ರುಚಿ ಶುಚಿ ಅಡುಗೆಗೆ ಕಿಚನ್ ಟಿಪ್ಸ್

ಅಡುಗೆ ಕೋಣೆಯಲ್ಲಿ ಕೆಲವು ವಿಷಯಗಳತ್ತ ಗಮನ ಹರಿಸಿದರೆ ಅಡುಗೆ ಕೆಲಸ ತುಂಬಾ ಸುಲಭವಾಗುತ್ತದೆ ಹಾಗೂ ಮಾಡಿದ ಆಹಾರಗಳೂ ರುಚಿ ಶುಚಿಯಾಗಿರುತ್ತವೆ.

-ತರಕಾರಿ ಸೊಪ್ಪು ಸುತ್ತಲು ಅಥವಾ ಕೈ ಒರೆಸಲು ಇತ್ಯಾದಿಗಳಿಗೆ ನ್ಯೂಸ್‌ ಪೇಪರ್‌ ಬಳಸುವುದಾದರೆ ಪತ್ರಿಕೆಯ ಮಧ್ಯ ಪುಟಗಳನ್ನು ಉಪಯೋಗಿಸಿ. ಮೊದಲ ಪುಟ ಮತ್ತು ಕೊನೆಯ ಪುಟ ಫುಟ್‌ಪಾತ್‌ ಮೇಲೆ ಬಿದ್ದು ಕೊಳೆಯಾಗಿರುತ್ತದೆ.

-ಗುಲ್ಕಂದ್‌ ಗಟ್ಟಿಯಾಗಿದ್ರೆ ಅದಕ್ಕೆ ಸ್ವಲ್ಪ ಜೇನುತುಪ್ಪ ಸೇರಿಸಿ ಚೆನ್ನಾಗಿ ಕಲಸಿದರೆ ಮೃದು ಮತ್ತು ರುಚಿಯಾಗುತ್ತದೆ

-ಕಬ್ಬಿಣದ ಮತ್ತು ಕೋಟಿಂಗ್‌ ತವಾಗಳ ಮೇಲೆ ಸ್ವಲ್ಪ ಎಣ್ಣೆ ಹಾಗೂ ಪುಡಿ ಉಪ್ಪು ಹಾಕಿ ಅರ್ಧ ಕತ್ತರಿಸಿದ ಆಲೂಗೆಡ್ಡೆ ಹಿಂಭಾಗಕ್ಕೆÜ ಫೋರ್ಕ್‌ ಚುಚ್ಚಿ ತವಾ ಮೇಲೆ ಅದನ್ನು ಒಂದೆರಡು ಸುತ್ತು ಉಜ್ಜಿ ದೋಸೆ ಮಾಡಿದರೆ ದೋಸೆ ತವಾಗೆ ಅಂಟುವುದಿಲ್ಲ.

-ರಾಗಿ ಮುದ್ದೆ ಮಾಡುವಾಗ ನೀರಿಗೆ ಉಪ್ಪು ಮತ್ತು ಎಣ್ಣೆ ಹಾಕುವ ಜೊತೆಗೆ ಸ್ವಲ್ಪ ಖಾರ ಪುಡಿ ಅಥವಾ ಸಾರಿನ ಪುಡಿ ಹಾಕಿದರೆ ಮುದ್ದೆ ರುಚಿಯಾಗಿರುತ್ತದೆ.

-ರಾಗಿ ಹಿಟ್ಟಿನ ಜೊತೆಗೆ ಒಂದು ಹಿಡಿಯಷ್ಟು ಮೆತ್ತನೆಯ ಅನ್ನ ಸೇರಿಸಿದರೂ ಮುದ್ದೆ ಟೇಸ್ಟಿಯಾಗಿರುತ್ತದೆ.

-ಒಣ ಮೆಣಸಿನಕಾಯಿಯನ್ನು ಬಿಸಿ ನೀರಲ್ಲಿ ನೆನೆಸಿ ನಂತರ ಗ್ರೇವಿ ಮಸಾಲೆಗೆ ಹಾಕಿ ರುಬ್ಬಿದರೆ ಹೆಚ್ಚು ಗಾಢವಾದ ಕೆಂಪು ಬಣ್ಣ ಬರುತ್ತದೆ.