ಈಗಿನ ತಂತ್ರಜ್ಞಾನದ ಯುಗದಲ್ಲಿ ಎಲ್ಲಾ ಕೆಲಸ ಕಾರ್ಯಗಳು ಯಂತ್ರದಿಂದಲೇ ನಡೆಯುತ್ತದೆ. ಮನುಷ್ಯರು ಕೂಡಾ ತಮ್ಮೆಲ್ಲಾ ಕೆಲಸಗಳಿಗೂ ಬಹುತೇಕವಾಗಿ ವಿವಿಧ ಯಂತ್ರಗಳನ್ನೇ ಅವಲಂಬಿಸಿದ್ದಾರೆ.
ವಿವಿಧ ಯಂತ್ರಗಳು, ಗ್ಯಾಜೆಟ್‌ಗಳು ಜನರ ಉಪಯುಕ್ತ ಆ್ಯಕ್ಸೆಸರಿಗಳಾಗಿವೆ. ಈ ಯಂತ್ರಗಳು ನಡೆಯುವುದೇ ವಿದ್ಯುತ್‌ನಿಂದ. ಅದಕ್ಕಾಗಿ ಕೆಲವರು ಬ್ಯಾಟರಿಚಾಲಿತ ವಿದ್ಯುತ್ತನ್ನು ಬಳಸುತ್ತಾರೆ. ಈ ಬ್ಯಾಟರಿ ಎಂಬ ವಸ್ತು ಎಷ್ಟೊಂದು ಜನಪ್ರಿಯವಾಗಿದೆಯೆಂದರೆ ಇದನ್ನು ಬಳಸದ ಜನರೇ ಇಲ್ಲ ಎನಬಹುದು. ಬ್ಯಾಟರಿ ನಮ್ಮ ಜಗತ್ತಿನ ಬಹುದೊಡ್ಡ ಅನ್ವೇಷಣೆಯಾಗಿದೆ. ನಮ್ಮ ಮನೆಗೆಲಸದ ವಸ್ತುಗಳಿಂದ ಹಿಡಿದು ಆಫೀಸ್‌, ಕಾರು ಇತ್ಯಾದಿ ಕಡೆಯ ವಸ್ತುಗಳೆಲ್ಲಾ ಬ್ಯಾಟರಿಗಳಿಂದಲೇ ನಡೆಯುತ್ತವೆ. ಅದು ಟೀವಿಯ ರಿಮೋಟ್‌ ಕಂಟ್ರೋಲ್‌ ಆಗಿರಲಿ ಅಥವಾ ಕಾರು ಆಗಿರಲಿ ಎಲ್ಲವೂ ಹೆಚ್ಚಾಗಿ ಬ್ಯಾಟರಿಯಿಂದಲೇ ನಡೆಯುತ್ತವೆ. ಬ್ಯಾಟರಿ ತುಂಬಾ ಅತ್ಯುಪಯುಕ್ತ ವಸ್ತುವಾಗಿದೆ. ಇದರ ಜನಪ್ರಿಯತೆ ಎಷ್ಟಿದೆಯೆಂದರೆ ಇದಕ್ಕಾಗಿಯೂ ಒಂದು ವಿಶೇಷ ದಿನವಿದೆ. ಅದುವೇ ಫೆಬ್ರವರಿ 18. ಈ ದಿನವನ್ನು ಅಮೆರಿಕ ಸೇರಿದಂತೆ ವಿವಿಧ ದೇಶಗಳು ಬ್ಯಾಟರಿ ಡೇಯನ್ನಾಗಿ ಆಚರಿಸುತ್ತವೆ.
ಬ್ಯಾಟರಿಯಲ್ಲಿ ವಿವಿಧ ರಾಸಾಯನಿಕ ವಸ್ತುಗಳನ್ನು ಒಂದು ನಿರ್ದಿಷ್ಟ ಸರಣಿಯಲ್ಲಿ ಇಡಲಾಗುತ್ತದೆ. ಅದು ರಾಸಾಯನಿಕ ಪ್ರಕ್ರಿಯೆಗಳಿಗೆ ಒಳಪಟ್ಟು ರಾಸಾಯನಿಕ ಶಕ್ತಿಯು ವಿದ್ಯುತ್ತಾಗಿ ಪರಿವರ್ತನೆಯಾಗುತ್ತದೆ. ಈ ಬ್ಯಾಟರಿಯ ವೈಯಕ್ತಿಕ ಬಳಕೆ ಜನಪ್ರಿಯವಾಗಿದ್ದು ಸುಮಾರು 60 ವರ್ಷಗಳ ಹಿಂದೆ. ಪ್ರಾಚೀನ ಕಾಲದಲ್ಲೂ ಚಿನ್ನ, ಬೆಳ್ಳಿಯಿಂದ ತಯಾರಿಸಿದ್ದ ಎಲೆಕ್ಟ್ರೊಪ್ಲೇಟ್‌ವೊಂದು ಬಳಕೆಯಲ್ಲಿತ್ತು. ಅದು ಬಹುಶಃ ಬ್ಯಾಟರಿ ಆಗಿರಬಹುದು ಎಂದು ಪುರಾತನ ಶಾಸ್ತ್ರಜ್ಞರು ತಿಳಿಸಿದ್ದಾರೆ. ಆದರೆ ಈ ಬ್ಯಾಟರಿ ಎಂಬ ಶಬ್ದವನ್ನು ಮೊದಲ ಬಾರಿಗೆ ಬಳಕೆಗೆ ತಂದವರು ಬೆಂಜಮಿನ್‌ ಫ್ರಾಂಕ್ಲಿನ್‌. 1748 ರಲ್ಲಿ ಇವರು ವಿದ್ಯುತ್‌ ಹಾಯುವ ಗ್ಲಾಸ್‌ ಪ್ಲೋಟೊಂದನ್ನು ಕಂಡು ಹಿಡಿದಿದ್ದರು. ಬಳಿಕ 1800 ರಲ್ಲಿ ಫ್ರೆಂಚ್‌ ವಿಜ್ಞಾನಿ ಅಲೆಸ್ಸಾಂಡ್ರೊ ವೋಲ್ಟಾ ಅವರು ಆಧುನಿಕ ಯುಗದ ಬ್ಯಾಟರಿಗೆ ನಾಂದಿ ಹಾಡಿದರು. ಆದರೆ ಬ್ಯಾಟರಿಯನ್ನು ಮೊದಲ ಬಾರಿಗೆ ವಿನ್ಯಾಸಗೊಳ್ಶಿದ್ದು ಇಂಗ್ಲಿಷ್‌ ರಾಸಾಯನಿಕ ತಜ್ಞ ವಿಲಿಯಂ ಕ್ರುಕ್‌ಶಾಂಕ್‌ ಅವರು.