ಆಹಾರ ಸೇವನೆಯ ಅಭಿರುಚಿ ಒಬ್ಬರಿಂದ ಒಬ್ಬರಿಗೆ ಭಿನ್ನವಾಗಿರುತ್ತದೆ. ಕೆಲವರಿಗೆ ಬಿಸಿ ಆಹಾರ, ಇನ್ನು ಕೆಲವರಿಗೆ ತಣ್ಣನೆಯ ಆಹಾರ, ಕೆಲವರಿಗೆ ಖಾರ, ಇನ್ನು ಕೆಲವರಿಗೆ ಸಿಹಿ, ಹುಳಿ ಮುಂತಾದ ಆಹಾರಗಳು ಇಷ್ಟವಾಗುತ್ತವೆ. ನಾವು ಯಾವುದೇ ಆಹಾರ ಸೇವಿಸಿದರೂ ಅದು ನಮಗೆ ಇಷ್ಟವಾಗಬೇಕು ಜೊತೆಗೆ ಅವು ನಮ್ಮ ದೇಹಾರೋಗ್ಯಕ್ಕೂ ಹೊಂದಬೇಕು.
ಆಗಲೇ ಆ ಆಹಾರ ಪರಿಪೂರ್ಣವೆಂದೆನಿಸಿಕೊಳ್ಳುತ್ತದೆ. ಜನರಿಗೆ ತಮ್ಮ ಇಷ್ಟದ ಆಹಾರಗಳನ್ನು ಸೇವಿಸುವ ಹಕ್ಕು ಸಂಪೂರ್ಣ ಇದೆ. ಹಾಗಂತ ಸಿಕ್ಕಿದ್ದನ್ನೆಲ್ಲಾ ತಿಂದರೆ ಕಾಯಿಲೆ ಕಟ್ಟಿಟ್ಟ ಬುತ್ತಿ. ಹಾಗಂತ ಬಾಯಿಚಪಲವನ್ನು ತಡೆಯಲಾಗುವುದಿಲ್ಲ ಅಲ್ಲವೇ? ಆಗಾಗ ಏನಾದರೂ ಖಾರ ಖಾರವಾಗಿ, ಬಿಸಿ ತಿನಿಸುಗಳನ್ನು ತಿನ್ನಬೇಕು ಎಂದು ಅನಿಸುತ್ತದೆ. ಇಂಥವರಿಗಾಗಿಯೇ ಇದೆ ಬಿಸಿ ಮತ್ತು ಖಾರ ಆಹಾರ ದಿನ. ಈ ದಿನವನ್ನು ವಿಶ್ವದ ವಿವಿಧ ರಾಷ್ಟ್ರಗಳಲ್ಲಿ ಆಚರಿಸುತ್ತಾರೆ. ಪ್ರತಿವರ್ಷ ಜನವರಿ 16 ನೇ ತಾರೀಖನ್ನು ಇಂಟರ್‌ನ್ಯಾಷನಲ್‌ ಹಾಟ್‌ ಆ್ಯಂಡ್‌ ಸ್ಪೈಸಿ ಫುಡ್‌ ಡೇಯನ್ನಾಗಿ ಆಚರಿಸಲಾಗುತ್ತದೆ.
ಕೆಲವರು ದೇಶಗಳಲ್ಲಿ ಈ ದಿನದಂದು ಖಾರ ಮತ್ತು ಬಿಸಿ ಆಹಾರ ಪದಾರ್ಥಗಳ ಸೇವನೆಯ ಸ್ಪರ್ಧೆಗಳನ್ನು ಏರ್ಪಡಿಸುತ್ತಾರೆ. ಹಲವಾರು ಜನರು ಇದರಲ್ಲಿ ಪಾಲ್ಗೊಳ್ಳುತ್ತಾರೆ. ಕೆಲವೆಡೆ ಕುಟುಂಬ ಸದಸ್ಯರೆಲ್ಲಾ ಸೇರಿ ಒಟ್ಟಿಗೆ ಕುಳಿತುಕೊಂಡು ಬಿಸಿಯಾದ ಮತ್ತು ಖಾರ ಆಹಾರಗಳನ್ನು ಮಾಡಿ ತಿನ್ನುತ್ತಾರೆ. ಬಿಸಿ ಮತ್ತು ಖಾರ ಆಹಾರ ಸೇವನೆಯಿಂದ ದೇಹ ಬೆಚ್ಚಗೆ ಮತ್ತು ಆರೋಗ್ಯವಾಗಿರುತ್ತದೆ.