ವರ್ಲ್ಡ್‌ ಪೇಸ್ಟ್ರಿ ಕಪ್‌ ಗೆದ್ದ ಮಲೇಷ್ಯಾ

ಫ್ರಾನ್ಸ್‌ನಲ್ಲಿ ನಡೆದ ವರ್ಲ್ಡ್‌ ಪೇಸ್ಟ್ರಿ ಕಪ್‌ 2019 ಸ್ಪರ್ಧೆಯಲ್ಲಿ ಮಲೇಷ್ಯಾ ಬಾಣಸಿಗರ ತಂಡ ಗೆದ್ದಿದೆ. ಈ ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದ ಜಪಾನ್‌, ಬ್ರಿಟನ್‌ ಮುಂತಾದ 21 ದೇಶಗಳನ್ನು ಹಿಂದಿಕ್ಕಿ ಮಲೇಷ್ಯಾ ಈ ಕಪ್‌ ಗೆದ್ದುಕೊಂಡಿದೆ. ಪ್ರತಿ ಎರಡು ವರ್ಷಕ್ಕೊಮ್ಮೆ ಫ್ರಾನ್ಸ್‌ನ ಲಿವೊದಲ್ಲಿ ನಡೆಯುವ ಈ ಪೇಸ್ಟ್ರಿ ಮಾಡುವ ಸ್ಪರ್ಧೆ 1989 ರಿಂದ ಆರಂಭವಾಗಿದೆ. ಈ ಸಲದ ಸ್ಪರ್ಧೆಯಲ್ಲಿ ಮಲೇಷ್ಯಾ ತಂಡದ ಸದಸ್ಯರು ಎಲ್ವಿಸ್‌ನಂತೆ ಉಡುಪು ಧರಿಸಿದ ಕೋತಿಯ ಪೇಸ್ಟ್ರಿ ಮಾಡಿದ್ದರು. ಅಪ್ಪಟ ವೇಗನ್‌ ಪೇಸ್ಟ್ರಿಯಾಗಿದ್ದ ಇದು ತೀರ್ಪುಗಾರರಿಗೆ ಅತ್ಯಂತ ಮೆಚ್ಚುಗೆಯಾದ ಪೇಸ್ಟ್ರಿಯಾಗಿತ್ತಂತೆ. ಇದೇ ರೀತಿ ಟುನಿಷಿಯಾ ದೇಶದ ತಂಡ ಐಸ್‌ ಕಲಾಕೃತಿಯಂಥ ಪೇಸ್ಟ್ರಿ, ಆಸ್ಪ್ರೇಲಿಯಾ ತಂಡ ಹದ್ದಿನ ಆಕಾರದ ಪೇಸ್ಟ್ರಿ ತಯಾರಿಸಿ ಗಮನ ಸೆಳೆಯಿತು. ಜಗತ್ತಿನಾದ್ಯಂತವಿರುವ ಯುವ ಪೇಸ್ಟ್ರಿ ತಯಾರಕರಿಗೆ ಪ್ರೋತ್ಸಾಹ ನೀಡುವ ಉದ್ದೇಶದಿಂದ ನಡೆಯುವ ಈ ಸ್ಪರ್ಧೆಗೆ 50 ಹಂತಗಳಲ್ಲಿ ಆಯ್ಕೆ ಪ್ರಕ್ರಿಯೆ ನಡೆಯುತ್ತದೆ. ಶುಗರ್‌, ಚಾಕ್ಲೇಟ್‌ ಮತ್ತು ಐಸ್‌ ಎಂಬ ಮೂರು ವಿಭಾಗಗಳಲ್ಲಿ ಪೇಸ್ಟ್ರಿ ತಯಾರಿಸುವ ಸ್ಪರ್ಧೆ ನಡೆಯುತ್ತದೆ. ಈ ಬಾರಿ ನೇಚರ್‌, ಫ್ಲೋರ ಆ್ಯಂಡ್‌ ಫೌನ ಎಂಬ ಥೀಮ್‌ನಡಿ ಈ ಸ್ಪರ್ಧೆ ನಡೆದಿದೆ.