ನಿರುದ್ಯೋಗ ದರ ಶೇ.7.2ಕ್ಕೆ ಏರಿಕೆ

ಹೊಸದಿಲ್ಲಿ: ದೇಶದಲ್ಲಿ ಕಳೆದ ಫೆಬ್ರವರಿ ತಿಂಗಳಿನಲ್ಲಿ ನಿರುದ್ಯೋಗ ದರ ಶೇ.7.2ಕ್ಕೆ ಏರಿಕೆಯಾಗಿದೆ. ಇದರೊಂದಿಗೆ ಕಳೆದ 28 ತಿಂಗಳಿನಲ್ಲಿ ನಿರುದ್ಯೋಗ ದರ ಗರಿಷ್ಠ ಮಟ್ಟಕ್ಕೇರಿದೆ.

2019ರ ಜನವರಿಯಲ್ಲಿ ಶೇ.7.1 ಹಾಗೂ 2018ರ ಫೆಬ್ರವರಿಯಲ್ಲಿ ಶೇ.5.9ರಷ್ಟಿದ್ದ ನಿರುದ್ಯೋಗ ದರ ಮತ್ತಷ್ಟು ವೃದ್ಧಿಸಿದೆ ಎಂದು ಸೆಂಟರ್‌ ಫಾರ್‌ ಮಾನಿಟರಿಂಗ್‌ ಇಂಡಿಯನ್‌ ಎಕಾನಮಿ (ಸಿಎಂಐಇ) ತಿಳಿಸಿದೆ. ಲೋಕಸಭೆ ಚುನಾವಣೆ ಸಮೀಪಿಸುತ್ತಿರುವಾಗ ನಿರುದ್ಯೋಗ ದರ ಕುರಿತ ನಕಾರಾತ್ಮಕ ಬೆಳವಣಿಗೆ ಪ್ರಧಾನಿ ಮೋದಿ ನೇತೃತ್ವದ ಎನ್‌ಡಿಎ ಸರಕಾರಕ್ಕೆ ಕಳವಳಕಾರಿ ಸಂಗತಿಯಾಗಿದೆ.

2017ರ ಫೆಬ್ರವರಿಯಲ್ಲಿ ನಿರುದ್ಯೋಗ ದರ ಶೇ.5ರ ಮಟ್ಟದಲ್ಲಿತ್ತು. 2019ರ ಫೆಬ್ರವರಿ ವೇಳೆಗೆ ಒಟ್ಟು ಅಂದಾಜು 40 ಕೋಟಿ ಮಂದಿ ಉದ್ಯೋಗಸ್ಥರಿದ್ದರೆ, 2018ರ ಫೆಬ್ರವರಿಯಲ್ಲಿ 40.6 ಕೋಟಿ ಹಾಗೂ 2017ರ ಫೆಬ್ರವರಿಯಲ್ಲಿ 40.7 ಕೋಟಿ ಉದ್ಯೋಗಸ್ಥರಿದ್ದರು. ಲೇಬರ್‌ ಪಾರ್ಟಿಸಿಪೇಶನ್‌ ದರ (ಈಗಾಗಲೇ ಉದ್ಯೋಗದಲ್ಲಿರುವ ವರ್ಗ) 2019ರ ಫೆಬ್ರವರಿಯಲ್ಲಿ ಶೇ.43.2ರಿಂದ ಶೇ.42.7ಕ್ಕೆ ಇಳಿದಿದೆ. ಮತ್ತೊಂದು ಕಡೆ ನಿರುದ್ಯೋಗ ದರ ಹೆಚ್ಚುತ್ತಿದೆ ಎಂದು ವರದಿ ತಿಳಿಸಿದೆ.

ದೇಶದಲ್ಲಿ ಪ್ರತಿ ವರ್ಷ ಅಂದಾಜು 2.3 ಕೋಟಿ ಮಂದಿ ಹೊಸ ಉದ್ಯೋಗಾಕಾಂಕ್ಷಿಗಳ ಸಂಖ್ಯೆ ಸೇರ್ಪಡೆಯಾಗುತ್ತಿದೆ. ನಿರುದ್ಯೋಗ ದರ ಗಂಭೀರ ಸ್ವರೂಪಕ್ಕೆ ತಿರುಗದಿದ್ದರೂ, ರಾಜಕೀಯವಾಗಿ ಒತ್ತಡ ಸೃಷ್ಟಿಸುವ ಸಾಧ್ಯತೆ ಇದೆ ಎಂದು ತಿಳಿಸಿದೆ.