ಡೇ special: ಫ್ರೆಂಚ್‌ ಟೋಸ್ಟ್‌ ಡೇ

ಭಾರತೀಯರ ಆಹಾರ ಸಂಸ್ಕೃತಿಯಲ್ಲಿ ಈಗ ವಿದೇಶಿ ಆಹಾರಗಳೂ ಬೆರೆತುಕೊಂಡಿವೆ. ಅದು ಕೇಕ್‌ ಆಗಿರಲಿ, ಸ್ಯಾಂಡ್‌ವಿಚ್‌, ಫ್ರೆಂಚ್‌ ಫ್ರೈ, ನೂಡಲ್ಸ್‌, ಮಂಚೂರಿ, ಟೋಸ್ಟ್‌ ಆಗಿರಲಿ, ಇವೆಲ್ಲವೂ ನಮ್ಮದೇ ದೇಶದ ಆಹಾರವೇನೊ ಎಂಬ ರೀತಿಯಲ್ಲಿ ನಮ್ಮ ಆಹಾರದಲ್ಲಿ ಸೇರಿಕೊಂಡಿವೆ.

ಜನರು ನಮ್ಮ ಆಹಾರದ ಜೊತೆಗೆ ಈ ವಿದೇಶಿ ಆಹಾರದ ರುಚಿ ಸವಿಯಲು ಇಷ್ಟಪಡುತ್ತಾರೆ. ಟೇಸ್ಟ್‌ ಸ್ವಲ್ಪ ಭಿನ್ನವಾಗಿರುತ್ತದೆ ಎಂಬ ಕಾರಣಕ್ಕೆ ವಿದೇಶಿ ಆಹಾರ ಭಾರತೀಯರಿಗೂ ಅಚ್ಚುಮೆಚ್ಚು. ಅದರಲ್ಲೂ ಈಗಿನ ಯುವಪೀಳಿಗೆಯಂತೂ ವಿದೇಶಿ ಆಹಾರಗಳನ್ನೇ ಹೆಚ್ಚು ನೆಚ್ಚಿಕೊಂಡಿದೆ. ಬ್ರೇಕ್‌ಫಾಸ್ಟ್‌, ಲಂಚ್‌, ಡಿನ್ನರ್‌ ಹೀಗೆ ಎಲ್ಲದ್ದಕ್ಕೂ ಅವರು ವಿದೇಶಿ ಆಹಾರಗಳನ್ನೇ ಬಯಸುವ ಟ್ರೆಂಡ್‌ ಹೆಚ್ಚಾಗಿದೆ. ಈ ವಿದೇಶಿ ಆಹಾರದಲ್ಲಿ ಫ್ರೆಂಚ್‌ ಟೋಸ್ಟ್‌ ತುಂಬಾ ಜನಪ್ರಿಯವಾಗಿದೆ. ಇದರ ಜನಪ್ರಿಯತೆ ಎಷ್ಟಿದೆಯೆಂದರೆ ಇದರ ಆಚರಣೆಗೂ ಒಂದು ದಿನವಿದೆ. ಅದುವೇ ನವೆಂಬರ್‌ 28. ಈ ದಿನವನ್ನು ಅಮೆರಿಕಾದಲ್ಲಿ ಫ್ರೆಂಚ್‌ ಟೋಸ್ಟ್‌ ಡೇ ಎಂದು ಆಚರಿಸುತ್ತಾರೆ. ಈ ಆಚರಣೆ ಈಗ ವಿಶ್ವದ ಇತರ ರಾಷ್ಟ್ರಗಳಿಗೂ ವಿಸ್ತರಿಸಿದೆ.

ಎಗ್‌ ಬ್ರೆಡ್‌, ಆಮ್ಲೆಟ್‌ ಬ್ರೆಡ್‌ ಅಥವಾ ಜಿಪ್ಸಿ ಟೋಸ್ಟ್‌ಗಳನ್ನು ಸಾಮಾನ್ಯವಾಗಿ ಫ್ರೆಂಚ್‌ ಟೋಸ್ಟ್‌ ಎಂದು ಹೇಳುತ್ತಾರೆ. ಇದು ಅಮೆರಿಕನ್ನರ ಒಂದು ಸಾಂಪ್ರದಾಯಿಕ ತಿನಿಸು. ಇದನ್ನು ಮಾಡುವ ಪ್ರಕ್ರಿಯೆ ಕೂಡಾ ತುಂಬಾ ಸಾಂಪ್ರದಾಯಿಕವಾದದ್ದು. ಯುವಜನತೆಗೆ ವಿಶೇಷವಾಗಿ ಮಕ್ಕಳಿಗೆ ತುಂಬಾ ಇಷ್ಟವಾಗುವ ತಿಂಡಿಯಿದು. ಮಾಮೂಲು ಸ್ಯಾಂಡ್‌ವಿಚ್‌ ಅಥವಾ ಟೋಸ್ಟ್‌ ಮಾಡುವುದಕ್ಕಿಂತ ಅದನ್ನು ಫ್ರೆಂಚ್‌ ಟೋಸ್ಟ್‌ ಮಾಡಿದರೆ ರುಚಿ ತುಂಬಾ ಚೆನ್ನಾಗಿರುತ್ತದೆ. ಮಧ್ಯಾಹ್ನದ ಲಂಚ್‌ಗೆ, ಸ್ಕೂಲ್‌ ಮಕ್ಕಳ ಲಂಚ್‌ ಬಾಕ್ಸ್‌ಗೆ ಇದನ್ನು ರೆಡಿ ಮಾಡಿ ಕೊಡಬಹುದು. ಇದು ನಮ್ಮ ಬೆಳಗ್ಗಿನ ಸಮಯವನ್ನು ಆಹ್ಲಾದಕರವನ್ನಾಗಿಸುವ ತಿಂಡಿಯೂ ಹೌದು. ಇದನ್ನು ಮೊಟ್ಟೆ, ಹಾಲು ಮತ್ತು ಚಕ್ಕೆಯನ್ನು ಬೆರೆಸಿ ಮಾಡಿರುತ್ತಾರೆ. ಈ ಟೋಸ್ಟನ್ನು ಸಕ್ಕರೆ ಮತ್ತು ಹಣ್ಣುಗಳೊಂದಿಗೆ ಸರ್ವ್‌ ಮಾಡುತ್ತಾರೆ. ಈ ತಿಂಡಿಯಲ್ಲಿ ಫ್ರೆಂಚ್‌ ಎಂಬ ಹೆಸರಿದ್ದರೂ ಇದು ಫ್ರಾನ್ಸ್‌ ದೇಶದ ತಿನಿಸಲ್ಲ. ಇದು ಮೂಲತಃ ಲ್ಯಾಟಿನ್‌ ಅಮೆರಿಕದ ಪ್ರಾಚೀನ ತಿನಿಸು.