ತಿಂಡಿ ಪ್ರಿಯರ ಜಾನ್ಸನ್‌ ಮಾರ್ಕೆಟ್‌

ಬೆಂಗಳೂರಿನ ರಿಚ್‌ಮಂಡ್‌ ಟೌನ್‌ನಲ್ಲಿರುವ ಜಾನ್ಸನ್‌ ಮಾರ್ಕೆಟ್‌ನಲ್ಲಿ ಒಂದು ರೌಂಡ್‌ ಅಡ್ಡಾಡಿದರೆ ಬಗೆ ಬಗೆಯ ಸ್ಟ್ರೀಟ್‌ ಫುಡ್‌ಗಳನ್ನು ಸವಿಯಬಹುದು.

ಬಬಿತಾ ಎಸ್‌.

ಅತ್ಯಂತ ಕಡಿಮೆ ಅವಧಿಯಲ್ಲಿ ಬಗೆ ಬಗೆಯ ರುಚಿಕರ ತಿಂಡಿಗಳನ್ನು ಸವಿಯಬೇಕೆನ್ನುವವರಿಗೆ ಜಾನ್ಸನ್‌ ಮಾರ್ಕೆಟ್‌ ಬೆಸ್ಟ್‌. ಸದಾ ಜನಸಂದಣಿಯಿಂದ ತುಂಬಿರುವ ಈ ಪ್ರದೇಶ ತಿಂಡಿ ಪ್ರಿಯರ ಸ್ವರ್ಗವಾಗಿ ಪರಿಣಮಿಸಿದೆ. ಅನೇಕ ಸ್ಥಳೀಯ ಆಹಾರಗಳನ್ನು ಇಲ್ಲಿ ನೀವು ಅತ್ಯಂತ ಕಡಿಮೆ ಬೆಲೆಯಲ್ಲಿ ಸವಿಯಬಹುದು.

ವೆರೈಟಿ ಫುಡ್‌

ಈ ಇಕ್ಕಟ್ಟಾದ ಮಾರುಕಟ್ಟೆ ಪ್ರವೇಶಿಸುವಾಗಲೇ ಸಣ್ಣ ಸಣ್ಣ ಫುಡ್‌ ಜಾಯಿಂಟ್‌ಗಳು ಕಾಣಸಿಗುತ್ತವೆ. ಕಬಾಬ್‌, ಸಮೋಸ, ಸ್ಕೀವರ್‌ನಲ್ಲಿ ಹಬೆಯಾಡುಚ್ಚಿರುವ ಸೀಕ್‌ ಕಬಾಬ್‌ ಇತ್ಯಾದಿಗಳ ಪರಿಮಳ ಮಾತ್ರವಲ್ಲದೆ, ಅವುಗಳನ್ನು ಸಾಲಾಗಿ ಜೋಡಿಸಿಟ್ಟಿರುವ ದೃಶ್ಯಗಳೂ ಬಾಯಿ ನೀರೂರಿಸುತ್ತವೆ. ಮುಖ್ಯವಾಗಿ ಮಾಂಸಾಹಾರ ಪ್ರಿಯರಿಗೆ ಇಷ್ಟವಾಗುವ ಫುಡ್‌ ಸ್ಟ್ರೀಟ್‌ ಇದು. ಹೆಜ್ಜೆಗೊಂದರಂತೆ ಶ್ವಾರ್ಮ ರೋಲ್‌, ಬಿರಿಯಾನಿ, ಎಗ್‌ ಪಫ್ಸ್‌ ಇತ್ಯಾದಿಗಳ ಅಂಗಡಿಗಳಲ್ಲಿ ನೀವು ರುಚಿ ರುಚಿಯಾದ ಖಾದ್ಯಗಳನ್ನು ಸವಿಯಬಹುದು.

ಹಾಟ್‌ ಸ್ನ್ಯಾಕ್ಸ್‌

ಸಂಜೆ ವೇಳೆ ಮತ್ತು ವೀಕೆಂಡ್‌ಗಳಲ್ಲಿ ಜನರಿಂದ ಕಿಕ್ಕಿರುವ ಜಾನ್ಸನ್‌ ಮಾರ್ಕೆಟ್‌ನಲ್ಲಿ ಯುವಕರು ಸೇರಿದಂತೆ ಎಲ್ಲಾ ವಯೋಮಾನದ ಆಹಾರ ಪ್ರಿಯರು ಕಾಣಸಿಗುತ್ತಾರೆ. ಈ ಪ್ರದೇಶ ತಾಜಾ ತರಕಾರಿ ಮತ್ತು ಹಣ್ಣು ಮಾರಾಟಕ್ಕೂ ಹೆಸರಾಗಿರುವ ಕಾರಣ ಇಲ್ಲಿ ಬಿಸಿ ಬಿಸಿ ಖಾದ್ಯಗಳು ತಯಾರಿಸಿ ಇಟ್ಟ ಕೆಲವೇ ಕ್ಷ ಣಗಳಿಗೆ ಖಾಲಿಯಾಗಿ ಬಿಡುತ್ತವೆ. ಇಲ್ಲಿನ ಆಹಾರ ತಾಣಗಳು ಸಣ್ಣ ಮತ್ತು ಇಕ್ಕಟ್ಟಾಗಿದ್ದರೂ ಜನರು ಕ್ಯೂನಲ್ಲಿ ನಿಂತು ಕಾದು ಆಹಾರ ಸೇವಿಸುತ್ತಾರೆ.

ಮಸ್ಟ್‌ ವಿಸಿಟ್‌

ಈ ಫುಡ್‌ ಸ್ಟ್ರೀಟ್‌ನಲ್ಲಿ ಫನೂಸ್‌, ಖಜಾನ ಫುಡ್‌ ಪ್ಯಾರಡೈಸ್‌, ಸಿದ್ದಿಕಿ ಕಬಾಬ್‌ ಕಾರ್ನರ್‌ ಮುಂತಾದ ಆಹಾರ ತಾಣಗಳಿದ್ದು ಈ ಪೈಕಿ ನೀವು ಚಿಕನ್‌ ರೋಲ್‌, ಶ್ವಾರ್ಮ ರೋಲ್‌ ಮತ್ತು ಕಬಾಬ್‌ಗಳನ್ನು ಸವಿಯಬೇಕಿದ್ದರೆ ಫನೂಸ್‌ಗೆ ಭೇಟಿ ಕೊಡುವುದು ಬೆಸ್ಟ್‌. ರುಚಿ ರುಚಿಯಾದ ಬಿರಿಯಾನಿ ಸವಿಯಬೇಕಿದ್ದರೆ ಖಜಾನ ಫುಡ್‌ ಪ್ಯಾರಡೈಸ್‌ಗೆ ಹೋಗಿ. ಇಡೀ ನಗರದಲ್ಲಿಯೇ ಅತ್ಯುತ್ತಮ ಟೇಸ್ಟ್‌ನ ಸೀಕ್‌ ಕಬಾಬ್‌ ತಿನ್ನುವ ಆಸೆಯಿದ್ದರೆ ಸಿದ್ದಿಕಿ ಕಬಾಬ್‌ ಕಾರ್ನರ್‌ಗೆ ಭೇಟಿ ಕೊಡಿ. ಈ ಮಾರ್ಕೆಟ್‌ನಲ್ಲಿ ಸಸ್ಯಾಹಾರಿಗಳಿಗೆ ಸಮೋಸ, ಮಿರ್ಚಿ ಬಜ್ಜಿ ಇತ್ಯಾದಿಗಳ ಆಪ್ಷನ್‌ ಇದೆ.