ಕೇಸರಿ ಬಿಳಿ ಹಸಿರು ಫ್ಲೇವರ್‌

ಲವಲವಿಕೆ ಸುದ್ದಿಲೋಕ

ಈ ಬಾರಿಯ ಸ್ವಾತಂತ್ರೋತ್ಸವಕ್ಕೆ ಕೇಸರಿ, ಬಿಳಿ, ಹಸಿರು ಬಣ್ಣದ ಸಿಹಿ ತಿಂಡಿಗಳನ್ನು ಮನೆಯಲ್ಲಿಯೇ ತಯಾರಿಸಿ ಎಂಜಾಯ್‌ ಮಾಡಿ.

ತಿರಂಗಾ ರೈಸ್‌

ಒಂದೂವರೆ ಕಪ್‌ ಅಕ್ಕಿಯನ್ನು ಮೂರು ಭಾಗಗಳನ್ನಾಗಿ ಮಾಡಿ ಒಂದಕ್ಕೆ ಕೇಸರಿ ಮತ್ತು ಇನ್ನೊಂದಕ್ಕೆ ಹಸಿರು ಬಣ್ಣ ಹಾಕಿ ಬೇಯಿಸಿ. ಸಕ್ಕರೆ ಸಿರಪ್‌ ತಯಾರಿಸಿ ಅದಕ್ಕೆ ಕೇಸರಿ ದಳ ಹಾಗೂ ಏಲಕ್ಕಿ ಪುಡಿ ಹಾಕಿ. ಮೂರು ಬಣ್ಣಗಳ ಅನ್ನಕ್ಕೆ ಸಕ್ಕರೆ ಸಿರಪ್‌ ಹಾಕಿ ಅನ್ನ ಗಟ್ಟಿಯಾಗುವ ತನಕ ಮತ್ತೆ ಬೇಯಿಸಿ. ಬಳಿಕ ಒಂದು ಗ್ಲಾಸ್‌ನಲ್ಲಿ ಕ್ರಮವಾಗಿ ಹಸಿರು, ಬಿಳಿ, ಕೇಸರಿ ಬಣ್ಣದ ಅನ್ನ ತುಂಬಿ ಮೇಲೆ ಡ್ರೈಫ್ರೂಟ್ಸ್‌ ಉದುರಿಸಿ ಸರ್ವ್‌ ಮಾಡಿ.

ತ್ರಿವರ್ಣ ಬರ್ಫಿ

ಕಾಲು ಕೆ.ಜಿ ಗೋಡಂಬಿ ಮತ್ತು 150 ಗ್ರಾಂ ಬಾದಾಮಿಯನ್ನು ಪ್ರತ್ಯೇಕವಾಗಿ ಅರ್ಧ ಗಂಟೆ ನೆನೆಸಿಡಿ. ಬಾದಾಮಿಯ ಸಿಪ್ಪೆ ತೆಗೆದು ಮಿಕ್ಸಿ ಜಾರ್‌ಗೆ ಗೋಡಂಬಿ, ಒಂದು ಕಪ್‌ ಹಾಲು ಮತ್ತು ಮುಕ್ಕಾಲು ಕೆ.ಜಿ ಸಕ್ಕರೆ ಹಾಕಿ ನುಣ್ಣಗೆ ಅರೆಯಿರಿ. ಈ ಮಿಶ್ರಣವನ್ನು ಮೂರು ಭಾಗಗಳಾಗಿ ವಿಂಗಡಿಸಿ. ಒಂದು ಭಾಗಕ್ಕೆ ಕೇಸರಿ ಬಣ್ಣ, ಒಂದು ಚಮಚ ತುಪ್ಪ ಮತ್ತು ಏಲಕ್ಕಿ ಪುಡಿ ಹಾಕಿ ಬಿಸಿ ಮಾಡಿ. ಈ ಮಿಶ್ರಣವನ್ನು ಜಿಡ್ಡು ಸವರಿದ ತಟ್ಟೆಗೆ ಹಾಕಿ ಹರಡಿಸಿ. ಇನ್ನೊಂದು ಭಾಗಕ್ಕೆ ಯಾವುದೇ ಬಣ್ಣ ಹಾಕದೆ ಕೇವಲ ತುಪ್ಪ ಮತ್ತು ಏಲಕ್ಕಿ ಪುಡಿ ಹಾಕಿ ಬಿಸಿ ಮಾಡಿ ಹರಡಿದ ಕೇಸರಿ ಮಿಶ್ರಣದ ಮೇಲೆ ಹಾಕಿ ಸಮತಟ್ಟು ಮಾಡಿ. ಕೊನೆಯ ಭಾಗಕ್ಕೆ ಹಸಿರು ಬಣ್ಣ, ತುಪ್ಪ ಮತ್ತು ಏಲಕ್ಕಿ ಪುಡಿ ಹಾಕಿ ಬಿಸಿ ಮಾಡಿ ಬಿಳಿ ಮಿಶ್ರಣದ ಮೇಲೆ ಹಾಕಿ ಹರಡಿಸಿ. ಇದು ತಣ್ಣಗಾದ ಮೇಲೆ ಚೌಕಾಕಾರಕ್ಕೆ ಕತ್ತರಿಸಿ ಕೊಡಿ.

ಟ್ರಿ ಕಲರ್‌ ಸಲಾಡ್‌

ಹೆಚ್ಚಿದ ಸಣ್ಣ ಬ್ರಾಕೊಲಿ, ಉದ್ದಕ್ಕೆ ಹೆಚ್ಚಿದ ಎಂಟು ಬೇಬಿ ಕಾರ್ನ್‌ ಮತ್ತು ಉದ್ದಕ್ಕೆ ಹೆಚ್ಚಿದ ಕ್ಯಾರೆಟ್‌ಗಳನ್ನು ಉಪ್ಪು ಹಾಕಿ ಐದು ನಿಮಿಷ ಬೇಯಿಸಿ ನೀರು ಬಸಿದಿಡಿ. ಬಾಣಲೆಯಲ್ಲಿ ಸ್ವಲ್ಪ ಬೆಣ್ಣೆ ಬಿಸಿ ಮಾಡಿ ಈ ತರಕಾರಿ ತುಣುಕುಗಳನ್ನು ಪ್ರತ್ಯೇಕವಾಗಿ ಪೆಪ್ಪರ್‌ ಪುಡಿ ಹಾಕಿ ಹುರಿಯಿರಿ. ಇವುಗಳನ್ನು ಬಿಳಿ ಪ್ಲೇಟ್‌ನಲ್ಲಿ ಪ್ರತ್ಯೇಕವಾಗಿ ಕ್ಯಾರೆಟ್‌, ಬೇಬಿ ಕಾರ್ನ್‌ ಮತ್ತು ಬ್ರಾಕೊಲಿ ಬರುವಂತೆ ಜೋಡಿಸಿ.