ಬಂಡೆ ಮಹಾಕಾಳಿ ದೇವಾಲಯ

ಬೆಂಗಳೂರಿನ ಗವಿಪುರಂ ಬಡಾವಣೆಯಲ್ಲಿರುವ ಪ್ರಾಚೀನ ದೇವಾಲಯಗಳಲ್ಲಿ ಬಂಡೆ ಮಹಾಕಾಳಿ ದೇವಾಲಯವೂ ಒಂದು. ಹುಟ್ಟು ಬಂಡೆಯೊಂದರಲ್ಲಿ ಕೆತ್ತಿರುವ ಸುಮಾರು ಮೂರಡಿ ಎತ್ತರದ ಮಹಾಕಾಳಿ ಶಿಲ್ಪವು ಪದ್ಮಪೀಠದ ಮೇಲೆ ಸಮಭಂಗಿಯಲ್ಲಿ ನಿಂತಿರುವ ಶಿಲ್ಪವಾಗಿದೆ. ಚತುರ್ಭುಜೆಯಾದ ಈ ದೇವಿಯ ಕೈಗಳಲ್ಲಿ ಅಭಯ, ಪರಶು, ಡಮರು ಮತ್ತು ವರದ ಮುದ್ರೆಗಳಿವೆ. ಇಲ್ಲಿ ಈ ಮೊದಲು ಕೇವಲ ಒಂದು ಅಂಕಣದ ಗುಡಿ ಇದ್ದು ಅದರ ಪಕ್ಕ ಪ್ರವಾಸಿಗರು ತಂಗಲು ಛತ್ರವೊಂದಿತ್ತು. ಜನರು ರಾತ್ರಿ ಊರಿಗೆ ಬಂದಾಗ ಬಂಡಿಗಳನ್ನು ಇಲ್ಲಿ ನಿಲ್ಲಿಸಿ ಛತ್ರದಲ್ಲಿ ತಂಗುತ್ತಿದ್ದುದರಿಂದ ಬಂಡಿ ಮಹಾಕಾಳಿ ಎಂಬ ಹೆಸರು ಈ ಗುಡಿಗೆ ಬಂತು. ಈಚೆಗೆ ಜೀರ್ಣೋದ್ಧಾರಗೊಂಡಿರುವ ಈ ದೇವಸ್ಥಾನಕ್ಕೆ ರಸ್ತೆಯಿಂದ ಗುಡಿವರೆಗೆ ಮೆಟ್ಟಿಲುಗಳನ್ನು ಮಾಡಿದ್ದು ಗರ್ಭಗೃಹದ ಮುಂದೆ ತೆರೆದ ಮುಖಮಂಟಪವನ್ನು ನಿರ್ಮಿಸಿದ್ದಾರೆ. ಇದರ ಹಿಂಭಾಗದಲ್ಲಿ ಮತ್ತೊಂದು ದೇವಿ ಮೂರ್ತಿಯನ್ನು ಸ್ಥಾಪಿಸಲಾಗಿದ್ದು, ಅಲ್ಲಿ ದೇವರಿಗೆ ಹರಕೆ, ಬಲಿ, ಎಡೆ ಇತ್ಯಾದಿಗಳು ನಡೆಯುತ್ತವೆ. ಗರ್ಭಗೃಹದ ಮೇಲೆ ಗಾರೆ ಶಿಖರವಿದೆ.