ತುಂಬಾ ರುಚಿಯಾಗಿರುತ್ತೆ ಈ ಶಹಿ ದಾಲ್ ರೆಸಿಪಿ

ನೀವು ಶಹಿ ದಾಲ್ ಟೇಸ್ಟ್ ಮಾಡಿಲ್ಲ ಎಂದರೆ ಇದನ್ನು ಮಾಡಲು ತಡಮಾಡಬೇಡಿ. ಉದ್ದಿನ ಬೇಳೆ ಹಾಕಿ ಮಾಡುವ ಈ ರೆಸಿಪಿ ತುಂಬಾ ರುಚಿಯಾಗಿರುತ್ತೆ.

ಬೇಕಾಗುವ ಸಾಮಗ್ರಿ
3 ಕಪ್ ಉದ್ದಿನ ಬೇಳೆ
2-3 ಏಲಕ್ಕಿ
2 ಕಪ್ ಈರುಳ್ಳಿ
ಸಿಪ್ಪೆ ಸುಲಿದ ಬಾದಾಮಿ
1 ಚಮಚ ಅರಿಶಿಣ ಪುಡಿ
2 ಚಮಚ ತುಪ್ಪ
2 ಕಪ್ ಟೊಮೆಟೊ
ನೀರು
2 ಚಮಚ ತುರಿದ ಶುಂಠಿ
2 ಚಮಚ ಖಾರದ ಪುಡಿ
ರುಚಿಗೆ ತಕ್ಕ ಉಪ್ಪು
1 ಕಪ್ ಹಾಲು
1 ಚಮಚ ಜೀರಿಗೆ
ಅರ್ಧ ಚಮಚ ಚಿಕ್ಕದಾಗಿ ಕತ್ತರಿಸಿದ ಬೆಳ್ಳುಳ್ಳಿ
1 ಚಮಚ ಗರಂ ಮಸಾಲ ಪುಡಿ

ಅಲಂಕಾರಕ್ಕೆ ಸ್ವಲ್ಪ ಕೊತ್ತಂಬರಿ ಸೊಪ್ಪು

ಶಾಹಿ ದಾಲ್ ಮಾಡುವುದು ಹೇಗೆ?

ಸ್ಟೆಪ್ 1
ಈ ರೆಸಿಪಿ ಮಾಡಲು ಉದ್ದಿನ ಬೇಳೆಯನ್ನು ಅರಿಶಿಣ ಪುಡಿ, ಉಪ್ಪು, ಬಾದಾಮಿ ಪುಡಿ, ಏಲಕ್ಕಿ ಜತೆ ಮಿಕ್ಸ್ ಮಾಡಿ ಬೇಯಲು ಬೇಕಾದಷ್ಟು ನೀರು ಹಾಕಿ ಕುಕ್ಕರ್‌ನಲ್ಲಿ 3 ವಿಶಲ್‌ ಬರುವವರೆಗೆ ಬೇಯಿಸಿ.

ಸ್ಟೆಪ್ 2
ಈಗ ಬೆಂದ ಉದ್ದಿನ ಬೇಳೆಗೆ 1 ಕಪ್ ಹಾಲು ಹಾಕಿ ಮಿಕ್ಸ್ ಮಾಡಿ ಒಂದು ಬದಿಯಲ್ಲಿ ಇಡಿ.

ಸ್ಟೆಪ್ 3
ಈಗ ಪ್ಯಾನ್‌ ಬಿಸಿ ಮಾಡಿ ಅದರಲ್ಲಿ ಒಂದು ಚಮಚ ತುಪ್ಪ ಹಾಕಿ, ನಂತರ ಜೀರಿಗೆ ಹಾಕಿ, ಜೀರಿಗೆ ಚಟ್‌ಪಟ್‌ ಶಬ್ದ ಮಾಡುವಾಗ ಈರುಳ್ಳಿ ಹಾಕಿ, ಶುಂಠಿ, ಬೆಳ್ಳುಳ್ಳಿ ಹಾಕಿ ಸ್ವಲ್ಪ ಹೊತ್ತು ಸೌಟ್‌ನಿಂದ ಆಡಿಸುತ್ತಾ ಫ್ರೈ ಮಾಡಿ. ಈಗ ಟೊಮೆಟೊ ಹಾಕಿ, ರುಚಿಗೆ ತಕ್ಕ ಉಪ್ಪು , ಖಾರದ ಪುಡಿ ಹಾಕಿ 2 ನಿಮಿಷ ಬಿಸಿ ಮಾಡಿ.

ಸ್ಟೆಪ್ 4
ಈಗ ಹಾಲು ಮಿಕ್ಸ್ ಮಾಡಿದ ಬೇಳೆಯನ್ನು ಹಾಕಿ, ನಂತರ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ ಗ್ಯಾಸ್‌ ಆಫ್‌ ಮಾಡಿ.

ಇಷ್ಟು ಮಾಡಿದರೆ ಸವಿಯಲು ಶಹಿ ದಾಲ್ ರೆಡಿ