ದಾಖಲೆಯ ಕಿಚಡಿ

ಮಹಾರಾಷ್ಟ್ರದ ಷೆಫ್‌ ಒಬ್ಬರು ತಯಾರಿಸಿದ 3,000 ಕೆ.ಜಿ ಕಿಚಡಿ ಹೊಸ ದಾಖಲೆ ಸ್ಥಾಪಿಸುವ ಸಾಧ್ಯತೆ ಇದೆ. ಈ ಮೂಲಕ ಅದು ಕಳೆದ ವರ್ಷ ಸಿಲೆಬ್ರಿಟಿ ಷೆಫ್‌ ಸಂಜೀವ್‌ ಕಪೂರ್‌ ತಯಾರಿಸಿದ 918 ಕೆ.ಜಿ ಕಿಚಡಿಯ ದಾಖಲೆಯನ್ನು ಹಿಂದಿಕ್ಕಲಿದೆ ಎನ್ನಲಾಗುತ್ತಿದೆ. ಅಕ್ಟೋಬರ್‌ 19 ರಂದು ನಡೆದ ವರ್ಲ್ಡ್‌ ಫುಡ್‌ ಡೇ ಪ್ರಯುಕ್ತ ನಾಗಪುರದ ಷೆಫ್‌ ವಿಷ್ಣು ಮನೋಹರ್‌ ದೈತ್ಯ ಪಾತ್ರೆಯೊಂದರಲ್ಲಿ 3000 ಕೆ.ಜಿ ಕಿಚಡಿ ತಯಾರಿಸಿದ್ದರು. ಗಿನ್ನೆಸ್‌ ದಾಖಲೆ ಸೇರಲು ಮಾಡಿದ ಅವರ ಈ ಪ್ರಯತ್ನ ಯಶಸ್ವಿಯಾಗುವ ಸಾಧ್ಯತೆ ಇದೆ. ಈ ಕಿಚಡಿಗೆ ಅವರು 275 ಕೆ.ಜಿ ಅಕ್ಕಿ, 125 ಕೆ.ಜಿ ಹೆಸರುಬೇಳೆ, 150 ಕೆ.ಜಿ ಕಡ್ಲೆಬೇಳೆ, 3000 ಲೀಟರ್‌ ನೀರು, 150 ಕೆ.ಜಿ ತುಪ್ಪ ಬಳಸಿದ್ದಾರೆ. ಕಿಚಡಿ ಆರೋಗ್ಯಕ್ಕೆ ಒಳ್ಳೆಯದು. ಇದನ್ನು ಜನರು ತುಂಬಾ ಇಷ್ಟಪಟ್ಟು ತಿನ್ನುತ್ತಾರೆ. ಈ ಖಾದ್ಯವನ್ನು ರಾಷ್ಟ್ರೀಯ ಆಹಾರವನ್ನಾಗಿ ಘೋಷಿಸಬೇಕು ಎಂಬ ಉದ್ದೇಶವೂ ಈ ಪ್ರಯತ್ನದಲ್ಲಿದೆ ಎಂದು ವಿಷ್ಣು ಮನೋಹರ್‌ ಹೇಳಿದ್ದಾರೆ.