ಕರ್ನಾಟಕ ಹೈಕೋರ್ಟ್‌ನಲ್ಲಿದೆ 29 ಹುದ್ದೆಗಳು

ಕರ್ನಾಟಕ ಹೈಕೋರ್ಟ್‌ನಲ್ಲಿ ಖಾಲಿ ಇರುವ ವಿವಿಧ ‘ಲಾ ಕ್ಲರ್ಕ್ಸ್‌-ಕಂ- ರಿಸರ್ಚ್ ಅಸಿಸ್ಟೆಂಟ್‌’ ಹುದ್ದೆಗಳನ್ನು ಭರ್ತಿ ಮಾಡಿಕೊಳ್ಳಲು ನಿರ್ಧರಿಸಲಾಗಿದ್ದು, ಕಾನೂನು ಪದವೀಧರರಿಂದ ಅರ್ಜಿ ಆಹ್ವಾನಿಸಲಾಗಿದೆ. ಈ ಹುದ್ದೆಗಳು ತಾತ್ಕಾಲಿಕ ಅವಧಿಯದ್ದಾಗಿದ್ದು (ಜನವರಿ 31, 2017ರವರೆಗೆ) ವಿಸ್ತರಣೆಗೊಳ್ಳುವ ಸಾಧ್ಯತೆಯಿದೆ.

ಶೈಕ್ಷಣಿಕ ಅರ್ಹತೆ: ಕಾನೂನು ಪದವಿಯಲ್ಲಿ ಶೇಕಡ 50ಕ್ಕಿಂತ ಕಡಿಮೆ ಇಲ್ಲದಂತೆ ಅಂಕ ಪಡೆದು, ಕರ್ನಾಟಕ ರಾಜ್ಯ ಬಾರ್‌ ಕೌನ್ಸಿಲ್‌ನಿಂದ ಅಡ್ವೋಕೇಟ್‌ ಆಗಿ ಎನ್‌ರೋಲ್‌ಮೆಂಟ್‌ ಪಡೆದವರು ಅರ್ಜಿ ಸಲ್ಲಿಸಿರಬಹುದು. ಅಭ್ಯರ್ಥಿಯ ವಯಸ್ಸು 30 ವರ್ಷ ದಾಟಿರಬಾರದು.

ಆಯ್ಕೆ ಪ್ರಕ್ರಿಯೆ: ಅಭ್ಯರ್ಥಿಯ ಶೈಕ್ಷಣಿಕ ಸಾಧನೆ, ಸಂದರ್ಶನದಲ್ಲಿ ಕಾರ್ಯನಿರ್ವಹಣೆ ಇತ್ಯಾದಿಗಳನ್ನು ಮಾನದಂಡವಾಗಿಟ್ಟುಕೊಂಡು ಆಯ್ಕೆ ಮಾಡಲಾಗುತ್ತದೆ. ಆಸಕ್ತರು ನಿಗದಿತ ನಮೂನೆಯನ್ನು ಕರ್ನಾಟಕ ಹೈಕೋರ್ಟ್‌ನ ವೆಬ್‌ಸೈಟ್‌ನಿಂದ ಡೌನ್‌ಲೋಡ್‌ ಮಾಡಿಕೊಂಡು ಸೂಕ್ತ ದಾಖಲೆ ಪತ್ರಗಳೊಂದಿಗೆ ಅರ್ಜಿ ಸಲ್ಲಿಸಬಹುದು. ಅಭ್ಯರ್ಥಿಗೆ ತಿಂಗಳಿಗೆ 15 ಸಾವಿರ ರೂ. ವೇತನ ನಿಗದಿಪಡಿಸಲಾಗಿದೆ.

ಈ ಹುದ್ದೆಗೆ ಆಯ್ಕೆಯಾದವರು ನ್ಯಾಯಾಧೀಶರ ಜೊತೆ ನ್ಯಾಯಾಂಗದ ಕೆಲಸ ಕಾರ್ಯಗಳನ್ನು ಮಾತ್ರವಲ್ಲದೇ ಅಡ್ಮಿನಿಸ್ಪ್ರೇಟಿವ್‌ ಕೆಲಸಗಳನ್ನು ಮಾಡಬೇಕಾಗುತ್ತದೆ. ಅಂದರೆ ಅಪರಾಧ ಪ್ರಕರಣಗಳಿಗೆ ಸಂಬಂಧಪಟ್ಟ ಫೈಲ್‌ಗಳ ಅಧ್ಯಯನ, ಸಾರಾಂಶ ಬರೆಯುವುದು, ಕೇಸ್‌ ಫೈಲ್‌ನಲ್ಲಿ ಪ್ರಶ್ನಾರ್ಹ ಅಂಶಗಳನ್ನು ಉಲ್ಲೇಖಿಸುವುದು ಮಾತ್ರವಲ್ಲದೇ ನ್ಯಾಯಾಧೀಶರ ಭಾಷಣ, ಅಕಾಡೆಮಿಕ್‌ ಪೇಪರ್‌ಗಳನ್ನು ಸಿದ್ಧಪಡಿಸುವ ಕಾರ್ಯವನ್ನೂ ಈ ಹುದ್ದೆಯಲ್ಲಿರುವವರು ಮಾಡಬೇಕಾಗುತ್ತದೆ.

ಕ್ವಿಕ್‌ ಲುಕ್‌

ಹುದ್ದೆ: ಕ್ಲರ್ಕ್ ಕಂ ರೀಸರ್ಚ್ ಅಸಿಸ್ಟೆಂಟ್‌

ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ: ಏಪ್ರಿಲ್‌ 30, 2016

ಹೆಚ್ಚಿನ ಮಾಹಿತಿಗೆ ವೆಬ್‌ ವಿಳಾಸ: www.karnatakajudiciary.kar.nic.in