ಅಜ್ಜಿಯ ಅಡುಗೆ ಸ್ಟೈಲೇ ಬೆಸ್ಟ್; ರಿಫೈನ್ಡ್ ಆಯಿಲ್ ಆರೋಗ್ಯಕ್ಕೆ ಕುತ್ತು

ಹೊಸದಿಲ್ಲಿ: ಭಾರತೀಯ ಆಹಾರ ಪದ್ಧತಿಯಲ್ಲಿ ಎಲ್ಲವೂ ಪಥ್ಯವೇ. ಹೆಚ್ಚು ವಾಯು ಆಹಾರದೊಂದಿಗೆ ಇಂಗು, ಶುಂಠಿ ಬಳಸಿದರೆ, ದೇಹಕ್ಕೆ ತಂಪೆಂದು ಮಾಡುವ ತಂಬುಳಿಗೆ ಕಾಳು ಮೆಣಸು ಹಾಕುತ್ತಾರೆ. ಆಯಾಯ ಅಡುಗೆಗೆ ಸೂಕ್ತವಾಗುವಂತೆ ತುಪ್ಪ, ಕೊಬ್ಬರಿ ಎಣ್ಣೆ, ಸಾಸಿವೆ ಎಣ್ಣೆ ಬಳಸುತ್ತಿದ್ದು, ಸಮತೋಲನ ಆಹಾರ ಸೇವಿಸುವಂತೆಯೇ ಅಡುಗೆ ಮಾಡಲಾಗುತ್ತದೆ.

ಇದನ್ನು ಪುಷ್ಟೀಕರಿಸುವಂತೆ ಅಜ್ಜಿ ಬಳಸುತ್ತಿದ್ದ ತುಪ್ಪ, ಕೊಬ್ಬರಿ ಎಣ್ಣೆ ಮತ್ತು ಸಾಸಿವೆ ಎಣ್ಣೆಗಳೇ ಮಾರುಕಟ್ಟೆಯಲ್ಲಿ ಸಿಗುವ ರಿಫೈನ್ಡ್ ಎಣ್ಣೆಗಿಂತಲೂ ಆರೋಗ್ಯಕ್ಕೆ ಒಳ್ಳೆಯದು ಎಂದು ತಜ್ಞರು ಇದೀಗ ರಿಪೋರ್ಟ್ ಕಾರ್ಡ್ ನೀಡಿದ್ದಾರೆ.

ತಮ್ಮ ಬೇಳೆ ಬೇಯಿಸಿಕೊಳ್ಳುವ ಸಲುವಾಗಿ ಕೆಲವು ಕಂಪನಿಗಳು ರಿಫೈನ್ಡ್ ಎಣ್ಣೆಯನ್ನು ಬಳಸಿದರೆ ಆರೋಗ್ಯಕ್ಕೆ ಹಿತವೆಂಬ ಭ್ರಮೆ ಮೂಡಿಸುವಂಥ ಜಾಹೀರಾತು ನೀಡುವ ಮೂಲಕ, ತಮ್ಮ ಮಾರುಕಟ್ಟೆಯನ್ನು ವಿಸ್ತರಿಸಿಕೊಳ್ಳುತ್ತಿದ್ದಾರೆ.

'ಆರೋಗ್ಯದ ದೃಷ್ಟಿಯಿಂದ ಹೆಚ್ಚು ಬೇಯಿಸುವ, ತುಪ್ಪ ಮತ್ತಿತರ ವನಸ್ಪತಿಗಳನ್ನು ಬಳಸುವ ಭಾರತೀಯ ಪಾಕ ಪದ್ಧತಿಯೇ ಶ್ರೇಷ್ಠ,' ಎಂದು ಗಂಗಾ ರಾಮ್ ಆಸ್ಪತ್ರೆಯ ಹೃದಯ ಆರೋಗ್ಯ ವಿಭಾಗದ ಡಾ.ಎಸ್.ಸಿ.ಮನ್‌ಚಂದ್ ಹೇಳುತ್ತಾರೆ.

ಭಾರತೀಯ ಹೃದಯ ನಿಯತಕಾಲಿಕದಲ್ಲಿ ಈ ವರದಿ ಪ್ರಕಟವಾಗಿದ್ದು, 'ಎಣ್ಣೆಯನ್ನು ಶುದ್ಧೀಕರಿಸುವಾಗ ಹೆಚ್ಚಿನ ಉಷ್ಣಾಂಶದಲ್ಲಿ ಕಾಯಿಸುವುದರಿಂದ, ಅದು ವಿಷವಾಗುವ ಸಾಧ್ಯತೆ ಇದೆ,' ಎಂದು ವರದಿ ಹೇಳಿದ್ದು, ಈ ರಿಫೈನ್ಡ್ ಎಣ್ಣೆಯನ್ನು ಬಳಸುವುದನ್ನು ಕಡಿಮೆ ಮಾಡಿದರೆ ಒಳಿತು ಎನ್ನುತ್ತಾರೆ ಸಾರ್ವಜನಿಕ ಆರೋಗ್ಯ ಪೌಷ್ಟಿಕ ಆಹಾರ ಸಲಹೆಗಾರರಾದ ಸಂತೋಷ್ ಜೈನ್ ಪಸ್ಸಿ.

ತುಪ್ಪ ಹಾಗೂ ಇತರೆ ಭಾರತೀಯ ಅಡುಗೆಗೆ ಬಳಸುವ ಎಣ್ಣೆಗಳು ಹೆಚ್ಚಿನ ಉಷ್ಣಾಂಶದಲ್ಲಿಯೂ ಸ್ಥಿರತೆಯನ್ನು ಕಾಪಾಡಿಕೊಳ್ಳಬಹುದು ಎಂಬುವುದು ಈ ತಜ್ಞರ ಅಭಿಪ್ರಾಯ.