ಉದ್ಯೋಗದಲ್ಲಿ ಅಭದ್ರತೆ ಧೈರ್ಯಗೆಡದಿರಿ

ಆರ್ಥಿಕ ಏರಿಳಿತದಿಂದಾಗಿ ಉದ್ಯೋಗ ಕಳೆದುಕೊಳ್ಳುವ ಭೀತಿ ಎದುರಿಸುತ್ತಿರುವವರು ಹಲವು ಮಂದಿ. ತಂತ್ರಜ್ಞಾನ ಮತ್ತು ಎಲ್ಲವೂ ಯಾಂತ್ರೀಕರಣಗೊಂಡಿರುವುದರಿಂದ ಉದ್ಯೋಗಾವಕಾಶಗಳು ಕಡಿಮೆಯಾಗುತ್ತಿವೆ. ಇದರಿಂದಾಗಿ ಕೆಲವರು ಕೆಲಸ ಕಳೆದುಕೊಳ್ಳುವ ಭೀತಿ ಎದುರಿಸುತ್ತಲೇ ದಿನ ದೂಡುತ್ತಿರುತ್ತಾರೆ. ಉದ್ಯೋಗ ಕಳೆದುಕೊಂಡಾಗ ಆರ್ಥಿಕ ಸ್ಥಿರತೆ ಮತ್ತು ಆತ್ಮವಿಶ್ವಾಸ ಕಡಿಮೆಯಾಗದಂತೆ ನೋಡಿಕೊಳ್ಳಬೇಕು.

- ಪರ್ಯಾಯ ಉದ್ಯೋಗಾವಕಾಶವನ್ನು ಹುಡುಕಿಕೊಳ್ಳಲು ನಿಮ್ಮಲ್ಲಿರುವ ಕೌಶಲವನ್ನು ಅವಲೋಕನ ಮಾಡಿಕೊಳ್ಳಿ. ನಿಮ್ಮ ಅರ್ಹತೆಗೆ ಯಾವ ಉದ್ಯೋಗ ಸೂಕ್ತ ಎಂಬುದನ್ನು ನೀವೇ ನಿರ್ಧರಿಸಿಕೊಳ್ಳಿ.

- ಹೊಸ ಉದ್ಯೋಗವನ್ನು ಹುಡುಕುವಿರಾದರೆ ಸುತ್ತಲೂ ಉದ್ಯೋಗ ಇದ್ಯಾ ಎಂದು ಕೇಳಲು ಹಿಂಜರಿಯದಿರಿ. ಹೆಚ್ಚಿನ ಉದ್ಯೋಗಾವಕಾಶಗಳು ಜನರ ಸಂಪರ್ಕದಿಂದಲೇ ತಿಳಿಯುತ್ತವೆ.

- ಉದ್ಯೋಗ ತಾಣಗಳಿಗೆ ಭೇಟಿ ನೀಡಿ. ಉದ್ಯೋಗ ಮಾಹಿತಿ ನೀಡುವ ವೆಬ್‌ಸೈಟ್‌ಗಳಿಂದ ಮಾಹಿತಿ ಕಲೆ ಹಾಕಬಹುದು. ಹೊಸ ಉದ್ಯೋಗಕ್ಕೆ ಪೂರಕ ತರಬೇತಿ ಬೇಕೆನಿಸಿದರೆ ತರಬೇತಿ ಪಡೆದುಕೊಳ್ಳಲು ಹಿಂದೇಟು ಹಾಕದಿರಿ.

- ಕೆಲಸ ಕಳೆದುಕೊಂಡಾಗ ಆರ್ಥಿಕ ಸ್ಥಿರತೆ ಕಾಪಾಡಿಕೊಳ್ಳಲು ಕೆಲಸದ ಆರಂಭದಿಂದಲೇ ಹಣ ಉಳಿತಾಯ ಮಾಡುವುದನ್ನು ರೂಢಿಸಿಕೊಳ್ಳಿ.