ಮುಗುಳು ನಗೆ ಸಿನಿಮಾದಲ್ಲಿ ಬಬ್ಲಿ ಹುಡುಗಿಯಾಗಿ ಎಲ್ಲರ ಮನಗೆದ್ದ ಚೆಲುವೆ ನಿಖಿತಾ ನಾರಾಯಣ್ ಆಹಾರ ಪ್ರಿಯೆಯೂ ಹೌದು. ಇವರ ಫುಡ್ ಹ್ಯಾಬಿಟ್ ಹೀಗಿದೆ.
ನಂದಿನಿ ಕೆ.ಎಲ್
ಪ್ಯೂರ್ ವೆಜ್
ನಾನು ಪಕ್ಕಾ ಸಸ್ಯಾಹಾರಿ. ಅನ್ನ ಸಾಂಬಾರು, ಪಲ್ಯ ನನಗೆ ತುಂಬಾ ಇಷ್ಟವಾಗುತ್ತವೆ. ಚೈನೀಸ್ ಫುಡ್ ಸೇರಿದಂತೆ ನಾರ್ತ್ ಇಂಡಿಯನ್ ಖಾದ್ಯಗಳು ನನ್ನ ಫೇವರಿಟ್ಸ್. ಊಟ ಸಿಂಪಲ್ ಆಗಿದ್ದರೂ ಸೂಪರ್ ಆಗಿರಬೇಕು ಎನ್ನುವುದು ನನ್ನ ಪಾಲಿಸಿ.
ವೆರೈಟಿ ಅಡುಗೆ ಮಾಡುವೆ
ನನಗೆ ಚೆನ್ನಾಗಿ ಅಡುಗೆ ಮಾಡಲು ಗೊತ್ತಿದೆ. ನಾನು ಯುಟ್ಯೂಬ್ ನೋಡಿ ವೈವಿಧ್ಯಮಯ ಅಡುಗೆ ತಯಾರಿಸುತ್ತೇನೆ. ಸ್ವೀಟ್ಸ್, ನಾರ್ತ್ ಇಂಡಿಯನ್, ಕಾಂಟಿನೆಂಟಲ್, ಚೈನೀಸ್ ಫುಡ್ಗಳನ್ನು ಟೇಸ್ಟಿಯಾಗಿ ಮಾಡುತ್ತೇನೆ. ಬಗೆ ಬಗೆಯ ಸ್ನ್ಯಾಕ್ಸ್ ತಯಾರಿಸುವ ಕ್ರೇಝ್ ನನಗಿದೆ. ನಾನು ಮಾಡುವ ಅಡುಗೆಯನ್ನು ಎಲ್ಲರೂ ಇಷ್ಟಪಡುತ್ತಾರೆ.
ಅಮ್ಮನ ತಂಬುಳಿ ಸೂಪರ್
ನನ್ನಮ್ಮ ನನ್ನ ಟೇಸ್ಟ್ಗೆ ತಕ್ಕಂತೆ ಉತ್ತಮವಾಗಿ ಅಡುಗೆ ತಯಾರಿಸುತ್ತಾರೆ. ಅವರು ಮಜ್ಜಿಗೆ ಹುಳಿ, ತಂಬುಳಿ, ಆಲೂ ಪರೋಟ, ಆಲೂ ಫ್ರೈ, ಬೆಂಡೆ ಕರ್ರಿ, ಸಾದಾ ಪರೋಟ ಇತ್ಯಾದಿಗಳನ್ನು ಸಖತ್ತಾಗಿ ಮಾಡುತ್ತಾರೆ. ಅವರ ಅಡುಗೆಯನ್ನು ನಾನು ಎರಡು ತುತ್ತು ಹೆಚ್ಚಾಗಿಯೇ ಸೇವಿಸುತ್ತೇನೆ.
ನೋ ಡಯಟ್
ನಾನು ಫೂಡಿಯಾಗಿರುವುದರಿಂದ ಡಯಟ್ ಮಾಡುವುದಿಲ್ಲ. ಯಾವ ಸ್ಥಳಕ್ಕೆ ಹೋದರೂ ಅಲ್ಲಿಯದೇ ಫುಡ್ ಟೇಸ್ಟ್ ಮಾಡಲು ಇಷ್ಟಪಡುತ್ತೇನೆ. ಪಾಪ್ಯುಲರ್ ಸ್ಟ್ರೀಟ್ ಫುಡ್ನಿಂದ ಹಿಡಿದು ಫೈವ್ಸ್ಟಾರ್ ಹೋಟೆಲ್ನ ಆಹಾರವೂ ನನಗಿಷ್ಟ. ಸಮತೋಲಿತವಾದ ಪೌಷ್ಟಿಕ ಆಹಾರ ಸೇವಿಸಿದರೆ ಡಯಟ್ ಮಾಡುವ ಅವಶ್ಯತೆಯಿಲ್ಲ.
ತಿನ್ನುವ ಖುಷಿ
ಆಹಾರವನ್ನು ತಿಂದಾಗ ಖುಷಿ ಸಿಗಬೇಕು. ಯಾವುದೇ ಆಹಾರವನ್ನೂ ಎಂಜಾಯ್ ಮಾಡಿಕೊಂಡು ಸೇವಿಸಬೇಕು. ಅದರಲ್ಲಿ ನಮಗಿಷ್ಟವಾಗುವ ಫ್ಲೇವರ್ ಇರಬೇಕು. ಅದು ನಮ್ಮನ್ನು ಆರೋಗ್ಯದೆಡೆಗೆ ಕೊಂಡೊಯ್ಯಬೇಕು. ಒಮ್ಮೆ ತುಂಬಾ ಹಸಿವಾಗಿ ಮೊದಲ ಬಾರಿಗೆ ಅಣಬೆ ಕರ್ರಿ ಮಾಡಲು ಹೋಗಿದ್ದೆ. ಅಣಬೆಯನ್ನು ಎಷ್ಟು ಬೇಯಿಸಿದರೂ ಬೇಯಲೇ ಇಲ್ಲ. ಅದನ್ನು ತಿನ್ನದೆ ಹಾಗೆಯೇ ಚೆಲ್ಲಿಬಿಟ್ಟೆ. ಇನ್ನೊಮ್ಮೆ ಒಡೆದ ಹಾಲಿನಿಂದ ರಸಗುಲ್ಲಾ ಮಾಡಿ ಎಲ್ಲರಿಂದಲೂ ಸೈ ಎನಿಸಿಕೊಂಡಿದ್ದೆ.