ರಿಸೆಪ್ಷನಿಸ್ಟ್‌ ಡೇ
ಒಂದು ಕಂಪೆನಿ ಅಥವಾ ಸಂಸ್ಥೆಯ ಅಭಿವೃದ್ಧಿಯಲ್ಲಿ ಅಲ್ಲಿರುವ ರಿಸೆಪ್ಷನಿಸ್ಟ್‌ಗಳ ಪಾತ್ರವೂ ಬಹು ದೊಡ್ಡದು. ಇವರು ಕಂಪೆನಿಯ ವ್ಯವಹಾರದಲ್ಲಿ ನೇರವಾಗಿ ಪಾಲ್ಗೊಳ್ಳದಿದ್ದರೂ ಆ ಕಂಪೆನಿಗೆ ಹೆಚ್ಚು ಹೆಚ್ಚು ಪ್ರಾಜೆಕ್ಟ್ಗಳು ಬರುವಂತೆ ಮಾಡುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ.
ಬಾಸ್‌ ಮತ್ತು ಅವರ ಕೆಳಗಿನ ಅಧಿಕಾರಿಗಳ ಅಪಾಯಿಂಟ್‌ಮೆಂಟ್‌ ಕೊಡಿಸುವುದು, ಬಾಸ್‌ಗೆ ಬೇರೆ ಕಂಪೆನಿಯ ಅಧಿಕಾರಿಗಳ ಅಪಾಯಿಂಟ್‌ಮೆಂಟ್‌ ಕೊಡಿಸುವುದು, ಅಪಾಯಿಂಟ್‌ಮೆಂಟ್‌ ಇರುವ ವೇಳೆಯನ್ನು ಜ್ಞಾಪಿಸುವುದು, ಮೀಟಿಂಗ್‌ಗಳನ್ನು ಫಿಕ್ಸ್‌ ಮಾಡುವುದು, ರೆಫರೆನ್ಸ್‌ ಕೊಡಿಸುವುದು ಇತ್ಯಾದಿ ಕೆಲಸಗಳನ್ನು ಇವರು ಮಾಡುತ್ತಾರೆ. ಒಂದು ಕಂಪೆನಿಯ ಒಳಗೆ ಹೋಗಬೇಕೆಂದರೆ ಅಲ್ಲಿರುವ ರಿಸೆಪ್ಷನಿಸ್ಟ್‌ನ ಅನುಮತಿ ಪಡೆದೇ ಹೋಗಬೇಕು.
ರಿಸೆಪ್ಷನಿಸ್ಟ್‌ ಆ ಕಂಪೆನಿಯ ದೈನಂದಿನ ವ್ಯವಹಾರಗಳನ್ನು ಸುಗಮಗೊಳಿಸುತ್ತಾರೆ. ಕೆಲವೊಮ್ಮೆ ನಗು ಮುಖದ, ಚುರುಕು ವ್ಯಕ್ತಿತ್ವದ ರಿಸೆಪ್ಷನಿಸ್ಟ್‌ಗಳಿಂದಲೇ ಆ ಕಂಪೆನಿಗೆ ದೊಡ್ಡ ಪ್ರಾಜೆಕ್ಟ್ ಸಿಗುವ ಸಾಧ್ಯತೆಗಳಿರುತ್ತವೆ. ಅಥವಾ ಕೆಲವೊಮ್ಮೆ ರಿಸೆಪ್ಷನಿಸ್ಟ್‌ಗಳ ಮಂದಗತಿ ಹಾಗೂ ಸೂಕ್ತ ಸಂವಹನದ ಕೊರತೆಯಿಂದ ದೊಡ್ಡ ಪ್ರಾಜೆಕ್ಟ್ಗಳು ಕೈ ತಪ್ಪಿ ಹೋಗಿರುವ ಸಾಧ್ಯತೆಗಳೂ ಇವೆ. ಆದ್ದರಿಂದ ಪ್ರತಿಯೊಂದು ಕಂಪೆನಿಗಳು ತಮ್ಮ ಸಂಸ್ಥೆಗಳಲ್ಲಿ ಉತ್ತಮ ಮತ್ತು ದಕ್ಷ ರಿಸೆಪ್ಷನಿಸ್ಟ್‌ಗಳು ಇರುವಂತೆ ನೋಡಿಕೊಳ್ಳುತ್ತಾರೆ.
ಆದರೆ ಬಹುತೇಕ ಸಂದರ್ಭಗಳಲ್ಲಿ ರಿಸೆಪ್ಷನಿಸ್ಟ್‌ಗಳನ್ನು ಹೀಯಾಳಿಸುವ ಅಥವಾ ಅವರನ್ನು ಹಾಸ್ಯ ಮಾಡುವ, ಅವರ ಹುದ್ದೆಯನ್ನು ಸಂಶಯಾತ್ಮಕವಾಗಿ ನೋಡುವ ಜನರೇ ನಮ್ಮಲ್ಲಿ ಹೆಚ್ಚಿದ್ದಾರೆ. ಅಲ್ಲದೆ ಬಹುತೇಕ ಸಂಸ್ಥೆಗಳಲ್ಲಿ ರಿಸೆಪ್ಷನಿಸ್ಟ್‌ಗಳ ಹುದ್ದೆಗೆ ಮತ್ತು ಅವರು ಮಾಡುವ ಕೆಲಸಗಳಿಗೆ ತಕ್ಕಂತೆ ವೇತನವೂ ಸಿಗುವುದಿಲ್ಲ. ಕೆಲವೆಡೆ ರಿಸೆಪ್ಷನಿಸ್ಟ್‌ಗಳಿಗೆ ಬೇಕಾದ ಜ್ಞಾನ, ಕೌಶಲ್ಯಗಳನ್ನು ನೀಡುವ ತರಬೇತಿ ಸಂಸ್ಥೆಗಳ ಕೊರತೆ ಇರುತ್ತದೆ. ಇದನ್ನೆಲ್ಲಾ ನಿವಾರಣೆ ಮಾಡಲು ಮತ್ತು ಅವರಿಗೆ ಸೂಕ್ತ ಗೌರವವನ್ನು ನೀಡಲು ಅವರಿಗಾಗಿಯೇ ಒಂದು ವಿಶೇಷ ದಿನವನ್ನು ನಿಗದಿ ಮಾಡಲಾಗಿದೆ. ಆ ದಿನವೇ ಮೇ 10. ಈ ದಿನವನ್ನು ಅಮೆರಿಕ ಸೇರಿದಂತೆ ವಿವಿಧ ದೇಶಗಳು ರಿಸೆಪ್ಷನಿಸ್ಟ್‌ ಡೇ ಎಂದು ಆಚರಿಸುತ್ತವೆ.