ಇವೈ ಕಂಪನಿಯಲ್ಲಿದೆ 2000 ಮಂದಿಗೆ ಉದ್ಯೋಗ

ಹೊಸದಿಲ್ಲಿ: ಜಾಗತಿಕ ವೃತ್ತಿಪರ ಸೇವಾ ಕಂಪನಿಯಾದ ಇವೈ, ಮುಂದಿನ ಮೂರು ವರ್ಷಗಳಲ್ಲಿ ಭಾರತದಲ್ಲಿ 2,000 ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳಲಿದೆ. ಗ್ರಾಹಕರ ಡಿಜಿಟಲ್‌ ಸಮಸ್ಯೆಗಳಿಗೆ ಪರಿಹಾರ ಒದಗಿಸುವ ನಿಟ್ಟಿನಲ್ಲಿ ತನ್ನ ಉದ್ಯಮವನ್ನು ಇವೈ ಭಾರತದಲ್ಲಿ ವಿಸ್ತರಿಸುತ್ತಿದ್ದು, ಹೊಸ ನೇಮಕಗಳಿಗೆ ಮುಂದಾಗಿದೆ.

ಕೃತಕ ಬುದ್ಧಿಮತ್ತೆ(ಎಐ), ಅನಾಲಿಟಿಕ್ಸ್‌, ಇಂಟಲಿಜೆಂಟ್‌ ಅಟೋಮೇಷನ್‌, ಬ್ಲಾಕ್‌ಚೈನ್‌ ಮತ್ತು ತೆರಿಗೆ ತಂತ್ರಜ್ಞಾನದಂಥ ಹೊಸ ತಲೆಮಾರಿನ ವಲಯಗಳಲ್ಲಿನ ಪ್ರತಿಭಾವಂತರನ್ನು ಹೆಚ್ಚಿನದಾಗಿ ಇವೈ ಬಳಸಿಕೊಳ್ಳಲಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.

ಹೊಸ ಸ್ಟಾರ್ಟಪ್‌ಗಳಿಗೆ ಹೆಚ್ಚಿನ ಬಂಡವಾಳ ಹರಿದು ಬರಲಿದೆ. ಭಾರತದ ಬೃಹತ್‌ ಕಂಪನಿಗಳು ಡಿಜಿಟಲ್‌ ವಲಯದಲ್ಲಿ ಹೂಡಿಕೆ ಮಾಡಲಿವೆ, ಎಂದು ಇವೈನ ಭಾರತೀಯ ಸಲಹಾ ಸೇವೆಗಳ ವಿಭಾಗದ ಮುಖ್ಯಸ್ಥ ರಾಮ್‌ ಸರ್ವೆಪಲ್ಲಿ ಹೇಳಿದ್ದಾರೆ. ನಾಗರಿಕ ಸೇವೆಗಳಿಗಾಗಿ ಡಿಜಿಟಲ್‌ ವಲಯಕ್ಕೆ ಸರಕಾರವು ಹೆಚ್ಚಿನ ಹೂಡಿಕೆ ಮಾಡಲಿದೆ. ಬಹುತೇಕ ಸಾಂಪ್ರದಾಯಿಕ ಗ್ರಾಹಕ ಸೇವಾ ವ್ಯವಹಾರಗಳು ಡಿಜಿಟಲೀಕರಣಗೊಳ್ಳಲಿವೆ. ಎರಡು ಮತ್ತು ಮೂರನೇ ಶ್ರೇಣಿ ನಗರಗಳಲ್ಲೂ ಈ ಬೆಳವಣಿಗೆ ಹೆಚ್ಚಲಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದು, ಭಾರತದ ಡಿಜಿಟಲ್‌ ವಲಯದ ಬೆಳವಣಿಗೆ ಬಗೆಗೆ ಮುನ್ನೋಟ ನೀಡಿದ್ದಾರೆ.