ರೆಸಿಪಿ: ಆರ್ಯವೈಶ್ಯ ಸ್ಪೆಷಲ್: ಅವರೆ ಬೇಳೆ ಪಿತಕ ಪೊಪು

ಅವರೆಕಾಯಿಯಲ್ಲಿ ಹಲವಾರು ಬಗೆಯ ಖಾದ್ಯಗಳನ್ನು ಮಾಡಬಹುದು. ಆದರೆ ಆರ್ಯ ವೈಶ್ಯ ಜನಾಂಗದದಲ್ಲೇ ಮಾಡುವ ವಿಶೇಷ ಅಡುಗೆ ಅವರೆ ಬೇಳೆ ಪಿತಕ ಪೊಪು.

ಸಾಮಗ್ರಿ:

ಒಂದು ಪಾವು ಸಿಪ್ಪೆ ತೆಗೆದ ಅವರೆ ಬೇಳೆ, ಎರಡು ಈರುಳ್ಳಿ ಹೆಚ್ಚಿದ್ದು. ಒಂದು ಚಿಕ್ಕ ಬೆಳ್ಳುಳ್ಳಿ, ಒಂದು ಸೌಟು ಒಳ್ಳೆಣ್ಣೆ.

ಖಾರದ ಮಸಾಲೆ ರುಬ್ಬಲಿಕ್ಕಾಗಿ ಹತ್ತು ಬ್ಯಾಡಗಿ ಮೆಣಸಿನ ಕಾಯಿ, ಒಂದು ತುಂಡು ಒಣಕೊಬ್ಬರಿ, ತುರಿದು, ಹಸಿ ಈರುಳ್ಳಿ ಸುಟ್ಟ ಈರುಳ್ಳಿ ಅಧರ್, ಹಸಿ ಬೆಳ್ಳುಳ್ಳಿ ಸುಟ್ಟ ಬೆಳ್ಳುಳ್ಳಿ ನಾಲ್ಕು ನಾಲ್ಕು ತೊಳೆ. ಧನಿಯಾ, ಜೀರಿಗೆ ಅರ್ಧ ಹಿಡಿ. ಮೆಣಸು ಅರ್ಧ ಚಮಚ. ಮೆಂತ್ಯೆ ಅರ್ಧ ಚಮಚ, ಸಾಸವೆ ಅರ್ಧ ಚಮಚ. ಈರುಳ್ಳಿ ಬೆಳ್ಳುಳ್ಳಿ ಬಿಟ್ಟು ಮಿಕ್ಕೆಲ್ಲಾ ಸಾಮಾನುಗಳನ್ನು ಹುರಿದು ಪುಡಿ ಮಾಡಿಕೊಳ್ಳಿ. ಇದರ ಜತೆಗೆ ಈರುಳ್ಳಿ, ಬೆಳ್ಳುಳ್ಳಿ, ನೆನೆಸಿದ ಅವರೆ ಬೇಳೆ ಒಂದು ಹಿಡಿ ಹಾಕಿ ಗಟ್ಟಿಯಾಗಿ ಸ್ವಲ್ಪವೇ ನೀರು ಸೇರಿಸಿ ರುಬ್ಬಿಕೊಳ್ಳಿ . ಒಂದು ಕಪ್ ತೆಂಗಿನ ತುರಿ, ಅರ್ಧ ಚಟಾಕು ಗಸಗಸೆ. ನುಣ್ಣಗೆ ರುಬ್ಬಿ ಬೇರೆಯಾಗಿ ತೆಗೆದಿಡಿ. ಸ್ವಲ್ಪ ಹುಣಸೇ ರಸ, ರುಚಿಗೆ ತಕ್ಕಷ್ಟು ಉಪ್ಪು ,ಸ್ವಲ್ಪ ಬೆಲ್ಲ.

ವಿಧಾನ:

ಒಂದು ಕುಕ್ಕರ್ ಪ್ಯಾನ್‌ನಲ್ಲಿ ಎಣ್ಣೆ ಹಾಕಿ ಕಾದನಂತರ ಹಿಂಗು ಸಾಸಿವೆ ಕರಿಬೇವು, ಒಣ ಮೆಣಸಿನಕಾಯಿಯ ತುಂಡುಗಳು, ದಪ್ಪಗೆ ಹೆಚ್ಚಿದ ಈರುಳ್ಳಿ, ಬೆಳ್ಳುಳ್ಳಿ ಎಸಳುಗಳನ್ನು ಹಾಕಿ ಹುರಿದು ಹಿತುಕಿದ ಅವರೆ ಬೇಳೆ ಹಾಕಿ, ಅರಿಶಿನ ಪುಡಿ ಹಾಕಿ, ತಿರುವಿದ ಕಾರದ ಮಸಾಲೆ ಹಾಕಿ ಚೆನ್ನಾಗಿ ಕಲೆಸಿ ಮತ್ತೆ ಹುರಿದು ಕಾಳು ಮುಳುಗುವಷ್ಟು ಕುದಿಯುವ ನೀರು ಹಾಕಿ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಮುಚ್ಚಳ ಮುಚ್ಚಿ ಸ್ಟೀಮ್ ಬಂದಾಗ ವೈಟ್ ಹಾಕಿ. ಕೂಗುವ ಶಬ್ದ ಶುರುವಾಗುತ್ತಲೇ ಆರಿಸಿ ಬಿಡಿ. ರಿಲೀಸ್ ಆದಮೇಲೆ, ಕಾಯಿ ಗಸಗಸೆ ರುಬ್ಬಿದ ಮಸಾಲೆ ಹುಣಸೇರಸ ಬೆಲ್ಲ ಹಾಕಿ ಒಂದು ಲೋಟ ನೀರು ಅಥವ ಹಾಲು ಹಾಕಿ ಕುದಿಸಿರಿ.( ಇಡ್ಲಿ ಹಿಟ್ಟಿನ ಹದ ಬರುವಂತೆ) ಇದು ಪೂರಿ, ಚಪಾತಿ, ಅವಲಕ್ಕಿ ದೋಸೆ, ಉಜ್ಜುರೊಟ್ಟಿ ಮತ್ತು ಬಿಸಿ ಅನ್ನದ ಜೊತೆಗೂ ತಿನ್ನಲು ರುಚಿಯಾಗಿರುತ್ತದೆ.

- ಲೀಲಾ ಚಂದ್ರಶೇಖರ್