ಅಡುಗೆ ಮನೆಯಲ್ಲಿರಲಿ ವೆರೈಟಿ ಚಾಕು

ದೈನಂದಿನ ಅಡುಗೆ ಕೆಲಸಗಳಿಗೆ ಸೂಕ್ತವಾಗುವ ಚಾಕುಗಳನ್ನು ಬಳಸಿದರೆ ಅಡುಗೆ ಕೆಲಸ ಸುಲಭವಾಗುತ್ತದೆ. ತರಕಾರಿ, ಮಾಂಸ, ಬ್ರೆಡ್‌, ಹಣ್ಣು ಇತ್ಯಾದಿಗಳನ್ನು ಕತ್ತರಿಸಲು ಒಂದೇ ಚಾಕು ಬಳಸಿದರೆ ಕೆಲಸ ನಿಧಾನಗತಿಯಲ್ಲಿ ಸಾಗುತ್ತದೆ. ಕೆಲವು ಚಾಕುಗಳನ್ನು ನಿರ್ದಿಷ್ಟ ವಸ್ತುಗಳನ್ನು ಕತ್ತರಿಸಲೆಂದೇ ವಿನ್ಯಾಸಗೊಳಿಸಲಾಗಿರುತ್ತದೆ. ಅಂಥ ಚಾಕುಗಳ ವಿವರ ಇಲ್ಲಿದೆ.

ಪೇರಿಂಗ್‌ ಚಾಕು: ಸಣ್ಣ ಚಾಕುವಾಗಿರುವ ಇದರ ಬ್ಲೇಡ್‌ ಹರಿತವಾಗಿರುತ್ತದೆ. ಸಣ್ಣ ಗಾತ್ರದ ಈ ಚಾಕುವನ್ನು ಹಿಡಿಯಲು ಸುಲಭ ಮತ್ತು ಇದರಲ್ಲಿ ಹಣ್ಣು ಮತ್ತು ತರಕಾರಿಗಳ ಸಿಪ್ಪೆಯನ್ನು ಸುಲಭವಾಗಿ ತೆಗೆಯಬಹುದು. ಇದನ್ನು ಆಲ್‌ ಪರ್ಪಸ್‌ ನೈಫ್‌ ಎಂದೂ ಕರೆಯಲಾಗುತ್ತದೆ.

ಕಿಚನ್‌ ಶಿಯರ್ಸ್‌: ಕತ್ತರಿಯಂತಿರುವ ಈ ಚಾಕುವಿನ ಒಂದು ಅಂಚು ಗರಗಸದಂತಿರುತ್ತದೆ. ಇದನ್ನು ಮಾಂಸ ಕತ್ತರಿಸಲು, ಸೊಪ್ಪು ಕತ್ತರಿಸಲು, ಆಹಾರ ಪೊಟ್ಟಣಗಳನ್ನು ಕತ್ತರಿಸಲು ಬಳಸಲಾಗುತ್ತದೆ.

ಗ್ರಾಂಟನ್‌ ಎಡ್ಜ್‌: ಹರಿತವಾಗಿರುವ ಈ ಚಾಕುವಿನ ಅಂಚಿನಲ್ಲಿ ಗುಳಿಗಳಂಥ ರಚನೆಗಳಿವೆ. ಮಾಂಸ, ಸೀಫುಡ್‌, ಚೀಸ್‌, ಸೌತೆಕಾಯಿ ಮತ್ತು ಬೀಟ್‌ರೂಟ್‌ನಂತಹ ತರಕಾರಿಗಳನ್ನು ಸ್ಲೈಸ್‌ ಮಾಡಲು ಇಂಥ ಚಾಕು ಉಪಯೋಗಿಸಲಾಗುತ್ತದೆ.

ಫಿಲ್ಲೆಟ್‌ ಚಾಕು: ಮೀನು ಕತ್ತರಿಸಲು ಹೆಚ್ಚು ಬಳಕೆಯಾಗುವ ಈ ಚಾಕು ಉದ್ದನೆಯ ಮತ್ತು ತೆಳ್ಳನೆಯ ಬ್ಲೇಡ್‌ ಹೊಂದಿದೆ. ಇದರಿಂದ ಮೃದುವಾದ ಮೀನುಗಳನ್ನು ಸ್ಲೈಸ್‌ ಮಾಡಿ ಮುಳ್ಳುಗಳನ್ನು ಸುಲಭವಾಗಿ ಸ್ಲೈಸ್‌ ಮಾಡಬಹುದು.

