ಬಾಯಿ ನೀರೂರಿಸುವ ಮಿಸಳ್‌ ಪಾವ್‌

ಉತ್ತರ ಕರ್ನಾಟಕದ ಜನಪ್ರಿಯ ತಿನಿಸು ಮಿಸಳ್‌ ಪಾವ್‌ ರುಚಿಗೆ ಬೆಂಗಳೂರಿಗರೂ ಫಿದಾ ಆಗಿದ್ದಾರೆ. ನಗರದ ಕೆಲವೆಡೆ ಮಾತ್ರ ಸಿಗುವ ಈ ತಿನಿಸು ಚಾಟ್ಸ್‌ ವೆರೈಟಿಯಾಗಿ ಗಮನ ಸೆಳೆದಿದೆ.

ಬಬಿತಾ ಎಸ್‌.

ನೋಡಲು ಪಾವ್‌ ಭಾಜಿಯಂತೆ ಕಾಣುವ ಮಿಸಳ್‌ ಪಾವ್‌ ಉತ್ತರ ಕರ್ನಾಟಕದ ಕೆಲವು ಭಾಗಗಳಲ್ಲಿ ಪ್ರಮುಖ ಬ್ರೇಕ್‌ಫಾಸ್ಟ್‌. ಮೊಳಕೆ ಕಾಳುಗಳಿಂದ ಮಾಡಿದ ಗ್ರೇವಿ ಅಂದರೆ ಮಿಸಳ್‌ ಮತ್ತು ಮೃದು ಪಾವ್‌ನ ಕಾಂಬಿನೇಷನ್‌ ಆಗಿರುವ ಇದನ್ನು ಸೇವ್‌, ಕೊತ್ತಂಬರಿ ಸೊಪ್ಪು ಉದುರಿಸಿ ಸರ್ವ್‌ ಮಾಡಲಾಗುತ್ತದೆ. ಇದಕ್ಕೆ ನಿಂಬೆ ಹಣ್ಣಿನ ರಸ ಹಿಂಡಿ ತಿಂದರೆ ಅದರ ಸ್ವಾದವೇ ಬೇರೆ. ಒಮ್ಮೆ ತಿಂದರೆ ಮತ್ತೆ ಮತ್ತೆ ತಿನ್ನಬೇಕೆಂಬ ರುಚಿ ಇದರದು.

ನಾಸಿಕ್‌ ಮೂಲ

ಮಿಸಳ್‌ ಪಾವ್‌ನ ಮೂಲ ಮಹಾರಾಷ್ಟ್ರದ ನಾಸಿಕ್‌ ಜಿಲ್ಲೆ. ಅಲ್ಲಿನ ಅತ್ಯಂತ ಸಾಂಪ್ರದಾಯಿಕ ಉಪಾಹಾರವಾಗಿರುವ ಇದು ಮುಂಬಯಿ ಕರ್ನಾಟಕ ಪ್ರದೇಶಗಳಲ್ಲೂ ಮನೆಮಾತಾಗಿದೆ. ಇದೀಗ ಇದು ಬೆಂಗಳೂರಿನ ರೆಸ್ಟೋರೆಂಟ್‌ಗಳಲ್ಲೂ ಸ್ಥಾನ ಪಡೆದಿದೆ. ಇಲ್ಲಿ ಕೂಡಾ ನಾವು ಅತ್ಯಂತ ಸಾಂಪ್ರದಾಯಿಕ ರುಚಿಯ ಮಿಸಳ್‌ ಪಾವ್‌ಗಳನ್ನು ಸವಿಯಬಹುದು.

