ವದಂತಿಯ ಭಯ ಬೇಡ: ಬಾಳೆಹಣ್ಣು ಮೊಟ್ಟೆ ತಿನ್ನಿ

ಮೊಟ್ಟೆ ಜತೆ ಬಾಳೆಹಣ್ಣು ತಿಂದರೆ ಸತ್ತು ಹೋಗುತ್ತೇವೆ ಎಂಬ ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ಸದ್ದು ಮಾಡುತ್ತಿದೆ. ಈ ಸುದ್ದಿ ನಿಮ್ಮ ವಾಟ್ಸಾಪ್‌ಗೂ ಬಂದಿರಬಹುದಲ್ವಾ?

'ಒಬ್ಬ ಯುವಕ ಮೊಟ್ಟೆ ತಿಂದ ತಕ್ಷಣ ಬಾಳೆಹಣ್ಣು ತಿನ್ನುತ್ತಾನೆ, ತಕ್ಷಣವೇ ಅವನಿಗೆ ಹೊಟ್ಟೆ ನೋವು ಕಾಣಿಸಿ ಸತ್ತು ಹೋಗುತ್ತಾನೆ. ಅವನ ಸಾವಿಗೆ ಮೊಟ್ಟೆ ಮತ್ತು ಬಾಳೆಹಣ್ಣನ್ನು ಜತೆಗೆ ತಿಂದದ್ದೇ ಕಾರಣ ಎನ್ನುವುದು ಸಂಶೋಧನೆಯಿಂದ ತಿಳಿದು ಬಂದಿದೆ. ಆದ್ದರಿಂದ ಯಾರೂ ಮೊಟ್ಟೆ ಜತೆ ಬಾಳೆಹಣ್ಣು ತಿನ್ನಬೇಡಿ ಎಂಬ ಮೆಸೇಜ್ ಓದಿ ಇದು ನಿಜವಿರಬಹುದೇ ಎಂಬ ಆತಂಕ ಉಂಟಾಗಿದೆಯೇ? ಹಾಗಾದರೆ ನಿಮ್ಮ ಆತಂಕವನ್ನು ದೂರತಳ್ಳಿ ನೆಮ್ಮದಿಯ ನಿಟ್ಟುಸಿರುರು ಬಿಡಿ. ಏಕೆಂದರೆ ಅಂತರ್ಜಾಲದಲ್ಲಿ ಹರದಾಡುತ್ತಿರುವ ಆ ಸುದ್ದಿಯಲ್ಲಿ ಯಾವುದೇ ಹುರುಳಿಲ್ಲ.

ಮೊಟ್ಟೆ ಜತೆ ಬಾಳೆಹಣ್ಣು ತಿಂದು ಮೃತಪಟ್ಟ ಸುದ್ದಿ ಇದುವರೆಗೆ ಎಲ್ಲಿಯೂ ವರದಿಯಾಗಿಲ್ಲ. ಎಷ್ಟೋ ಜನರು ಬೆಳಗ್ಗಿನ ಡಯಟ್‌ನಲ್ಲಿ ಮೊಟ್ಟೆ ಮತ್ತು ಬಾಳೆಹಣ್ಣು ಸೇರಿಸುತ್ತಾರೆ. ಅಲ್ಲದೆ ದಿನನಿತ್ಯ ನಾವು ತಿನ್ನುವ ಎಷ್ಟೋ ಆಹಾರಗಳಲ್ಲಿ ಮೊಟ್ಟೆ ಮತ್ತು ಬಾಳೆಹಣ್ಣಿನ ಅಂಶವಿರುತ್ತದೆ. ಉದಾಹರಣೆಗೆ ಬನಾನ ಪ್ಯಾನ್ ಕೇಕ್, ಬನಾನ ಕೇಕ್ ಇವುಗಳಲ್ಲಿ ಮೊಟ್ಟೆ ಹಾಗೂ ಬಾಳೆಹಣ್ಣು ಹಾಕಿ ಮಾಡಲಾಗುವುದು.