂಬಿ ಮತ್ತು ಕಿತ್ತಳೆ ಹಣ್ಣುಗಳನ್ನು ಖರೀದಿಸುವಾಗ ಸಿಪ್ಪೆ ಮೃದುವಾಗಿರುವುದನ್ನು, ಭಾರವಿರುವುದನ್ನು ಆಯ್ಕೆ ಮಾಡಿ. ತುಂಬಾ ಗಟ್ಟಿಯಾಗಿರುವ ಹಣ್ಣುಗಳು ಬೇಡ.

-ಹೊಳೆಯುವ ಮತ್ತು ಕಡುಗೆಂಪು ಸಿಪ್ಪೆಯಿರುವ ಚೆರ್ರಿ ಹಣ್ಣು ಖರೀದಿಸಿ. ಇವು ತುಂಬಾ ಫ್ರೆಶ್‌ ಆಗಿರುತ್ತವೆ. ತೊಟ್ಟುಗಳಿಲ್ಲದ ಮತ್ತು ತರಚಿ ಹೋಗಿರುವ ಹಣ್ಣು ಬೇಡ.

-ಸಿಹಿ ಪರಿಮಳ ಬೀರುವ ಮತ್ತು ಕೆನೆ ಅಥವಾ ಗೋಲ್ಡನ್‌ ಬಣ್ಣದ ಸಿಪ್ಪೆಯಿರುವ ಖರ್ಬೂಜ ಹಣ್ಣು ಆರಿಸಿ. ಬಾಳೆ ಹಣ್ಣು ಖರೀದಿಸುವಾಗ ಕಡು ಹಳದಿ ಬಣ್ಣದ ಸಿಪ್ಪೆಯಿರುವ ಗಟ್ಟಿ ಹಣ್ಣನ್ನು ಆರಿಸಿ. ಚುಕ್ಕಿಗಳಿರುವ ತರಚಿರುವ ಮತ್ತು ಬಿರುಕು ಬಿಟ್ಟಿರುವ ಸಿಪ್ಪೆಯ ಬಾಳೆಹಣ್ಣು ಬೇಡ.