ವೆರೈಟಿ ಇದೆ

ಖಾರ ರುಚಿಯ ಮಿಸಳ್‌ ಪಾವ್‌ನಲ್ಲಿ ಹಲವಾರು ವೆರೈಟಿಗಳಿವೆ. ಈ ಪೈಕಿ ಕೊಲ್ಹಾಪುರಿ ಮಿಸಳ್‌, ನಾಸಿಕ್‌ ಮಿಸಳ್‌, ಖಾಂದೇಸಿ ಮಿಸಳ್‌, ನಾಗಪುರಿ ಮಿಸಳ್‌, ಪುಣೇರಿ ಮಿಸಳ್‌, ಸೇವ್‌ ಮಿಸಳ್‌ ಮತ್ತು ದಹಿ ಮಿಸಳ್‌ ಪ್ರಮುಖವಾದದ್ದು. ಈಗ ಇದರಲ್ಲೂ ಹಲವಾರು ಪ್ರಯೋಗಗಳು ನಡೆದಿದ್ದು, ಕೀಮ ಮಿಸಳ್‌ ಮುಂತಾದ ವೆರೈಟಿಗಳೂ ಸಿಗುತ್ತಿವೆ. ಮಡಿಕೆಕಾಳು, ಹೆಸರುಕಾಳು, ಬಟಾಣಿ, ಕಡಲೆ ಇತ್ಯಾದಿಗಳನ್ನು ಮೊಳಕೆ ಬರಿಸಿ ಇದರ ಗ್ರೇವಿಗೆ ಬಳಸಲಾಗುತ್ತದೆ. ಮಳೆಗಾಲಕ್ಕೆ ಮಿಸಳ್‌ ಪಾವ್‌ ಹೇಳಿ ಮಾಡಿಸಿದ ತಿನಿಸು.

ಡೋಂಟ್‌ ಮಿಸ್‌

ಬೆಂಗಳೂರಿನಲ್ಲಿ ಮಹಾರಾಷ್ಟ್ರ ಶೈಲಿಯ ಆಹಾರಗಳನ್ನು ಸರ್ವ್‌ ಮಾಡುವ ತಾಣಗಳಲ್ಲಿ ಮಿಸಳ್‌ ಪಾವ್‌ ಸಿಗುತ್ತದೆ. ತುಂಬಾ ರುಚಿಕರವಾದ ಮಿಸಳ್‌ ಪಾವ್‌ ಸವಿಯಲು ಈ ಕೆಳಗಿನ ತಾಣಗಳು ಬೆಸ್ಟ್‌.

ಸೂರ್ಯವಂಶಿ: ವೈಟ್‌ಫೀಲ್ಡ್‌ನಲ್ಲಿರುವ ಸೂರ್ಯವಂಶಿ ರೆಸ್ಟೋರೆಂಟ್‌ನಲ್ಲಿ ಅತ್ಯದ್ಭುತ ರುಚಿಯ ಮಿಸಳ್‌ ಪಾವ್‌ ಸವಿಯಬಹುದು.

ರಾಜವರ್ಧನ್‌ ಫುಡ್ಸ್‌: ಜಯನಗರ 9ನೇ ಬ್ಲಾಕ್‌ನಲ್ಲಿರುವ ರಾಜವರ್ಧನ್‌ ಫುಡ್ಸ್‌ನಲ್ಲೂ ಮಹಾರಾಷ್ಟ್ರೀಯನ್‌ ಶೈಲಿಯ ಮಿಸಳ್‌ ಪಾವ್‌ ಸಿಗುತ್ತದೆ.

ಚಾಟ್‌ಟೈಮ್ಸ್‌: ನಗರದ ವಿವಿಧೆಡೆ ತನ್ನ ಶಾಖೆ ಹೊಂದಿರುವ ಚಾಟ್‌ಟೈಮ್ಸ್‌ನಲ್ಲೂ ಶುಚಿ ರುಚಿಯಾದ ಮಿಸಳ್‌ ಪಾವ್‌ ರುಚಿ ನೋಡಬಹುದು. ಇಲ್ಲಿ ಚೀಸ್‌ ಮಿಸಳ್‌ ಪಾವ್‌ ಎಂಬ ವೆರೈಟಿಯೂ ಇದೆ.

ಪೂರ್ಣಬ್ರಹ್ಮ: ಎಚ್‌ಎಸ್‌ಆರ್‌ನಲ್ಲಿರುವ ಪೂರ್ಣಬ್ರಹ್ಮ ಮಹಾರಾಷ್ಟ್ರೀಯನ್‌ ರೆಸ್ಟೋರೆಂಟ್‌ ಕೂಡಾ ಮಿಸಳ್‌ ಪ್ರಿಯರಿಗೆ ಇಷ್ಟವಾಗುವ ತಾಣ.