ಕ್ಲೀವರ್‌ ಚಾಕು: ನಿಯಮಿತವಾಗಿ ಮಾಂಸಾಹಾರ ಸೇವಿಸುವವರ ಮನೆಯಲ್ಲಿ ಇರಲೇಬೇಕಾದ ಚಾಕುವಿದು. ಮಾಂಸದ ದೊಡ್ಡ ತುಂಡುಗಳನ್ನು ಇದರಲ್ಲಿ ಕತ್ತರಿಸಬಹುದು. ಆಯತಾಕಾರದ ಮತ್ತು ಸ್ವಲ್ಪ ಭಾರವಾಗಿರುವ ಬ್ಲೇಡ್‌ ಹೊಂದಿರುವ ಇದರಲ್ಲಿ ಮಾಂಸವನ್ನು ಮೂಳೆ ಸಮೇತ ಕತ್ತರಿಸಲು ಸಾಧ್ಯವಿದೆ. ತರಕಾರಿಗಳನ್ನೂ ಈ ಚಾಕುವಿನಲ್ಲಿ ಬೇಗನೆ ಕತ್ತರಿಸಬಹುದು.

ಷೆಫ್‌ ನೈಫ್‌: ಡೈಸಿಂಗ್‌, ಸ್ಲೈಸಿಂಗ್‌, ಚಾಪಿಂಗ್‌ ಮತ್ತು ಮಿನ್ಸಿಂಗ್‌ ಇತ್ಯಾದಿಗಳಿಗೆಲ್ಲಾ ಬಳಕೆಯಾಗುವ ಈ ಚಾಕು ಪ್ರಮುಖ ರೆಸ್ಟೋರೆಂಟ್‌ಗಳ ಷೆಫ್‌ಗಳ ಬಳಿ ಇದ್ದೇ ಇರುತ್ತದೆ. ಷೆಫ್‌ ನೈಫ್‌ ಎಂದ ಮಾತ್ರಕ್ಕೆ ಇದು ಕೇವಲ ಷೆಫ್‌ಗಳು ಬಳಸುವ ಚಾಕು ಎಂದೇನೂ ಅಲ್ಲ. ಪ್ರತಿದಿನ ಈ ಚಾಕುವನ್ನು ಬಳಸಿ ಎಲ್ಲಾ ರೀತಿಯ ಅಡುಗೆ ಸಾಮಗ್ರಿಗಳನ್ನು ಕತ್ತರಿಸಬಹುದು ಎಂಬ ಕಾರಣಕ್ಕೆ ಇದನ್ನು ಷೆಫ್‌ ನೈಫ್‌ ಎನ್ನಲಾಗುತ್ತದೆ.

ಕರ್ವಿಂಗ್‌ ಚಾಕು: ಮಾಂಸವನ್ನು ತುಂಬಾ ತೆಳ್ಳಗೆ ಸ್ಲೈಸ್‌ ಮಾಡಲು ಈ ಚಾಕು ಬಳಸಲಾಗುತ್ತದೆ. ಷೆಫ್‌ ನೈಫ್‌ಗಿಂತ ಉದ್ದವಾಗಿರುವ ಇದು ಮಾಂಸವನ್ನು ಅತ್ಯಂತ ತೆಳ್ಳಗೆ ಇಬ್ಭಾಗಿಸುತ್ತದೆ. ದೊಡ್ಡ ಪಾರ್ಟಿ, ಡಿನ್ನರ್‌ಗಳ ಅಡುಗೆಗಳಿಗೆ ಈ ಚಾಕು ಬಳಸುತ್ತಾರೆ.

ಬ್ರೆಡ್‌ ಚಾಕು: ಉದ್ದ, ಆಯತಾಕಾರ ಮತ್ತು ಗರಗಸದಂಥ ಅಂಚಿರುವ ಈ ಚಾಕುವನ್ನು ಬೇಕರಿ ತಿನಿಸುಗಳನ್ನು ಕತ್ತರಿಸಲು ಉಪಯೋಗಿಸುತ್ತಾರೆ. ಬ್ರೆಡ್‌, ಕೇಕ್‌ ಇತ್ಯಾದಿಗಳನ್ನು ಇದರಿಂದ ಕತ್ತರಿಸಿದರೆ ಅವು ಪುಡಿಪುಡಿಯಾಗದೆ ಇಬ್ಭಾಗವಾಗುತ್ತವೆ.

ಬೋನಿಂಗ್‌ ಚಾಕು: ಮಾಂಸ, ಮೀನುಗಳ ಮೂಳೆ, ಮುಳ್ಳುಗಳ ಸುತ್ತವಿರುವ ಮಾಂಸವನ್ನು ತೆಗೆಯಲು ಈ ಚಾಕು ಬಳಸಲಾಗುತ್ತದೆ.